Read KIMERU BIBLE PROTESTANT EDITION Jer 31 Bible Online

Jer 31 - KIMERU BIBLE PROTESTANT EDITION bible

Jer 31

¹MWATHANI nî aarîrie arauga atîrî, “Îgiita rîgaakinya rîrîa nkaa Mûrungu wa mîîrîga yonthe ya Israeli. Nabo antû ba mîîrîga îîu bakaa antû baakwa. Nîu ûûni MWATHANI nkuuga.”

²Ningî MWATHANI aaugîre atîrî, “Antû barîa boonokeere ndweene Ûûni MWATHANI nî ndaabaigîrîîrue kîaao barî rwanda; rîrîa antû ba Israeli baacwaga kînogoko.

³Nî ndaacionanîrie kîrî bo ndî gataaria. Nî mbwendeete na wendo bûtîthiraga. Tontû bûû, ngeeta na mbere kûbwigîîrua kîaao magiita jonthe.

⁴O kaîrî ngaagwaka waakîke gwe mwarî karaiti Israeli. O kaîrî ûkaajûkia tamburini ciaaku uumagare ûkainanîrie na barîa bagwîrîtue.

⁵O kaîrî bûkaanda miuunda ya mîzabibû irîmeene bia Samaria; barîa bakamîanda, baakarîa maciara jaayo bagwîrîtue.

⁶Ntukû îgaakinya rîrîa akaria bagaatûmîîria kuuma nthîgûrûûne ya irîma ya Efuraimu bakiugaga atîrî, ‘Ithuranîreni twîte Zaiûni kîrî MWATHANI Mûrungu weetû.’”

⁷MWATHANI ariuga atîrî, “Inîreeni antû ba Israeli bûgwîrîtue bûkumie mûgongo jûrîa mûnene kîrî mîgongo yonthe. Ineeni ndwîmbo cia ûkumio bûkiugaga, ‘MWATHANI nî oonokeetie antû baawe tabo barîa batigeere ba Israeli.’

⁸Atîrî, nkaabareeta kuuma nthîgûrû ya bwa ûrîo, na mboothûranie kuuma mîthia yonthe ya nthîgûrû; Nkaareeta atumuumu, na ithua, na aka babarito, na aka barîa barî akuî kûewa twaana. Nabo bagacoka gûntû gûkû, barî gîkundi gîkînene.

⁹Bakeeja bakîrîraga naani mbaboorerie mbatongeerie bacoke. Nkaabeetithîîria gûntû kûrî na rûûjî njîreene injega kûrîa batîgiitara. Nîkwîthîrwa nî ni îthe wa Israeli na Efuraimu nîwe mwana waakwa wa kîranga.

¹⁰Thikîîreeni rûteto rwaakwa buî mîgongo, na bûrûtûmîîrie kûraaja nthîgûrûûne irîa iriganîrîtie na îria, buuge atîrî, ‘Ûrîa waanyaganîrie antû ba Israeli akaaboothûrania na abamenyeere ta ûrîa mûrîîthi amenyagîîra ndîîthia ciaawe.’

¹¹Nîkwîthîrwa ûûni MWATHANI nî ni ndoonokerie antû ba Israeli ndîrabakûûra kuuma kîrî anthû barîa baarî na inya nkûrûki yaao.

¹²Nabo bageeta kîrîmeene gîa Zaiûni bakainaga na tûjû. Ningî bakaaagwîrîrua mawega jaakwa, na bagwîrue nîûntû bwa maketha ja irio na ndibei, na maguta. Bacoke bagwîrîrue kwîthîrwa barî na ndîîthia. Nabu ûtûûro bwaao bûgaakara ta muunda jûrîa jûtîagaga rûûjî, bakethagîrwa bang'anîrîîtwe îgiita rîonthe.

¹³Rîu aarî bakaina na nkerû nacio nthaka na akûrû bakagwîrua. Naani nkaagarûra kwithikîîra kwaao kwee kûgwîrua, na nkaababoreria, mboojûrie nkerû antû a kîrîro.

¹⁴Ningî nkaamaathîra athînjîri-Mûrungu mbaeejage into bibingî. Nabo antû baakwa mbanenkere kîrîa kîonthe bakwenda. Ûu nîu ûûni MWATHANI nkuuga.”

¹⁵ MWATHANI arauga atîrî, “Kûrî kajû ga kîrîro gîkînene gakwigîîgua ntûûreene ya Rama. Raeli nî akûrîrîra aana baawe, na atîkwenda kûboorerua nîûntû bwa aana bau nîûntû batî o.

¹⁶Tiga kûrîra, na wangûre meetho jaaku meethori nîûntû ngûgî yaaku îkoona îrîi nîu ûûni MWATHANI nkuuga. Nabo bagaacoka kuuma nthîgûrûûne ya anthû baao.

¹⁷Gwe ûrî na wîrîgîîro bwa matukû jarîa jakeeja nîûntû aana baaku bagaacoka nthîgûrûûne yaao yongwa. Ûu nîu ûûni MWATHANI nkuuga.

¹⁸Nî mbigîîtue ûrîa antû ba Israeli bakûrîra bakiugaga: ‘Gwe nî ûtûritanîte ta njaû cia mûraû mwanka twamenya. Tûcokie kîrî gwe, nîûntû nî tûkwenda gûcoka kîrî gwe, nîkwîthîrwa nîgwe MWATHANI Mûrungu weetû.

¹⁹Tuî nî twakwîrûkîîre na nyumeene tûracoka kwirira. Naagwe rîrîa waatûritanîre tûrakunîka moothiû jeetû nî nthao. Tuî twarigarîre tûraigua nthoni mono nîûntû bwa mantû jarîa twathithîtie tûrî babeethî.’

²⁰Efuraimu nîwe mwana waakwa ûrîa mpendeete mono, mwana ûrîa mwende kîrî bangî. Kinya këethîra nî nthûûraga nîwe jamaingî ntîûragîrua nîwe buru. Tontû bûû, nî nkwigua mwendeete mono na no mwanka mwigîîrue kîaao. Ûu nîu ûûni MWATHANI kuuga.

²¹Îkîra bionanîîria njîreene, wîkîre ndwano njîreene îmbariî irîa weetîrîîre, ûcoke nja gwe mwarî karaiti Israeli, ûcoke ntûûreene ciaaku.

²²Gwe mwarî ûtî mwîtîkua ûgaakara ûgîtarataraga mwanka rî? Ûûni MWATHANI nî ndeeteete ûntû bûbwerû nthîgûrûûne: O ta ûrîa muntû omba kûrigara mûka akarîtie ntomûrûme.”

²³MWATHANI Mweneinya, Mûrungu wa Israeli ariuga ûjû, “Rîrîa ngacokeria antû ba Juda na ntûûra ciaao mawega jaao, bagaacoka kwaragia o kaîrî bakiugaga atîrî, ‘MWATHANI arokûtharima gwe gîtûûro kîa waagîru gwe kîrîma gîkîtheru.’

²⁴Nabo antû bagaatûûra nthîgûrûûne ya Juda amwe na ntûûreene ciaayo cionthe. Naku gûkeethîrwa kûrî na arîmi na arîîthi barî na ndîîthia ciaao.

²⁵Nîkwîthîrwa nkaanogokia barîa banogi, na barîa barî na mpara mbanyirie.

²⁶“Îgiita rîu, antû bakaamamaga na bagookîîra banogoki.”

²⁷MWATHANI ariuga atîrî, “Matukû nî jeejîte rîrîa ngatûma antû ba nthîgûrû ya Israeli na ba Juda baingîe na nyomoo ithegîee.

²⁸Naku gûgakara atîrî, o ta ûrîa ndaabakarîrie mwanka ndîroona bagûkûûrwa kuuma nthîgûrû yaao, na baakûtharua, na baakûgarûranua, na bakûthirua buru, na bakwîjîîrwa nî ûthûûku, ûu nîu nkaabakaria mwanka mbone bagwakwa, na bakwaandwa nthîgûrûûne yaao. Nîu ûûni MWATHANI nkuuga.

²⁹ Rîrîa îgiita rîu rîgaakinya, batîcoka kuugaga atî ‘Biûjûjû biaao nîbio biarîîre nzabibû incecûku, îndî nchiarwa ciaao nîcio ciaigîrue nyangiri maîgo.’

³⁰Îndî muntû agaakuujaga nîûntû bwa meeyia jaawe wengwa. Muntû ûrîa ûkaarîjaga nzabibû incecûku nîwe ûkaigagua nyangiri maîgo jaawe.”

³¹ MWATHANI ariuga atîrî, “Îgiita nî rîîjîte, rîrîa nkathithia kîrîkanîro gîkîerû na antû ba Israeli na, antû ba Juda.

³²Kîrîkanîro kîu, gîtîthîrwa gîkaari ta kîrîa ndeekanîrîte na biûjûjû biaao rîrîa ndaabagwatîre njara na ndîrabatongeria kuuma Misri. Kinya këethîra ndaarî ta mûrûme waao bo bateeka kîrîkanîro kîu. Nîu ûûni MWATHANI nkuuga.

³³ Îndî kîrîkanîro kîrîa ngeekanîra na antû ba Israeli nyuma ya îgiita rîu, nî atî: Ngeekîra Waatho bwaakwa ndeene yaao, na mbwaandîke nkoroone ciaao. Nkaa Mûrungu waao, nabo bae antû baakwa. Nîu ûûni MWATHANI nkuuga.

³⁴ Gûtî Mûisraeli ûkaritana ûngî akîmwîraga, ‘Menyana na MWATHANI.’ Nîkwîthîrwa antû bonthe bakaamenya kuuma ûrîa mûnini mwanka ûrîa mûnene. Nîu ûûni MWATHANI nkuuga. Nîkwîthîrwa nkabarekera meeyia jaao na ntîririkana maatia jaao kaîrî.”

³⁵MWATHANI ûrîa weejanîte riûa rîara mûthenya, na eeka mweri na njota bia kûthaaraga ûtukû, we uuruganagia îria rîkagîa mîgombe îkûruruma; riîtwa rîaawe nî MWATHANI Mweneinya. We ariuga atîrî,

³⁶“Rîrîa into bikeethîrwa bitî o, nîrîo antû ba Israeli bagatiga kwaa antû baakwa.

³⁷Rîrîa îgûrû rîkaathimwa na mîsingi ya nthîgûrû yoonekane, nîrîo naani ngaateejanîria antû ba Israeli nîûntû bwa mantû jarîa bathithîtie. Ûu nîu ûûni MWATHANI nkuuga.

³⁸“Atîrî, îgiita nî rîîjîte, rîrîa ntûûra ya Jerusalemu îgaakwa kaîrî kuuma mûnaara jwa Hananeli mwanka mpingîroone ya mûthia nîûntû bwaakwa.

³⁹Naju mwanka jwaayo jûgeeta mwanka karîmeene ka Garebu, na kuuma au jûgaûke jwîte Goa.

⁴⁰Nakîo kîguuru kîonthe kûrîa antû baakuû bathikagwa, na kûrîa mûju jûteejagwa, na bûûrî yonthe gwîta kamûuroone ga Kidironi, mwanka gûkinya Mpingîroone ya Mbarathi îrîa îrî bwa gaiti gûkaathûûrwa nîûntû bwaakwa kwee gûkûtheru. Nayo ntûûra îtîkoroaraganua îthirua mwanka kenya.”