Read KIMERU BIBLE PROTESTANT EDITION Jer 38 Bible Online

Jer 38 - KIMERU BIBLE PROTESTANT EDITION bible

Jer 38

¹Shefatia mûtaana wa Matani, na Gedalia mûtaana wa Pashuri, na Jukali mûtaana wa Shelemia, na Pashuri mûtaana wa Malikia nî baigîrue nteto irîa Jeremia eeraga antû bonthe.

²Jeremia aabeeraga MWATHANI augîîte atîrî, “Muntû ûrîa ûgaakara ntûûreene îîjî aakooragîrwa ndweene, kana ooragwe nî mpara, kana mîrimo. Îndî muntû ûrîa ûkaumagara eete kîrî Ababiloni atîûragwa. Akoonokia mwoyo jwaawe atûûre mwoyo.

³Ningî nî mma ntûûra îîjî îkaanenkanîrwa îtawe nî njûûrî ya mûnene wa Babiloni.”

⁴Nabo atongeeria bareera mûnene atîrî, “Muntû ûûjû nî ooragwe, nîûntû nî asikarî barîa batigeere ntûûreene akûthiria inya amwe na antû bonthe rîrîa akûbeera nteto ta iu. Nîkwîthîrwa muntû ûûjû tî wega bwa antû baba agûcwaa, îndî nî ûthûûku akûbacwîra.”

⁵Mûnene Zedekia arabeera atîrî, “Tîwe ûu, mûthithîrieeni ûrîa bûkwenda, ûûni mûnene ntîkararania naabuî.”

⁶Tontû bûû, barajûkia Jeremia baramûgera kîthimeene kîa Malikia mûtaana wa mûnene, kîrîa kîaarî kîaragoone gîa akaria. Nabo baratumîra mîkanda kwînamia Jeremia kîthimeene. Nakîo kîthima gîtaarî na rûûjî, nî ntaka akî yaarî ku. Jeremia nawe aroorokera ntakeene.

⁷Mwakûre Mûethiopia weetagwa Ebedimeleki ûrîa watûûraga gîkaro kîa mûnene nî aaigîrue atî Jeremia nî ageri kîthimeene. Mûnene nî akari nthî mpingîroone îrîa yeetagwa Mpingîro ya Benjamini.

⁸Ebedimeleki aareeta kwa mûnene aramwîra atîrî,

⁹“Itû mûnene mwathi waakwa, mantû jarîa jonthe antû baba bathithîrîtie kîroria Jeremia ja kûmûgera kîthimeene nî jamathûûku. Agaakuîra ku nî mpara nîûntû gûtî irio bitigeere ntûûreene.”

¹⁰Mûnene areera Mûethiopia ûu weetagwa Ebedimeleki atîrî, “Jûkia antû bathatû wîte nabo bûrite kîroria Jeremia kîthimeene mbere atîrakua.”

¹¹Tontû bûû, Ebedimeleki arajûkia antû bau areetania nabo gîkaro kîa mûnene, bareeta arîa nguû ciekagwa. Barajûkia nguû inthiru bareenamîria Jeremia cio kîthimeene na mîkanda.

¹²Ebedimeleki ûu Mûethiopia areera Jeremia atîrî, “Îkîra nguû inthiru nkuaa igwati nî mîkanda.” Jeremia arathithia u.

¹³Rîu barakuucia Jeremia na mîkanda îîu kuuma kîthimeene. Jeremia aratua gûkaraga kîaragoone gîa akaria.

¹⁴Mûnene Zedekia nî aatûmanîîre Jeremia aramûthagaanîra mpingîroone ya ithatû ya kîûrû. Mûnene areera Jeremia atîrî, “Nî nkwenda gûkûûria kîûria. Ncokeria ûtîkûmbitha ûntû.”

¹⁵Jeremia arooria mûnene Zedekia atîrî, “Ndakwîra anga gwe ûtîmbûraga? Kinya ndakwaa kîrîra, ûtîmbigua.”

¹⁶Zedekia araciîtîria Jeremia withoone aramwîra atîrî, “Ndîgûciîtîria riîtweene rîa MWATHANI ûrîa ûtûûraga mwoyo, we ûrîa watûûmbîre, atî, ntîkûûraga, kana nkûnenkanîra kîrî antû barîa bagûgûcwa bakûûraga.”

¹⁷Jeremia nî eerîre Zedekia atîrî, “MWATHANI Mweneinya, Mûrungu wa Israeli ariuga atîrî: wainenkanîra kîrî atongeeria barîa batumîkagîra mûnene wa Babiloni, ûgacaîrwa ûtîûragwa. Nayo ntûûra îîjî îtîîthua. Naagwe amwe na antû ba nja yaaku bûtîûragwa.

¹⁸Îndî warega kwinenkanîra kîrî atongeeria ba mûnene wa Babiloni, ntûûra îîjî îkaanenkanîrwa kîrî Ababiloni, nabo bakaamîîthia, naagwe ûtîonoka kuuma kîrî bo.”

¹⁹Mûnene Zedekia nî eerîre Jeremia atîrî, “Nî ngûkîra Ayahudi barîa bagwete Ababiloni mbaru nîûntû ndomba kûnenkanîrwa kîrî bo nabo bakanthithîria bûbûûî.”

²⁰Jeremia aramwîra, “Ûtînenkanîrwa kîrî bo. Nandî thikîîra kajû ka MWATHANI wigue ûrîa ngûkwîra. Naagwe ûkoona wega na ûtîûragwa.

²¹Îndî warega kwinenkanîra kîrî Ababiloni, mantû jagakarîka jarîa MWATHANI ambonetie na njîra ya kîoneki.

²²MWATHANI ambonetie aka bonthe barîa batigeere gîkaroone kîa mûnene wa Juda baumagarîtue gwikua kîrî atongeeria ba mûnene wa Babiloni. Nabo aka bau bakauga atîrî, ‘Acoore ba mûnene barîa eetîkua nî bakwaaîrîîtie, naagwe waaîrîka. Nandî magûrû jaaku joorokerete ntakeene nî bakwîrûkîrîte baamatûka.’

²³Aka beenu bonthe na aana beenu bonthe bakaumagarua baikue kîrî Ababiloni na kinya gwe gwengwa ûtîmatûka kuuma kîrî bo. Îndî nî kûgwatwa ûkaagwatwa nî mûnene wa Babiloni, na ntûûra îîjî îîthue.”

²⁴Mûnene Zedekia nîrîo eerîre Jeremia atîrî, “Ûkárekeeria muntû noo ûrîkû amenya mantû jau, naagwe rîu ûtîûragwa.

²⁵Atongeeria baigua nî nkwaragia naagwe bagaakwîra atîrî, ‘Twîre mantû jarîa wîrîte mûnene na jarîa akwîrîte na ûgátwitha ûntû kinya bûrîkû, naatuî rîu tûtîkûûraga.’

²⁶Bakûûria ûu naagwe ûbeere atîrî, ‘Nî îromba ndîrarombere mûnene ndiinyiîtie atî agáncokia kanyomba ka Jonathani kaîrî mbîta gûkuîra ku.’”

²⁷Nabo atongeeria bonthe nî beetîre kîrî Jeremia baramûûria ûntû bûu. Nawe arabacokeria o ûrîa mûnene aamwîrîte abacokerie. Tontû bûû, baratiga kûmwarîria nîûntû gûtî we waarî akwigua rwaria rwa mûnene kana Jeremia.

²⁸ Jeremia nî aakarîre kîaragoone kîa akaria mwanka ntukû îrîa ntûûra ya Jerusalemu yaataîrwe.