Read KIMERU BIBLE PROTESTANT EDITION Jer 32 Bible Online

Jer 32 - KIMERU BIBLE PROTESTANT EDITION bible

Jer 32

¹ MWATHANI nî aarîîrie Jeremia mwakeene jwa îkûmi jwa waathani bwa Zedekia mûnene wa Juda, naju jwaarî mwakeene jwa îkûmi na înaana jwa waathani bwa Nebukadineza.

²Îgiita rîu njûûrî ya mûnene wa Babiloni nî yaacîgîîrîîtie Jerusalemu. Kîroria Jeremia nî aaîngîri kîaragoone gîa akaria kîrîa kîaarî gîkaroone kîa mûnene wa Juda.

³Nîkwîthîrwa Zedekia mûnene wa Juda nî aarî akûmwingîrithia akiugaga, “Nîkî ûntû ûkûroria ûkauga, ‘MWATHANI ariuga ûjû: Atîrî, nkaarekeeria ntûûra îîjî îtawe nî njûûrî cia mûnene wa Babiloni.

⁴Zedekia mûnene wa Juda ationoka kuuma kîrî Ababiloni îndî no mwanka anenkanîrwe kîrî mûnene wa Babiloni, baaranîrie bategeene.

⁵Nebukadineza agaikia Zedekia Babiloni. Kûu nîku agakara mwanka nthithie nawe ûrîa nkwenda. Ningî gwe Zedekia kinya warwaa na Ababiloni ûtîboomba.’ Ûu nîu ûûni MWATHANI nkuuga.”

⁶Jeremia nawe ariuga ûjû, “MWATHANI nî ambarîrîtie ambîîra ûjû:

⁷Atîrî, Hanameli mûtaana wa Shalumu akeeja kîrî gwe nîûntû nî muntû wa ndûgû cieenu akwîre atîrî, ‘Gûra muunda jwaakwa jûrîa jûrî ntûûreene ya Anathothi nthîgûrû ya Benjamini nîûntû nîgwe ûbuîrîte kûjûkûûra. Jûgûre jwee jwaaku.’

⁸Rîu o ta ûrîa MWATHANI aambîrîte, Hanameli muntû wa ndûgû cieetû areeja kîrî ni au kîaragoone gîa akaria, arambîîra atîrî, ‘Gûra muunda jwaakwa jûrîa jûrî ntûûreene ya Anathothi nthîgûrûûne ya Benjamini, nîûntû nîgwe ûbuîrîte kûjûkûûra. Jûkûûre jwee jwaaku.’ Rîu ndîramenya nî MWATHANI ûmbarîrîtie.”

⁹Naani nî ndaagûrîre muunda jûu jwaarî ntûûreene ya Anathothi kuuma kîrî muntû wa ndûgû cieetû Hanameli. Ndîramûthimîra fetha îkûmi na mûgwanja cia kûmûrîaa.

¹⁰Nî ndeetîre akûûjî barakûûjîîra tûkîandîkanîra na tûgîîkanîîra caini. Naani ndîramûthimîra mbeecha.

¹¹Ndîracoka ndîrajûkia karatasi kau twekanîîrîte caini cia ûgûri, kau koonanagia ûrîa twetîkanîîrîtie, na ndîrajûkia karatasi kangî karîa gateekîri caini.

¹²Naani ndîranenkanîra karatasi kau kaandîki mantû ja ûgûri kîrî Baruku mûtaana wa Neria. Neria aarî mûtaana wa Mahaseia. Ndaamûnenkeere karatasi kau muntû ûu wa ndûgû cieetû Hanameli akîonaga. Akûûjî nî baarî o tûkîgûranîra. Ningî kinya Ayahudi bonthe barîa baakari nthî kîaragoone gîa akaria nî baakûûjîrîre nteto iu.

¹³Ndîreera Baruku bathikîîrîte atîrî,

¹⁴“MWATHANI Mweneinya Mûrungu wa Israeli ariuga ûjû: Jûkia tûratasi tûtû twaandîki mantû ja ûgûri; karatasi karîa karî na caini na karîa gatî na caini, ûtwîkîre nyongûûne ya yûmba nîkenda tûtûûra ku îgiita rîrîraaja.

¹⁵Tontû MWATHANI Mweneinya Mûrungu wa Israeli ariuga atîrî: Nyomba, na miuunda, na miuunda ya mîzabibû îkaagûragwa o kaîrî nthîgûrûûne îîjî.”

¹⁶“Nyuma ya kûnenkera Baruku mûtaana wa Neria turatasi tûu twaandîki mantû ja ûgûri, nî ndaarombere MWATHANI ndîrauga atîrî:

¹⁷Îî MWATHANI Mûrungu gwe, nîgwe woombîre îgûrû na nthîgûrû na inya yaaku înene. Gwe gûtî ûntû bûkûrema.

¹⁸Gwe nî woonagia antû babaingî mono wendo na kîaao gîaaku kîrîa gîtîthiraga. Îndî gwe nî ûthingatagia aana îkanûkia rîa beethe. Gwe ûrî ûmûnene na riîtwa rîaakû nî MWATHANI Mûrungu Mweneinya.

¹⁹Gwe ûrî kîrîra gîkiingî na mathithio jaaku nî jamanene. Gwe nî woonaga mîîtîre ya antû yonthe, na ûkarîaa o muntû kûringana na mîîtîre yaawe na kûringana na mathithio jaawe.

²⁰Gwe nî waaringîre biama na wathithia mantû ja kûrigaria nthîgûrûûne ya Misri, na nîu wîtîte na mbere kûthithia nthîgûrûûne ya Israeli, na kinya mîgongoone îngî ya nthî yonthe mwanka naarua tûrî. Naagwe nî ûcionereete îgweta ta ûrîa gûkari nandî.

²¹Gwe nî waaritîre antû baaku ba Israeli nthîgûrûûne ya Misri ûringîte biama na kûthithia mantû ja kûrîgarania ja inya, na kûmakania gûkûnene.

²²Ningî nî wabaeere nthîgûrû îîjî, îrîa waaciîtîîrie biûjûjû biaao ûrabeera ûkabaa, nthîgûrû îrîa nthongi na îrî mûthetu jûmûnoru na ûtonga bûbwingî.

²³Nabo nî baatonyere ku baraigwatîra yo. Îndî bo bataakwathîkîîre kana beeta na mîîtîre îrîa îringeene na Waatho bwaaku. Gûtî ûntû noo bûmwe baathithîrie bwa jarîa waabeerîte bathithie. Tontû bûû, nîkîo gîtûmîte ûbareetera ûthûûku bûbû bunthe.

²⁴“Atîrî, anthû bakûrûngîka nthingo cia gûcîgîîria ntûûra nîkenda bamiithûkîra na bamîtaa. Tontû bwa ndwaa, na mpara, na mîrimo, ntûûra nî înenkanîri kîrî Ababiloni barîa bamiithûkîrîte. Mantû jarîa gwe waarîrie nî jarîkîtie kûûjûra ta ûrîa ûkwona.

²⁵Amwe na ûu, gwe MWATHANI Mûrungu nî ûmbîrîte atîrî, ‘Gûra muunda na mbeecha na wîthîrwe ûrî na akûûjî, kinya këethîra ntûûra nî înenkanîri kîrî Ababiloni.’”

²⁶MWATHANI nî aarîîrie Jeremia aramwîra atîrî,

²⁷“Atîrî, ni nî ni MWATHANI Mûrungu wa antû bonthe. Ga-kûrî ûntû bûbûûmo mono kîrî ni bûrîa ntîûmba kûthithia?

²⁸ Tontû bûû, MWATHANI ariuga ûjû: Ûûni rî, nkanenkanîra ntûûra îîjî kîrî Ababiloni na kîrî Nebukadineza mûnene wa Babiloni, nabo bakamîtaa.

²⁹Ababiloni barîa bakûrwaa na ntûûra îîjî bakeeja bamîîthie buru amwe na nyomba irîa cionthe ciathithîrua mantû ja kûnthûûria. Nyomba irîa cionthe îgûrûgûrû rîaacio rîaîthagîrua ubaani nîûntû bwa Baali, na irîa ciaritagîrwa igongwana bia gwîtûûrîria nîûntû bwa mîrungu îngî.

³⁰Tontû antû ba Israeli na ba Juda kuuma o kîambîrîria batûûraga kûthithia ûthûûku akî meethoone jaakwa. Antû ba Israeli gûtî ûntû bûngî bathithagia tiga gûcwaa ûrîa nkathûûra nîûntû bwa mathithio jaao. Ûu nîu MWATHANI nkuuga.

³¹Ntûûra îîjî îtûûraga îkîmbîkagîra marûrû nkathûûra mono, kuuma ntukû îrîa yaakîrwe mwanka naarua îîjî. Tontû bûû, nkaamînyangia ntige kûmîona.

³²Nkaamîthîria nîûntû bwa ûthûûku bunthe bûrîa antû ba Israeli na ba Juda baathithîrie baumbuthûra mûthûûro jwaakwa. Nabo anene baao, na atongeeria baao, na athînjîri-Mûrungu baao, na iroria biaao, barîa batwîre Jerusalemu na Juda bathithîtie.

³³Bo nî kûmbutatîra bambutatîrîte antû a bamberekera, na kinya këethîra nî mbaritanaga magiita jonthe bataanthikîîra bagwata ûritani bwaakwa.

³⁴ Bo beekîre mîrungu yaao ya mîng'uanano îrîa nthwîre kîûrûûne gîaakwa kîrîa kîgwetanagîrua na riîtwa rîaakwa, baragîîkîra mûgiro.

³⁵ Baakîte gûntû kûrîa mîrungu ya mîng'uanano yaathaathagîrua kûrîa kîguuruune kîa mûtaana wa Hinomu, nîkenda baritaga aana baao barî igongwana kîrî mûrungu jwa mûng'uanano jwa Moleki. Tî ûûni ndaabeerîte bathithie ûu, ningî kinya ntaathûgaanîria ûntû ta bûu ntûma bathithia ûthûûku ta bûu, na ntûma antû ba Juda beeyia.”

³⁶Tontû bûû, MWATHANI Mûrungu wa Israeli nî aambîrîre atîrî, “Antû bariuga atî ndwaa, na mpara, na mîrimo nî bio bigaatûma ntûûra îîjî îtawa nî mûnene wa Babiloni. Îndî nandî thikîîra ûrîa nkuuga:

³⁷Atîrî, nkoothûrania antû kuuma nthîgûrûûne irîa cionthe ndaabeengîrîîrie nîûntû bwa mûthûûro jûmûnene jûrîa jwangwete. Nkaabareeta gûntû gûkû ntûme batûûre kiindajî.

³⁸Nabo baa antû baakwa naani mpee Mûrungu waao.

³⁹Naani ngatûma bagia na yerekeeria rîmwe, ûtûûroone bwaao nîkenda baambathîkagîra mwanka kenya, na nîkenda bo bakoona wega, o amwe na nchiarwa ciaao.

⁴⁰Ngeeka kîrîkanîro gîa kenya nabo, atî ntîkorogarûka ntiga kûbathithîria wega. Ningî ngatûma bankîra na nkoro ciaao na batîkorombîrûkîra.

⁴¹Nkaagwîragua nî kûbathithîria wega na nî mma ngaacieejana buru mbone bakwirikîria nthîgûrûûne îîjî.

⁴²“MWATHANI ariuga atîrî, O ta ûrîa ndeeteereete antû baba ûthûûku bûbû bunthe, no u nkabareetera wega bunthe bûrîa mbeerîrîte.

⁴³Miuunda îkaagûragwa nthîgûrûûne îîjî bûkuuga atî, nî îgaanjo rîtîtûûri nî muntû kana nyomoo, na nî înenkanîri kîrî Ababiloni.

⁴⁴Miuunda îkaagûragwa na mbeecha, na moogûri jageetîkanagîîrua na antû bageekanîîra caini barî na akûûjî. Ûu nîu gûgakaraga gûkû nthîgûrûûne ya Benjamini, na Jerusalemu, na ntûûreene cia Juda, na cia nthîgûrû ya irîma, na cia bûûrî na cia bwa ûmotho bwa Juda. Nîkwîthîrwa nkabacokeria mawega jaao. Ûu nîu ni MWATHANI nkuuga.”