Read KIMERU BIBLE PROTESTANT EDITION Jer 37 Bible Online

Jer 37 - KIMERU BIBLE PROTESTANT EDITION bible

Jer 37

¹ Zedekia mûtaana wa Josia nî aaetherue mûnene wa Juda nî Nebukadineza mûnene wa Babiloni antûûne a Jehoiakini mûtaana wa Jehoiakimu.

²Îndî Zedekia, na atongeeria baawe, na antû ba nthîgûrû îîu, bataathîkîîre nteto cia MWATHANI irîa kîroria Jeremia aaugaga.

³Mûnene Zedekia nî aatûmîre Jehukali mûtaana wa Shelemia, na mûthînjîri-Mûrungu Zefania mûtaana wa Maaseia, kîrî kîroria Jeremia bamwîra atîrî, “Tûrombere kîrî MWATHANI Mûrungu weetû.”

⁴Îgiita rîu Jeremia nî eetîkîrîîtue gûkaranîra na antû nîûntû ataarî akwiingîrwa ncheera.

⁵Nayo njûûrî ya Ababiloni barîa baacîgîîrîîtie Jerusalemu, baigua njûûrî ya Misri îkuuma Misri îîjîte, baratigana na gûcîgîîria Jerusalemu.

⁶MWATHANI nî aarîîrie kîroria Jeremia aramwîra ûjû:

⁷“Ûûni MWATHANI Mûrungu wa Israeli ndîkwîra wîre mûnene wa Juda ûrîa ûgûtûmîte wîja kûmûûrîria mantû kîrî ni, atî njûûrî ya Farao îrîa îreejîte kûmûteethia îrî akuî gûcoka Misri nthîgûrûûne yaao.

⁸Nabo Ababiloni bagacoka kaîrî baithûkîre ntûûra îîjî, bamîtae na bamîîthie.

⁹Ningî ndiuga ûjû: Bûgaciayia bûkiugaga, ‘Nî mma Ababiloni bagaatigana naatuî.’ Nîkwîthîrwa bo batîtigana naabuî.

¹⁰Ningî kinya bûkoomba njûûrî ya Ababiloni yonthe îrîa îbwithûkîrîte, gûgatigara akî antû barîa beekîri ngûma maemeene jaao, nîka bookîîra bakaîîthia ntûûra îîjî.”

¹¹Njûûrî ya Ababiloni nî yaatigatigîte gûcîgîîria Jerusalemu, nîûntû njûûrî ya Farao nî yaakuîîrîîtie ntûûra ya Jerusalemu.

¹²Jeremia nî aaumîre Jerusalemu areeta nthîgûrû ya Benjamini kwa antû baao aeewa rûgai rwaawe.

¹³Jeremia akiumagara ntûûra ya Jerusalemu na mpingîro îrîa yeetagwa Mpingîro ya Benjamini, mûkaria mpingîro ûmwe weetagwa Irija nî aagwatîre kîroria Jeremia aramûûria atîrî, “Nîka wîîtîte kwiringanîra na Ababiloni?” Irija aarî mûtaana wa Shelemia na Shelemia aarî mûtaana wa Hanania.

¹⁴Jeremia nawe aramûcokeria atîrî, “Bûu nî ûrongo. Ûûni ntîîtîte kwiringanîra na Ababiloni.” Îndî Irija ataamûthikîrîre. Aragwata Jeremia aramwikia kîrî atongeeria.

¹⁵Nabo atongeeria nî baathûûrîre mono nî Jeremia, baramûûra, na baramwiingîra nyomba ya Jonathani ûrîa waarî mwandîki, nîûntû nî yaarî îkweethua ncheera.

¹⁶Jeremia akwiingîrwa ncheera nî aakarîre ku ntukû inyiingî.

¹⁷Mûnene Zedekia nî aamûtûmanîîre, nawe Jeremia eeta mûnene aaramûgwata ûgeni. Mûnene aramûûrîria kûu nyomba yaawe withoone atîrî, “Kûrî u MWATHANI arakwîra?” Jeremia aramûcokeria, “Îî kûrî u.” Rîu areera mûnene atîrî, “Gwe ûkaanenkanîrwa kîrî mûnene wa Babiloni.”

¹⁸Jeremia nî oorîrie mûnene Zedekia atîrî, “Nî ûthûûku bûrîkû nkûthithîrîtie kana nthithîrîtie atongeeria baaku, kana antû baba tontû uugîîte mpiingîrwe ncheera?

¹⁹Iroria biaaku birîa biakûroragîria bikiugaga, ‘Mûnene wa Babiloni atîkwithûkîra na atiithûkîra nthîgûrû îîjî birîkû?’

²⁰Nandî ndakûromba ûnthikîîre, itû gwe mûnene mwathi waakwa. Igua îromba rîaakwa rîrîa ngûkûromba ndiinyiîtie. Ûkáreka ncokua ncheera nyomba ya mwandîki Jonathani ntîkeeje gûkuîra ku.”

²¹Tontû bûû, mûnene Zedekia ararita Waatho arauga Jeremia aingîrwe kîaragoone gîa akaria na arûmague mûgaate ntukû cionthe kuuma Njîreene ya Arugi ba Mîgaate mwanka rîrîa mîgaate îkaathira ntûûreene buru. Tontû bûû, Jeremia arakara kîaragoone gîa akaria.