Read KIMERU BIBLE PROTESTANT EDITION Jer 4 Bible Online

Jer 4 - KIMERU BIBLE PROTESTANT EDITION bible

Jer 4

¹MWATHANI ariuga atîrî, “Bûkëeja kwîthîrwa nî bûkwenda gûcoka kîrî ni buî Aisraeli, cokeeni kîrî ni. Ningî bwebia mîrungu ya mîng'uanano îrîa nthwîre, ndaatiga kûmîona, rîu bûtîta njîra kaîrî.

²Ningî bûkoombaga gûciîtagia na mma, na waagîru bûkiugaga, ‘O ta ûrîa MWATHANI arî mwoyo!’ Nayo mîgongo îngî îkaatharimîkaga nîûntû bwaakwa. Nayo îgaankumagia.”

³ Nîkwîthîrwa MWATHANI arîîra antû ba Juda na atûûri ba Jerusalemu atîrî, “Rîmeni miuunda yeenu îrîa îtîrîmi na bûkándeni miigueene.

⁴Rutaano nî rwano rwa kîrîkanîro gîaakwa naabuî; nîûntû bûu ririkaneni kûûjûragia kîrîkanîro kîu. Thithagieni ûu buî antû ba Juda na atûûri ba Jerusalemu, bûtîkëeje gûtûrîkîrwa nî mûthûûro jwaakwa ta mwanki, jûîîthia jûtîkwona wa kûjworia nîûntû bwa ûthûûku bwa mathithio jeenu.”

⁵Tûmîîrieni Juda na Jerusalemu buuge atîrî, “Ringeni tarumbeta nthîgûrû kunthe bûtûmîîrie na kajû buuge, ‘Ûthûraneeni twîte ntûûreene irîa mbirigîre!’

⁶Ûkîîrieni bendera îrî rwano yeerekerete Jerusalemu! Matûkeeni bûgaciithe na bûkäthaa. Nîkwîthîrwa nî ndeeteete ûthûûku na winyangia bûbûnene kuuma bwa ûrîo.

⁷Ngatûnyi nî yuumîte kîmamoone kîaayo, mwînyangia wa mîgongo nî aumagarîte nawe aumîte arîa akaraga, nîkenda athûûkangia nthîgûrû yeenu. Nacio ntûûra cieenu igatuîka maganjo jatîtûûri nî antû.

⁸Tontû bûû, îkîreeni mathango, bûrîre na bwithikîîre, nîkwîthîrwa mûthûûro jwa MWATHANI nî jûmûnene na jûtîtiganîte naatuî.”

⁹MWATHANI nî augîre atîrî, “Ntukû îîu yakinya anene na atongeeria bakaathirîrwa nî ûchamba. Athînjîri-Mûrungu bakaarigara nabio iroria bikare bing'ethetie nî kûrigara.”

¹⁰Rîu naani ndîrauga, “Ai, MWATHANI Mûrungu, ûkwagia antû baba ba Jerusalemu buru. Ûraugîîte gûkeethîrwa kûrî na thîîrî, îndî nîka bengeeretie kûthirua na rûchiû.”

¹¹Ningî îgiita nî rîîjîte, rîrîa antû baba ba Jerusalemu bakeerwa, “Kûrî ruuo rwa mwanki ruumîte irîmeene birîa bitî mîtî bia rwanda, rwîjîte kîrî antû baakwa. Naru rûtîîjîte nîkenda rûtumîrwa kwera into îtîîrine kana nîkenda rûbitheria,

¹²îndî ndwîrîte rwîje rûneenei mono. Nandî nî ni nkuuga bagaakanûkua.

¹³Atîrî, mûnthû agakwînamîîra eeje ta matu, nacio ngaarî ciaawe cia ndwaa ikwîjîîre ta kîbubani. Mbarathi ciaawe ikethagîrwa irî mpwîî nkûrûki ya ndiiû. Wûi naanû, tûkûthira!

¹⁴Itû antû ba Jerusalemu thambieni nkoro cieenu ûthûûku nîkenda bwonokua. Nî mwanka rî bûgakara bûkîthûgaanagia mantû jamaaî?

¹⁵Kûrî kajû gagûtûmîîria kaumîte Dani gakîîranaga nteto itî injega kuuma irîmeene bia Efuraimu.

¹⁶Atîrî, mîgongo nî îmenyithue, nayo Jerusalemu îîrwe: Amaitha baumîte nthîgûrû ya kûraaja, nabo bakaithûkîra ntûûra cia Juda.

¹⁷Nabo bakathiûrûkîra Jerusalemu ta akaria bakarîtie muunda, nîûntû nî îregeete kûmbathîkîra, nîu MWATHANI akuuga.

¹⁸Nî mîîtîre yaaku na mathithio jaaku bikûretereete mantû jaja. Îîu nîyo mîthangîko yaaku îrî na ûrûrû mono, nayo nî îkûmuntîte nkoro.”

¹⁹Wûi rwakaî, ndî na rwakaî! Nkûgirîka buru nî ûrûrû! Wûî ûrûrû nkoroone yaakwa. Nkoro nî îgûmpûûra mono ndeene. Naani ntîûmba gûkira tontû nîndîkîîtie kwigua kajû ka ngoji cia ndwaa.

²⁰Ûthûûku bûthingatanîte na ûthûûku bûngî nthîgûrû yonthe yathirua buru. O ntûti tûgaanda twaakwa twathirua nacio nanga ciaakwa ciatambûrangwa tûchunchî.

²¹Nî mwanka rî ngakara nkîonaga rwano rwa ndwaa, nkare nkiigagua ngoji cia ndwaa?

²²MWATHANI ariuga, “Antû baakwa nî biaa, bo batîmbijî. Nî aana mpaku, batî ûûme. Bo baijî akî kûthithia ûthûûku îndî batîmenyaga kûthithia wega.”

²³Ndaaraithîîria nthîgûrû, yaarî întheri na îtarî mwonekere, ndaaraithîîria îgûrû, gûtî weerû bwaarî ku.

²⁴Ndaikia meetho irîmeene rî, ndoona bikiinaina, natu tûrîma tûkîenyeenya kuuma rûteere rûmwe gwîta rûngî.

²⁵Keke, ndaaraithîîria, gûtî muntû nkwona! Ningî kinya nyoni cia îgûrû ciaarî ikûmatûka.

²⁶Ndaategeera rî, nthîgûrû îrîa îraanori îtuîkîte rwanda, na ntûûra ciaayo ciaaethua maganjo mbere ya MWATHANI, nîûntû bwa mûthûûro jwaawe jûmûnene.

²⁷MWATHANI ariuga ûjû, “Nthîgûrû yonthe îkeenyangua, îndî ntîmîthiria buru.

²⁸Tontû bûû, nthîgûrû îkaithikîîra, na kinya îgûrû rîkaithikîîra rîgîe muundu. Tontû bûû, jau ndauga nîjo nkwenda, na ntîugûka kana ntigana najo.

²⁹Antû ba ntûûra cionthe nabo bakaamatûka baigua gîtuma kîa eetithia mbarathi na kîa arathi na mîgwî. Nabo antû bakamatûka beete ithakeene, bangî baitie ndwareene cia maiga. Nacio ntûûra cionthe igaatigwa irî intheri, itî na muntû noo ûmwe.

³⁰Gwe Jerusalemu ûkûthira, nîatîa ûkaathithia? Kinya weekira nguû intuune, na kinya waigemia na thaabu, na waagemia meetho na rangi, waigemia ûtheri nîûntû anyaanya baaku nîka bagakûmeneeria bakîendaga gûkûrita mwoyo.

³¹Nî mbigîtue kajû gakarî ta ka mûka ûkwaruunya, gûkaya gwaako gûkarî ta kwa mûka ûkûewa kaana rîa mbere. Nako nî kajû ka Jerusalemu îciûmîtie gwikia mîrukî, îtaambûrûkîtie njara îkiugaga, ‘Wûi nkûthira! Ndî akuî kûgirîkîra mbere ya barîa bakûmbûraga.’”