Read KIMERU BIBLE PROTESTANT EDITION Jer 41 Bible Online

Jer 41 - KIMERU BIBLE PROTESTANT EDITION bible

Jer 41

¹ Kûrî mweriine jwa mûgwanja Ishimaeli mûtaana wa Nethania, Nethania mûtaana wa Elishama amwe na antû îkûmi nî beetîre ntûûreene ya Mizipa kîrî Gedalia mûtaana wa Ahikamu. Ishimaeli nîwe waarî mûrûngamîîri wa atongeeria ba mûnene. Nabo bakîrîjagîra irio kûu ntûûreene ya Mizipa,

²Ishimaeli na antû bau baawe îkûmi nî booragîre Gedalia mûtaana wa Ahikamu, Ahikamu mûtaana wa Shafani. Baamuntîre Gedalia na rûchiû arakua nîûntû nîwe waathuuri nî mûnene ûu mûnene wa Babiloni aa mûrûngamîîri wa nthîgûrû ya Juda.

³Ningî Ishimaeli nî ooragîre Ayahudi barîa baarî amwe na Gedalia kûu ntûûreene ya Mizipa, o na kinya asikarî Ababiloni barîa baarî au.

⁴Rûûneene rwa ntukû îîu Gedalia ooragîrwe, mbere ya muntû noo ûrîkû amenya mantû jau,

⁵antû mîrongo înana nî baaumîre ntûûreene ya Shekemu, na ya Shilo, na ya Samaria beenjeete ireru, na batambûrangîte nguû, na baitemangîte mîîrî, kwonania kwithikîîra. Beetîte kûrita igongwana bia irio, na bia ubaani kîûrûûne.

⁶Ishimaeli mûtaana wa Nethania araumagara ntûûreene ya Mizipa areeta kûthagaana antû bau akîrîraga. Rîrîa aakinyîre arîa baarî arabeera atîrî, “Kûrûkeeni bûkoone Gedalia mûtaana wa Ahikamu.”

⁷Nabo baakinya ntûûreene, Ishimaeli mûtaana wa Nethania amwe na asikarî baawe barooraga antû bau beejîte, baragera mîîrî yaao kîthimeene.

⁸Îndî kîrî antû bau beetîte ntûûreene ya Mizipa, nî kwaarî antû îkûmi. Nabo nî beerîre Ishimaeli atîrî, “Ûgátûûraga nîûntû nî twithîte nkano, na mûnyaki, na maguta, na nainchû miuundeene.” Tontû bûû, Ishimaeli atabooragîre.

⁹Ishimaeli nawe agerere mîîrî ya antû bonthe barîa ooragîre kîthimeene kîrîa kînene kîrîa kîeenji nî mûnene Asa nîkenda kîaa giitiiro aithûkîrwa nî Baasha mûnene wa Israeli. Ishimaeli mûtaana wa Nethani oojûrîrie kîthima kîu na biimba.

¹⁰Ningî Ishimaeli nî aataîre antû bonthe barîa baarî Mizipa. Arataa aarî ba mûnene na antû bonthe barîa baarî Mizipa barîa banenkanîri kîrî Gedalia mûtaana wa Ahikamu nî mûtongeeria wa akaria Nebuzaradani. Ishimaeli mûtaana wa Nethania aataîre antû bau areeta nabo nthîgûrûûne ya Amoni.

¹¹Îndî Johanani mûtaana wa Karea na atongeeria bangî ba njûûrî bonthe nî baigîrue ûthûûku bunthe bûrîa Ishimaeli mûtaana wa Nethania aathithîtie.

¹²Nabo baroothûrania njûûrî ciaao bareeta kûrwaa na Ishimaeli mûtaana wa Nethania. Bareeta baramûgwatagwatîra karieene karîa kaarî Gibeoni.

¹³Nabo antû bonthe barîa baarî amwe na Ishimaeli rîrîa boonere Johanani mûtaana wa Karea na atongeeria ba njûûrî bonthe barîa baarî amwe nawe nî baagwîrîrue mono.

¹⁴Tontû bûû, antû bonthe barîa Ishimaeli aataîte kuuma Mizipa baragarûka baracoka kîrî Johanani mûtaana wa Karea.

¹⁵Îndî Ishimaeli amwe na antû banaana baramatûka kuuma kîrî antû ba Johanani bareeta kîrî Amoni.

¹⁶Rîu, Johanani mûtaana wa Karea na atongeeria ba njûûrî bonthe bareetania na antû bangî bonthe barîa Ishimaeli mûtaana wa Nethania aataîte kuuma Mizipa nyuma ya kûûraga Gedalia mûtaana wa Ahikamu. Johanani aracokia asikarî, na aka, na twaana, na aakûre barîa baatai nî Ishimaeli ntûûreene ya Gibeoni.

¹⁷Nabo bareeta barakara Geruthi Kimuhamu akuî na Bethlehemu bakîendaga gwîta Misri,

¹⁸nîûntû nî baakîraga Ababiloni. Nîkwîthîrwa Ishimaeli mûtaana wa Nethania nî ooragîre Gedalia mûtaana wa Ahikamu ûrîa mûnene wa Babiloni aaethetie mûrûngamîîri wa nthîgûrûû ya Juda.