Read KIMERU BIBLE PROTESTANT EDITION Jer 33 Bible Online

Jer 33 - KIMERU BIBLE PROTESTANT EDITION bible

Jer 33

¹Jeremia aingîri o kûu kîaragoone gîa akaria, MWATHANI nî aamwarîîrie rîa jaîrî, aramwîra atîrî,

²“MWATHANI ûrîa woombîre nthî, aramîîka arîa îrî, riîtwa rîaawe nî MWATHANI. Ariuga ûjû:

³Mbîteeni naani nkaabwîtîka, na mbûmenyithie mantû jamanene na ja kûrigaria jarîa buî bûtiijî.”

⁴Nîkwîthîrwa MWATHANI Mûrungu wa Israeli ariuga ûjû mantûûne jegiî nyomba cia ntûûra ya Jerusalemu, na nyomba cia anene ba Juda irîa ciamomorangîrwe nîkenda ithûmba biaacio bitumîrwa gwikaria kuuma kîrî anthû barîa babaithûkîrîte babacîgîîria.

⁵Antû bamwe bageeta barwee na Ababiloni, boojûrie nyomba îîu biimba bia antû barîa nkooraga nîûntû nî nthûûri mono. Nî mbîrûkîrîte ntûûra îîjî nîûntû bwa ûthûûku bunthe bûrîa antû baayo bathithîtie.

⁶Îndî rî, nkooria antû baayo mîrimo babue, na ncokanîîrie ntûûra kaîrî. Ningî nkabaa thîîrî na ûthinyaari na bakare kiindajî.

⁷Ngaacokeria antû ba Juda na ba Israeli mawega jaao, na mbacokanîîrie ta ûrîa baakari mbereene.

⁸Nkaabatheria bathire îgi rîonthe rîa meeyia jaao jarîa banthithîrîtie. Ningî nkaabarekera meeyia jaao na îrema rîaao.

⁹Nayo ntûûra îîjî îkaa kaumo ga kûgwîrua, na ga ûkumio, na ga kûgonga MWATHANI wa mîgongo ya nthîgûrû yonthe îrîa îkaigagua mantû jonthe jarîa mbathithîrîtie. Nayo îkaamaka îteeteme nîûntû bwa mawega jonthe na ûthinyaari bunthe bûrîa mbaeete.

¹⁰MWATHANI ariuga atîrî, “Buugaga gûntû gûkû, ‘Nî îgaanjo rîtî muntû kana nyomoo.’ Îndî ntûûreene iji cia Juda na njîreene cia Jerusalemu irîa ithaami nî antû na nyomoo, nî ndeene yaacio gûkaigîîgua kajû kaîrî

¹¹ ga nkerû na ga gûkûngwîra mambura ja mûranû. Ningî gûkaigîîgua kajû ga antû bakina ndwîmbo baikîîtie igongwana bia nkaatho kîrî MWATHANI, bakiugaga atîrî, ‘Cokerieni MWATHANI Mweneinya nkaatho nîkwîthîrwa MWATHANI nî ûmwega nîûntû kîaao kîaawe gîtîthiraga nî gîa kenya na kenya!’ Nîkwîthîrwa ngacokeria nthî îîjî mawega jaayo o ta jarîa yaarî najo mbereene. Ûu nîu ûûni MWATHANI ndauga.”

¹²MWATHANI Mweneinya ariuga atîrî, “Gûntû gûkû gweete îgaanjo rîtî na muntû kana nyomoo. Îndî ntûûra cia gûntû gûkû cionthe, igaacoka kwaa gîtûûro kîa arîîthi na ndîîthia ciaao.

¹³Arîîthi bakaarîîthagia ndîîthia ciaao na bagaciaania ntûûreene cia nthîgûrû ya irîma, na cia bûûrî, na cia bwa ûmotho bwa Juda, na nthîgûrûûne ya Benjamini, na gûntû kûrîa kûthiûrûkîrîte Jerusalemu, na ntûûreene cia Juda. Ûu nîu ûûni MWATHANI nkuuga.”

¹⁴ MWATHANI ariuga atîrî, “Îgiita nî rîîjîte rîrîa nkoojûria wîrane bûrîa ndeekîîre antû ba Israeli, na ba Juda.

¹⁵Matukûûne jau îgiita rîakinya, ngatûma mûnene ûmwagîru oonore kuuma rûrîîjoone rwa Daudi. Mûnene ûu ûmwagîru nawe akagiitanagîra magamba na îota na waagîru nthîgûrûûne.

¹⁶Îgiiteene rîu, antû ba nthîgûrû ya Juda bakoonokua, na Jerusalemu îgaatûûra kiindajî. Ningî Jerusalemu îgeetagwa, ‘MWATHANI nîwe waagîru bweetû!’”

¹⁷ Nîkwîthîrwa MWATHANI ariuga atîrî, “Gûtîrîo gûkaroaga muntû wa kwaathana ndeene ya Israeli wa kuumania na rûrîîjo rwa Daudi.

¹⁸ Ningî gûtî rîo gûkaroaga mûthînjîri-Mûrungu Mûlawi wa kûnditagîra igongwana bia gwakîîria, na bia irio magiita jonthe.”

¹⁹MWATHANI nî aarîîrie Jeremia aramwîra atîrî,

²⁰“Ûûni MWATHANI ndiuga ûjû: Nî mbîkanîîrîte kîrîkanîro na mûthenya na ûtukû nîkenda biîthagîrwa birî o îgiita rîaabio rîakinya. Kîrîkanîro kîu gîtîûmba kûthûûkua.

²¹Ûu nîu kîrîkanîro gîaakwa na nthûûmba yaakwa Daudi gîtîûmba kûthûûkua. No mwanka kwonorage mûnene wa kwaathana kuuma rûrîîjoone rwaawe. Ningî kinya kîrîkanîro gîaakwa na athînjîri-Mûrungu barîa Alawi barîa bantumîkagîra gîtîûmba kûthûûkua.

²²O ta ûrîa njota na mûthanga bitîûmba gûtarîka no u nkaingîyia nchiarwa cia nthûûmba yaakwa Daudi na cia athînjîri-Mûrungu Alawi barîa bantumîkagîra.”

²³MWATHANI nî aarîîrie Jeremia aramwîra atîrî,

²⁴“Nî ûmenyete ûrîa antû ba mîgongo îngî bakuuga? Bariuga atîrî, ‘MWATHANI nî aatejanîîrie antû ba mîîrîga ya Israeli na ba mîîrîga ya Juda barîa aithuurîrîte.’ Tontû bûû, antû bau ba mîgongo îngî nî bameneete antû baakwa, na bakamena nthîgûrû yaao.”

²⁵MWATHANI ariuga atîrî, “Nî ni mbîkanîîrîte kîrîkanîro na mûthenya na ûtukû, na ndaeejana mawaatho jarîa jaathaga îgûrû na nthîgûrû.

²⁶Ntîenda kûthûûkia kîrîkanîro gîaakwa kîrîa ndîkanîîre na nchiarwa cia Jakubu, na cia nthûûmba yaakwa Daudi. Nkaathuuraga ûmwe wa nchiarwa cia Daudi aathage nchiarwa cia Abrahamu, na cia Isaaka, na cia Jakubu. Ningî nkabaigîîrua kîaao na mbacokerie mawega jaao jarîa ja mbere.”