Read KIMERU BIBLE PROTESTANT EDITION Jer 35 Bible Online

Jer 35 - KIMERU BIBLE PROTESTANT EDITION bible

Jer 35

¹ MWATHANI nî aarîîrie Jeremia rîrîa Jehoiakimu mûtaana wa Josia aathanaga nthîgûrûûne ya Juda aramwîra atîrî,

²“Îta kîrî antû ba rûrîîjo rwa Rekabu ûbaarîrie ûbeere beeje kîûrûûne, ûbaikie kanyomba kamwe ga kîûrû, ûbakuundie ndibei.”

³Tontû bûû, ndîrajûkia Jaazania mûtaana wa Jeremia, na Jeremia mûtaana wa Habazinia. Ningî ndîrajûkia ataana ba ng'ina ba Jaazania na ataana baawe bonthe na antû ba rûrîîjo rwa Rekabu bonthe,

⁴ndîrabaikia kîûrûûne. Ndîrabakûrûkia kanyomba ka ataana ba Hanani mûtaana wa Igidalia ûrîa waarî muntû wa Mûrungu. Kanyomba kau kaarî akuî na kanyomba ga atongeeria, îgûrû rîa kanyomba ka Maaseia mûtaana wa Shalumu ûrîa waarî mûkaria wa mwari.

⁵Naani ndîranenkera antû ba rûrîîjo rwa Rekabu ithiri biûjûri ndibei amwe na ikombe. Rîu ndîrabeera bamînyue.

⁶Îndî bo barambîîra atîrî, “Tuî tûtînyua ndibei nîûntû kîjûûjû gîeetû Jonadabu mûtaana wa Rekabu nî aatigîre atwîra atîrî, ‘Buî na nchiarwa cieenu bûkányua ndibei kenya na kenya.

⁷Bûgáka nyomba, kana bûrîma miuunda, kana bwaanda miuunda ya mîzabibû kana bûgîa na gîntû noo kîrîkû kîa biu. Buî bûgaatûûraga maemeene ûtûûro bweenu bunthe nîkenda bûûmba gûtûûra îgiita rîrîraaja nthîgûrûûne îrîa bûkeethîrwa bûrî ageni.’

⁸Naatuî tûtwîre twathîkîrîte kîûjûjû gîeetû Jonadabu mûtaana wa Rekabu kîrî mantû jonthe jarîa aatûkaanîrie. Tontû bûû, tuî na aka beetû, na aana beetû tûtaakuunda ndibei ûtûûroone bweetû bunthe.

⁹Ningî tûtaaka nyomba cia gûtûûra, na tûtîrîmaga miuunda kana twîthîrwa tûrî na miuunda ya mîzabibû.

¹⁰Îndî tuî tûtûûraga maemeene, na nî twathîkîrîte kîûjûjû gîeetû Jonadabu twathithia jarîa jonthe aatwîrîre.

¹¹Îndî rîrîa Nebukadineza mûnene wa Babiloni aithûkîîre nthîgûrû îîjî, nîrîo twaugîre, ‘Ga twîîte Jerusalemu, nîûntû nî twakîraga njûûrî ya Babiloni na ya Sîria.’ Nîkîo gîtûmi tûtwîre Jerusalemu.”

¹²MWATHANI nî aarîîrie Jeremia aramwîra atîrî,

¹³“Ûûni MWATHANI Mweneinya, Mûrungu wa Israeli ndiuga ûjû: Îta ûûrie antû ba nthîgûrû ya Juda, na barîa batwîre Jerusalemu, gîtûmi baregeete kûmbathîkîra na barega kûgwata ûritani bwaakwa.

¹⁴Jonadabu mûtaana wa Rekabu nî aakaanîrie nchiarwa ciaawe kûnyua ndibei na iramwigua. Nacio itaakuunda ndibei mwanka naarua tûrî nîûntû bwa kwathîkîra kîûjûjû kîaao. Nî ntwîre kûbwarîria magiita jamaingî îndî buî bûtîmbathîkagîra.

¹⁵Mbûtûmîrîte nthûûmba ciaakwa iroria bionthe magiita jamaingî. Mbeeraga babwîre atîrî, ‘Garûkeni bwinthe bûtigane na mîîtîre yeenu îmîthûûku, na bûthithagie ûrîa kwagîrîte bûtige kûthingataga mîrungu îngî na kûmîtumîkîra. Bwathithia ûu bûgatûûra nthîgûrûûne îrîa ndaaere biûjûjû bieenu na îrîa mbweete.’ Îndî buî bûtaambigua kana bûmbathîkîra.

¹⁶Nchiarwa cia Jonadabu mûtaana wa Rekabu cio nî ciathîkîîre ûrîa kîûjûjû kîaao kîaabeerîre, buî bûtîmbathîkagîra.

¹⁷Tontû bûû, ûûni MWATHANI Mweneinya Mûrungu wa Israeli ndiuga atîrî, nkaareetera antû ba nthîgûrû ya Juda na barîa bonthe batwîre Jerusalemu ûthûûku bunthe bûrîa mbugîîte nkaabathithîria. Nîkwîthîrwa nî mbarîrîtie nabo barega kûnthikîîra. Nî mbeetîîte nabo barega kûmbîtîka.”

¹⁸Îndî Jeremia nî eerîre nchiarwa cia Rekabu atîrî, “MWATHANI Mweneinya, Mûrungu wa Israeli ariuga ûjû mantûûne jabwegiî. Buî nî bwathîkîrîte kîûjûjû kîeenu Jonadabu na bwathingata ûrîa aaugîre na bwathithia jarîa jonthe aabwîrîre.

¹⁹Tontû bûû, ûûni MWATHANI Mweneinya, Mûrungu wa Israeli ndiuga atîrî, nchiarwa cia Jonadabu mûtaana wa Rekabu itîkoroaga muntû wa gûntumîkîra.”