Read KIMERU BIBLE PROTESTANT EDITION Jer 34 Bible Online

Jer 34 - KIMERU BIBLE PROTESTANT EDITION bible

Jer 34

¹ MWATHANI nî aarîîrie Jeremia rîrîa Nebukadineza mûnene wa Babiloni, na njûûrî yaawe yonthe na mîgongo yonthe ya nthîgûrû îrîa aathaga, na antû bonthe, baithûkîrîte ntûûra ya Jerusalemu na ntûûra irîa ciamîthiûrûkîrîte cionthe, aramwîra atîrî,

²“Ûûni MWATHANI Mûrungu wa Israeli ndiuga ûjû: Îta waarîrie Zedekia mûnene wa Juda, ûmwîre atîrî, nkaanenkanîra ntûûra îîjî kîrî mûnene wa Babiloni. Mûnene ûu wa Babiloni akaamîîthia.

³Naagwe Zedekia ûtiiteethia. Îndî ûkaagwatwa wikue kîrî Nebukadineza. Naagwe ûkaaranîria na mûnene wa Babiloni bûtegeene. Ningî ûgaikua Babiloni.

⁴Amwe na jau, thikîîra rûteto rwa MWATHANI îgwe Zedekia mûnene wa Juda. MWATHANI arakwîra atî gwe ûtîkuîra ndweene.

⁵Ûgakua gîkuû gîtî na thîîna. O ta ûrîa anene barîa baathanaga mbere yaaku, tabo biûjûjû biaaku biakuujaga bakaîthîrua ubaani, no u kinya gwe ûkaîthîrua ubaani. Ningî ûkaarîrîrwa nî antû bakiugaga, ‘Wûi mûnene weetû agûkua!’ Nîkwîthîrwa nî ni MWATHANI mbugîîte mantû jau.”

⁶Kîroria Jeremia nî eerîre Zedekia mûnene wa Juda mantû jau jonthe kûu Jerusalemu.

⁷Aamwîrîre mantû jau rîrîa njûûrî ya mûnene wa Babiloni yaithûkîrîte Jerusalemu na ntûûra cia Juda cionthe irîa ciatigeere. Nacio ntûûra iu ciatigeere ciaarî Lakishi na Azeka. Nîkwîthîrwa nîcio cionka ciatigeere ciairigîri na nthingo.

⁸MWATHANI nî aarîîrie Jeremia, nyuma ya mûnene Zedekia gwîkanîîra kîrîkanîro na antû ba Jerusalemu bonthe atî gûtûmîîrue nkombo cionthe cieewe ûciathi.

⁹Kîrîkanîro kîaarî atî antû bonthe bae nkombo ciaao cia Ayahudi cia aka na cia arûme ûciathi, na atî gûtî muntû ûbuîrîte kweethia Mûyahudi ûngî nkombo.

¹⁰Nabo atongeeria na antû bonthe nî beetîkîrîîrie nteto cia kîrîkanîro kîu bareetîkîîria kwaa nkombo ciaao cia aka na cia arûme ûciathi, na kûraa atî itîethua nkombo kaîrî. Tontû bûû, barairekeeria irauma ûkomboone.

¹¹Îndî nyumeene antû bau bararega kûthithia ûrîa baaugîîte barajûkia nkombo iu baaeete ûciathi, baracieethia nkombo kaîrî.

¹²MWATHANI nî aarîîrie Jeremia aramwîra atîrî,

¹³“Ûûni MWATHANI Mûrungu wa Israeli ndiuga ûjû: Nî ndeekanîîre kîrîkanîro na biûjûjû bieenu rîrîa ndaabaritîre Misri nthîgûrû ya ûkombo. Ndîracoka ndîrabeera atîrî,

¹⁴ ‘Nyuma ya mîaka îtaantatû no mwanka muntû wonthe ae nkombo ciaawe cia Ayahudi ûciathi irîa eenderetue na imûtumîkîrîte mîaka îtaantatû. Nkombo ta iu no mwanka irekeerue itige gûtumîkîra mwathi waacio.’ Îndî biûjûjû bieenu bitambigîrue kana bimbathîkîra.

¹⁵Îgiita rîrîkai rîkûrûkîte nî bûrairirîre na bwathithia ûrîa kwagîrîte, bûrî mbere yaakwa kîûrûûne nî bwetîkîrîîrie atî bûkaa nkombo cieenu ûciathi, na bwekanîra kîrîkanîro kîu naani bûrî kîûrûûne kîrîa kîgwetanagîrua na riîtwa rîaakwa.

¹⁶Îndî buî bwinthe nî bwagarûkîre bwekîrithia riîtwa rîaakwa nthao nîûntû bwa gûcokia nkombo cieenu cia aka na cia arûme ûkomboone irîa bwarekeeretie o ta ûrîa ciendaga.

¹⁷Tontû bûû, MWATHANI ariuga atîrî, Buî bûregeete kûmbathîkîra; bwarega kwaa nkombo cieenu cia aka na cia arûme cia Ayahudi ûciathi. Atîrî, ûûni nkabwaa ûciathi. Nabu nî ûciathi bwa kûthuura ûrîa bûkwenda. Nabu nî kûûragîrwa ndweene, kana kûûragwa nî mîrimo kana kûûragwa nî mpara, Ûu nîu ûûni MWATHANI nkuuga. Ngaatûma bwee gîntû gîa kûmeneerua nî mîgongo yonthe ya nthîgûrû.

¹⁸Nabo antû barîa baaregere kûûjûria nteto cia kîrîkanîro kîrîa beekanîîre naani, ngatûma bakare ta njaû îrîa baathînjîre baramîatûrania mîgwanja îîrî na barakûrûkîîra gatîgatî kaayo.

¹⁹Nabo antû bau nî atongeeria ba Juda, na ba Jerusalemu, na aakûre, na athînjîri-Mûrungu, na antû bonthe nthîgûrûûne barîa baakûrûkîrîîre gatîgatî ka mîgwanja îîu ya njaû.

²⁰Nkabanenkanîra kîrî anthû baao, na kîrî barîa bacwaga kûbathiria. Nabo booragwa biimba biaao bikaa biakûrîa bia nyoni, na nyamû cia kîthaka.

²¹Ningî nkaanekanîra Zedekia mûnene wa Juda na atongeeria baawe nkabanenkanîra kîrî anthû baao, na kîrî barîa bacwaga kûbathiria. Nkabanenkanîra kîrî njûûrî ya mûnene wa Babiloni îrîa îtigîte kûbaithûkîra.

²²Îndî rî, ngeeta njûûrî îîu mîreete gûkû ntûûreene ya Jerusalemu. Nayo njûûrî îîu îkarwaa na ntûûra îîjî, îmîtae na îmîîthie. Nacio ntûûra cia Juda ngaacieethia maganjo jatîtûûri. Ûu nîu ûûni MWATHANI nkuuga.”