Read KIMERU BIBLE PROTESTANT EDITION Jer 40 Bible Online

Jer 40 - KIMERU BIBLE PROTESTANT EDITION bible

Jer 40

¹Nyuma Nebuzaradani ûrîa mûtongeeria wa akaria ba mûnene kûrekeeria Jeremia arî ntûûreene ya Rama, MWATHANI nî aarîîrie Jeremia. Jeremia aarî agwikua kûu atheeki arî amwe na atae bangî bonthe ba Jerusalemu na Juda barîa bathaamîîrue nthîgûrûûne ya Babiloni.

²Mûtongeeria ûu wa akaria ba mûnene arairebia Jeremia aramwîra atîrî, “MWATHANI Mûrungu waaku nîwe waugîre akathithîria gûntû gûkû bûbûûî.

³Nandî MWATHANI akûthithia ûrîa augîîte. MWATHANI athithîtie mantû jau nîûntû buî nî bweîrie kîrî MWATHANI na bûrarega kûthikîîra kajû kaawe. Nîkîo gîtûmîte ûntû bûbû bûbwîjîîra.

⁴Nandî rî, naarua ngûkûthaûra njara mînyororo. Woona kûbui wîtania naani Babiloni wîtanie naani, ngaakûmenyeera bwega. Woona gûtîbui gwîtania naani Babiloni, ûgéeta. Atîrî, tîîjî nthîgûrû yonthe îrî mbere yaaku, thuura kûrîa ûkwenda gwîta, kûrîa ûkwona kûbui gwîta.

⁵“Wathuura gûtigwa, ûcoke kîrî Gedalia mûtaana wa Ahikamu mûtaana wa Shafani, ûrîa ûthuuri nî mûnene wa Babiloni aa mûtongeeria wa ntûûra cia Juda, bûtûûranie nawe amwe na antû bangî. Kana wîte kûrîa ûkwona nîku gûkwagîrîte.” Tontû bûû, mûrûngamîîri wa akaria aranenkera Jeremia irio na kîewa, aramûrekeeria areeta.

⁶Jeremia areeta ntûûreene ya Mizipa kîrî Gedalia mûtaana wa Ahikamu gûtûûrania nawe amwe na antû barîa baatigeere.

⁷ Nabo Atongeeria ba njûûrî bonthe barîa baarî bûûrîîne na asikarî baao barîa bataarî bakwinenkanîra kîrî Ababiloni, nî baigîrue atî mûnene wa Babiloni akûthuura Gedalia mûtaana wa Ahikamu atuîka mûtongeeria nthîgûrûûne. Nîwe wanenkeri waatho bwa kwatha arûme, na aka, na twaana, na thebe irîa itaarî na ithaka nthîgûrûûne irîa itaarî igwikua kîthamîrioone Babiloni.

⁸Ishimaeli mûtaana wa Nethania, na Johanani mûtaana wa Karea, na Seraia mûtaana wa Tanihumethi, na ataana ba Efai ûrîa mûnetofa, na Jezania mûtaana wa Mumaakathi, amwe na asikarî baao nî beetîre ntûûreene ya Mizipa barainenkanîra kîrî Gedalia.

⁹Gedalia mûtaana wa Ahikamu, Ahikamu ûrîa mûtaana wa Shafani, araciîtîria atongeeria bau na antû baao arabeera atîrî, “Bûgákîra gûtumîkîra Ababiloni. Kareeni nthîgûrûûne bûtumîkîre mûnene wa Babiloni, naabuî bûgakara bwega.

¹⁰Îndî ni ngatûûra Mizipa mbwaragîîrie kîrî Ababiloni rîrîa beeja gûkû. Îndî buî thithagieni ndibei na bûtuujage matuunda ja îgiita rîa mûû, na maguta bûbiîke bwega. Ningî bûtûûre ntûûreene irîa bûtaîte.”

¹¹Ningî kinya Ayahudi bonthe barîa baarî Moabu, na barîa baatûûranagia na Aamoni, na barîa baarî Edomu, na nthîgûrûûne ingî, nî baigîrue atî mûnene wa Babiloni nî aatigarîîtie antû bamwe ba Juda, na atî nî aathuurîte Gedalia mûtaana wa Ahikamu, Ahikamu ûrîa waarî mûtaana wa Shafani, aa mûrûngamîîri wa antû bau.

¹²Nabo Ayahudi bau bonthe baracoka nthîgûrûûne ya Juda kuuma gûntû kunthe kûrîa baarî bakwîngîîrua. Baracoka ntûûreene ya Mizipa kîrî Gedalia. Ningî barathithia ndibei, na gûtua matuunda jamaingî ja îgiita rîa mûû.

¹³Johanani mûtaana wa Karea na atongeeria bangî ba njûûrî bonthe barîa baarî bûûrîîne nî beetîre ntûûreene ya Mizipa kîrî Gedalia.

¹⁴Nabo bareera Gedalia atîrî, “Nî ûkûmenya Baalisi mûnene wa Aamoni nî atûmîte Ishimaeli mûtaana wa Nethania kenda akûûraga?” Îndî Gedalia mûtaana wa Ahikamu ataabeetîkîrie.

¹⁵Nîrîo Johanani mûtaana wa Karea aarîîrie Gedalia na witho kûu Mizipa aramwîra atîrî, “Ka mbîte mbûrage Ishimaeli mûtaana wa Nethania na witho na gûtî muntû ûkaamenya. Arîenda gûkûûraga nîkenda Ayahudi bonthe barîa boothûranîte kîrî gwe baanyaganua na antû ba Juda barîa batigeere bathirua?”

¹⁶Îndî Gedalia mûtaana wa Ahikamu areera Johanani mûtaana wa Karea atîrî, “Menya ûthithia ûntû ta bûu nîûntû gwe nteto irîa ûkwaria ciegiî Ishimaeli tî cia mma.”