Read KIMERU BIBLE PROTESTANT EDITION Jer 30 Bible Online

Jer 30 - KIMERU BIBLE PROTESTANT EDITION bible

Jer 30

¹MWATHANI nî aarîîrie Jeremia aramwîra atîrî,

²“Ûûni MWATHANI Mûrungu wa Israeli ndiuga ûjû: Aandîka yukuune mantû jonthe jarîa nkwîrîte.

³Nîkwîthîrwa rî, îgiita nî rîîjîte rîrîa ngacokeria antû baakwa ba Israeli na ba Juda mawega jaao jarîa ja mbere. Ningî nkabareeta kuuma kîthamîrioone mbacokie nthîgûrûûne îrîa ndaaere biûjûjû biaao. Nabo bakaigwatîra yee yaao.”

⁴Nteto iji nîcio MWATHANI aarîrie ciegiî Israeli na Juda:

⁵“Ûûni MWATHANI ndiuga atîrî, Nî mbigîîtue kajû ga kîrîro kîrîro gîa kûmakania na tî kajû ka thîîrî.

⁶Nandî ûthûgaania, ûntû bûbû kwombîka ntomûrûme agaciara mwana? Nîkî îndî nandî ûntû nkwona antû-aarûme bonthe bagwete tuuna ta aka barî na mûrimo jwa kûewa mwana? Nîkî ûntû moothiû ja antû jatuki ûjû?

⁷Ai! Ntukû îîu nî ya kûrigaria nîûntû gûtî îngî tayo. Îkeethîrwa îrî ntukû ya kûthangîka gwa nchiarwa cia Jakubu. Îndî amwe na jau ikoonokua kîrî yo.”

⁸MWATHANI Mweneinya ariuga ûjû, “Ntukû îîu, nkaunanga gîchooki kîrîa kîrî nkingo ciaao na ngitange nyororo irîa ibatheekeete. Nabo batîgacoka kwaa nkombo kaîrî cia antû ba kûngî.

⁹Îndî bo bagatua gûtumîkagîra MWATHANI Mûrungu waao, na mûnene wa rûrîîjo rwa Daudi ûrîa nkaabathuurîra.

¹⁰ Tontû bûû, buî antû baakwa nchiarwa cia Jakubu, menya bûkîra, itû buî antû ba Israeli bûkámaka. Nîkwîthîrwa rî, nkaabwonokeria kûu bûrî kûraaja na mbonokie nchiarwa cieenu kuuma ûkomboone nthîgûrûûne irîa barî. Antû ba Israeli bagacoka nthîgûrû yaao beethîrwe barî na wega na thîîrî na gûtî we ûkoonora wa kûbamakia.

¹¹Ûûni MWATHANI ndîbwîra atîrî, ndî amwe naabui, na nkaabwonokagia. Ningî nkaathiria buru mîgongo yonthe îrîa bûnyaganîtue kîrî yo, îndî buî ntîbûthiria. Nkaabûkanûkia ûrîa bwagîri gûkanûkua na gûtî nkaanja ntîtigana naabui ntîbûkanûkîtue.

¹²Ûûni MWATHANI ndîbwîra atîrî, iringîrwa bieenu bitîûmba kworua na ironda bieenu nî bibithûûku mono.

¹³Bûtî na muntû wa kûbûteteera na ironda bieenu bitîona ndawa naabuî bûtîûmba kworua.

¹⁴Nabo anyaanya beenu bonthe nî boorîrîîtue nî buî, batîkûûria ûrîa bûgaakara. Nîkwîthîrwa nî mbûringîte ta mûnthû ndaabûkanûkia îkanûkia rîkari ta rîa muntû ûbûthwîre ûtî na kîaao naabuî nîûntû meeyia jeenu nî jamaingî na ûthûûku bweenu nî bûbûnene.

¹⁵Nîkî ûntû bûkûrîrua nî iringîrwa bieenu? Ûrûrû bweenu bûtîûmba kûthira nîûntû meeyia jeenu nî jamaingî na ûthûûku bweenu nî bûbûnene. Nî ni mbûthithîrîtie mantû jaja.

¹⁶Tontû bûû, barîa bonthe bakaabûthiria kinya bo bakaathirua. Anthû beenu bonthe bagaikua ûkomboone, barîa bonthe babûtaagîra into, bagataîrwa. Nabo bonthe barîa babwithûkagîra bakaithûkîrwa.

¹⁷Nîkwîthîrwa ûûni MWATHANI ndiuga atîrî, nkabûcokeria thîîrî yeenu na ironda bieenu nkabioria, kinya këethîra antû baugaaga ‘Nî bateejanîrîîtue’ na atî ‘Zaiûni îtî na wa kûmîmenyeera.’

¹⁸Ûûni MWATHANI ndiuga atîrî: Ûûni rî, ngacokeria antû ba Israeli itûûro biaao, mbigîîrue nja ciaao kîaao. Jerusalemu nayo îgaakwa o arîa yaarî na gîkaro kîa mûnene gîgaakwa arîa kîaarî.

¹⁹Nabo antû ba gûntû kûu bakainaga ndwîmbo cia nkaatho, na bainage na tûjû twa nkerû. Nabo antû batîîthîrwa barî babakai nîûntû nkaabathegeyia baingîe. Ningî batîkara batî na îgweta na batîtûûra barî babaniini.

²⁰Nacio nchiarwa ciaao ikethagîrwa ikari ûrîa baakari mbereene. Naani nkaabarikia bae kîûthûrano gîkinene mbere yaakwa. Nabo bonthe barîa babainyagîîria nkaabakanûkia.

²¹Mûtongeeria waao akethagîrwa arî ûmwe waao, na mûnene waao akethagîrwa arî ûmwe waao. Naani ngatûma ankuîrîrie akarage akuî naani, nîûntû gûtî we ûûmîîria gûnkuîrîîria nîu ûûni MWATHANI nkuuga.

²²Naabuî bûkaa antû baakwa naani mbîthîrwe ndî Mûrungu weenu.”

²³Tî kîu kîbubani kîa MWATHANI! Nî arekeeretie mûthûûro jwaawe jwîjîte ta kiurutani gîkînene naju jûgatûrîkîra barîa baaî.

²⁴Mûthûûro jûmûnene jwa MWATHANI jûtîthira mwanka athithie ûrîa akwenda. Bûkaamenya mantû jaja bwega, matukû jarîa jakeeja.