Read KIMERU BIBLE PROTESTANT EDITION Jer 39 Bible Online

Jer 39 - KIMERU BIBLE PROTESTANT EDITION bible

Jer 39

¹Kûrî mweri jwa îkûmi mwakeene jwa kenda jwa waathani bwa Zedekia mûnene wa Juda, Nebukadineza mûnene wa Babiloni na njûûrî yaawe yonthe nî beetîre baraithûkîra Jerusalemu baramîcîgîîria.

²Kûrî ntukû ya kenda ya mweri jwa îna, mwakeene jwa îkûmi na jûmwe jwa waathani bwa Zedekia, nthingo cia ntûûra ya Jerusalemu nî ciaakoborerwe.

³Ntûûra ya Jerusalemu yathiria gûtawa, atongeeria ba mûnene wa Babiloni bonthe beetîre barakara nthî Mpingîroone ya Gatîgatî. Nabo baarî Nerigali-sherezeri, na Samugarinebo, na Sarisekimu ûrîa waarî na ndaracha ya Rabusariri, na Nerigali-sherezeri ûrîa waarî na ndaracha ya Rabamagi, na atongeeria bangî bonthe ba mûnene wa Babiloni.

⁴Rîrîa Zedekia mûnene wa Juda na asikarî baawe bonthe boonere njûûrî îîu ya Babiloni, nî baamatûkîre. Baraumagara ntûûreene na ûtukû bareetîîra kamuundeene ka mûnene baratonyeera mpingîroone îrîa îrî gatîgatîîne ka nthingo ijîîrî, bareeta bwa rwanda.

⁵Îndî njûûrî ya Ababiloni îreengana nabo îragwatîra Zedekia bûûrîîne ya Jeriko. Nabo baramûjûkia baramwikia kîrî Nebukadineza mûnene wa Babiloni kûrîa aarî Ribula nthîgûrûûne ya Hamathi. Nebukadenezari aragiitîra Zedekia îgamba.

⁶Mûnene wa Babiloni arooragîra ataana ba Zedekia ntûûreene ya Ribula, Zedekia ategeete, na arooraga atongeeria ba Juda bonthe.

⁷Aracoka arakûûra Zedekia meetho na aramûtheeka aramwikia Babiloni.

⁸Nabo Ababiloni baraîîthia gîkaro kîa mûnene wa Juda na nyomba cia antû bangî, na barakoboranga nthingo cia Jerusalemu.

⁹Nebuzaradani ûrîa waarî mûtongeeria wa akaria ba mûnene arajûkia antû bangî barîa baatigeere ntûûreene arabaikia kîthamîrioone Babiloni. Barîa baikîrue Babiloni nî barîa bainenkanîrîte kîrî Nebukadineza na barîa baatigeere ntûûreene.

¹⁰Nebuzaradani ûu mûtongeeria wa akaria ba mûnene nî aatigîre thebe irîa itaarî na gantû nthîgûrûûne ya Juda, na ningî arabaa miuunda ya mîzabibû na ithaka.

¹¹Nebukadineza mûnene wa Babiloni nî eerîre mûtongeeria wa akaria baawe tawe Nebuzaradani mantû jegiî Jeremia aramwîra atîrî,

¹²“Jûkia Jeremia, ûmûmenyeere bwega na menya ûmûthithîria ûthûûku noo bûrîkû. Îndî mûthithagîrie jarîa agakwîrîra.”

¹³Tontû bûû, mûtongeeria wa akaria ba mûnene tawe Nebuzaradani, na Mebushazibani, mûtongeeria wa aakûre wa ndaracha ya Rabusariri, na Nerigali-sherezeri, ûrîa waarî na ndaracha ya Rabamagi, na atongeeria bangî bonthe ba mûnene wa Babiloni,

¹⁴baratûmana baikîrua Jeremia kîaragoone gîa akaria. Baranenkanîra Jeremia kîrî Gedalia mûtaana wa Ahikamu. Ahikamu mûtaana wa Shafani. Jeremia araikua nja yaawe. Jeremia nî aatûûranîrie na antû ba nja yaao.

¹⁵MWATHANI nî aarî akwaîrîria Jeremia, rîrîa aaingîri kîaragoone gîa akaria.

¹⁶MWATHANI aramwîra atîrî, “Îta wîre Ebedimeleki ûrîa Mûethiopia ûjû, ‘Ûûni MWATHANI Mweneinya, Mûrungu wa Israeli ndiuga ûjû: Atîrî, nkoojûrîa mîciîtio îrîa nciîtîtie yegiî ntûûra ya Jerusalemu. Mîciîtio îîu tî ya kûreetera ntûûra wega îndî nî ûthûûku. Naagwe ûkoona mîciîtio îîu îkîûjûra.

¹⁷Îndî gwe ngakwonokia ntukû îîu, nîu ûûni MWATHANI nkuuga. Gwe ûtînenkanîrwa kîrî antû barîa ûkîrîte.

¹⁸Nîkwîthîrwa nî mma ngakwonokia, ûtîûragîrwa ndweene. Îndî gwe ûkoonokia mwoyo jwaaku nîûntû nî ûmbîtîkîtie ni. Ûu nîu ûûni MWATHANI nkuuga.’”