Read KIMERU BIBLE PROTESTANT EDITION Jer 36 Bible Online

Jer 36 - KIMERU BIBLE PROTESTANT EDITION bible

Jer 36

¹MWATHANI nî aarîîrie Jeremia mwakeene jwa ina jwa waathani bwa mûnene wa nthîgûrû ya Juda tawe Jehoiakimu mûtaana wa Josia. Aramwîra atîrî,

²“Jûkia yuku waandîke mantû jonthe jarîa nkwîrîte jegiî Israeli, na Juda, na mîgongo yonthe kuuma ntukû îrîa ndaakwarîîrie rîrîa mûnene Josia aathanaga mwanka naarua tûrî.

³Kwombîka antû ba Juda bakamenya ûthûûku bunthe bûrîa ndî akuî kûbathithîria. Nabo bonthe boomba kûgarûka bagatigana na mîîtîre yaao îmîthûûku, naani nkabarekera maatia na meeyia jaao.”

⁴Jeremia nî eetîre Baruku mûtaana wa Neria, aramwîra mantû jonthe jarîa MWATHANI aamwîrîte. Baruku nawe arajaandîka yukuune jonthe.

⁵Jeremia areera Baruku atîrî, “Ûûni nî ndigîîrîtue gwîta kîûrûûne.

⁶Tontû bûû, gwe îta ku kûrî ntukû îrîa antû baciataga biakûrîa. Naagwe ûthome nteto cia MWATHANI irîa waandîka yukuune ngîkwîraga, antû bonthe barîa barî kîûrûûne bakiigagua. Ningî ûthome nteto iu antû ba Juda bonthe barîa baumîte ntûûreene ciaao bakiigagua.

⁷Kwombîka MWATHANI akaigua maromba jaao. Nabo boomba kûgarûka bagatiga mîîtîre yaao îmîthûûku. Nîkwîthîrwa MWATHANI arî na mûthûûro jûmûnene na nî agiitîrîte antû baba îgamba rîa kûbakanûkia.”

⁸Baruku mûtaana wa Neria arî kîûrûûne nî aathithîrie mantû jonthe jarîa kîroria Jeremia aamwîrîre ja kûthoma nteto cia MWATHANI irîa ciaandîki yukuune.

⁹Kûrî mweriine jwa kenda mwakeene jwa îtaano jwa waathani bwa mûnene wa Juda ûrîa weetagwa Jehoiakimu mûtaana wa Josia, antû bonthe ba Jerusalemu, na antû bonthe ba ntûûra cia Juda barîa beetîre Jerusalemu nî baatûmîrîîrie ntukû ya gûciata biakûrîa nîkenda MWATHANI abaigîîrua kîaao.

¹⁰Baruku nî aathomere yukuune nteto irîa Jeremia aamwîrîte antû bonthe bakiigagua. Aathomere aarî kanyomba karîa kaarî kîûrûûne ka mwandîki wa mantû jarîa jaaragua kîaragoone, tawe Gemaria mûtaana wa Shafani. Kanyomba kau kaarî rûgûrû, kîaragoone, akuî na arîa gwakûrûkagîîrwa Mpingîroone Înjerû ya kîûrû.

¹¹Mikaia nî aaigîrue nteto iu cionthe cia MWATHANI ciathomagwa kuuma yukuune. Mikaia aarî mûtaana wa Gemaria, na Gemaria aarî mûtaana wa Shafani.

¹²Mikaia areeta gîkaroone kîa mûnene aratonya kanyomba ka mwandîki. Atongeeria bonthe nî baakari nthî o. Nabo baarî Elishama tawe mwandîki, na Delaia mûtaana wa Shemaia, na Elinathani mûtaana wa Akibori, na Gemaria mûtaana wa Shafani, na Zedekia mûtaana wa Hanania, na atongeeria bangî bonthe.

¹³Mikaia arabeera nteto cionthe irîa aigîîtue Baruku akîthomera antû kuuma yukuune.

¹⁴Atongeeria bonthe nabo baratûma Jehudi nîkenda eera Baruku ûjû, “Jûkia yuku rîrîa ûthomeere antû wîje narîo.” Jehudi aarî mûtaana wa Nethania, Nethania aarî mûtaana wa Shelemia, na Selemia aarî mûtaana wa Kuushi. Tontû bûû, Baruku mûtaana wa Neria arajûkia yuku areeta kîrî bo.

¹⁵Nabo atongeeria baramwîra atîrî, “Kara nthî ûtûthomere yuku rîu.” Tontû bûû, Baruku arabathomera.

¹⁶Rîrîa baigîrue nteto iu cionthe barategana barî na ûguaa mono. Bareera Baruku atîrî, “No mwanka twîre mûnene mantû jaja jonthe.”

¹⁷Baramûûria atîrî, “Twîre nîatîa ûûmbîte kwaandîka mantû jaja jonthe? Nî Jeremia ûrakwîraga ûkîandîkaga?”

¹⁸Baruku arabacokeria arabeera atîrî, “Nî Jeremia ûrambîrîre mantû jau jonthe nkîandîkaga yukuune na karamu ka rangi.”

¹⁹Nabo atongeeria bareera Baruku atîrî, “Îteeni, ûûgwe na Jeremia bwiciithe na bûkáreka muntû noo ûrîkû amenya kûrîa bûrî.”

²⁰Atongeeria bau nabo bareeta kîaragoone kîa mûnene nyuma ya gwîka yuku rîu kanyomba ka Elishama ûrîa mwandîki. Nabo bareera mûnene nteto iu cionthe.

²¹Mûnene nawe areera Jehudi eete agîîre yuku rîu kuuma kanyomba ka Elishama ûu mwandîki. Jehudi arathomera mûnene o amwe na atongeeria baawe bonthe barîa baarûngami bamûthiûrûkîrîte.

²²Naku kwaarî mweri jwa kenda. Mûnene aakari nthî nyomba îrîa aakaraga îgiita rîa mpio, agîotaga mwanki.

²³Jehudi athiria kûthoma tûchunchî tûthatû, kana tûna, mûnene nî aatûgiitaga na gachiû ka mûbuko, agatûgera mwankiine mwanka yuku rîu rîonthe rîraya rîrathira.

²⁴Îndî mûnene na nthûûmba ciaawe kinya baigua nteto iu cionthe, bataigîrue ûguaa kana noo boonania bamakîte.

²⁵Ningî kinya rîrîa Elinathani, na Delaia, na Gemaria beereencaga mûnene atiga kwîîthia yuku rîu, atabaigîrue.

²⁶Mûnene areera mûtaana waawe tawe Jerahameeli, na Seraia mûtaana wa Azirieli na Shelemia mûtaana wa Abudeeli, bagwate Baruku ûu mwandîki, na kîroria Jeremia. Îndî MWATHANI nî aarî akûbaitha.

²⁷Nyuma ya mûnene kwîîthia yuku rîrîa Baruku aandîkîte akîîragwa nî Jeremia, MWATHANI nî aarîîrie Jeremia aramwîra atîrî,

²⁸“Jûkia yuku rîngî waandîke nteto irîa cionthe ciaarî yukuune rîa mbere, rîrîa Jehoiakimu mûnene wa Juda araîthîrie.

²⁹Mantûûne jegiî Jehoiakimu ûu mûnene wa Juda uuge atîrî, ‘Gwe nî ûraîîthîrie yuku rîrîa rîaandîki ûkiugaga: Nîkî ûntû waandîkîte atî no mwanka mûnene wa Babiloni eeje athirie nthîgûrû îîjî, amwe na antû na nyomoo?

³⁰Tontû bûû, ûûni MWATHANI ndiuga ûjû mantûûne jegiî Jehoiakimu ûu mûnene wa Juda. Gûtî wa nchiarwa ciaawe ûkoroaa mûnene aathanaga nthîgûrûûne îrîa Daudi aathanaga. Ningî kiimba kîaawe gîgateewa kîaragîrwe nî riûa mûthenya na kîgûûjagîrwe nî nkamia ûtukû.

³¹Ningî nkamûkanûkia amwe na nchiarwa ciaawe, na nthûûmba ciaawe nîûntû bwa meeyia jaao. Nkabaretera we na nchiarwa ciaawe, na barîa batûûraga Jerusalemu, na antû ba Juda, ûthûûku bunthe bûrîa mbugîîte nkabakanûkia nabu, nîûntû bataambathîkîra.’”

³²Jeremia nî aajûkîrie yuku rîngî, aranenkera mwandîki tawe Baruku mûtaana wa Neria. Baruku araandîka mantû jarîa eeragwa nî Jeremia, jarîa jonthe jaandîki yukuune rîrîa Jehoiakimu mûnene wa Juda aaîthîrie. Ningî kinya mantû jangî jamaingî nî joongeererwe ku.