Read KIMERU BIBLE PROTESTANT EDITION Jer 42 Bible Online

Jer 42 - KIMERU BIBLE PROTESTANT EDITION bible

Jer 42

¹Nabo atongeeria ba njûûrî bonthe, na Johanani mûtaana wa Karea, na Azaria mûtaana wa Hoshaia, na antû bonthe kuuma barîa aniini buru mwanka barîa anene, nî beetîre kîrî kîroria Jeremia.

²Nabo baramwîra atîrî, “Itû îtîkîîria gûtûrombera kîrî Mûrungu waaku, ûtûrombere tuî antû baba bonthe batigeere. Tontû twaarî antû babaingî, îndî nandî tûtigarîte babakai o ta ûrîa ûkwona.

³Tûrombere nîkenda MWATHANI Mûrungu waaku atwonia mîîtîre îrîa tûkaathingata ya gwîta nayo na ûrîa tûkaathithia.”

⁴Kîroria Jeremia arabeera atîrî, “Nkwigua îromba rîeenu. Atîrî, nkaabûrombera kîrî MWATHANI Mûrungu weenu o ta ûrîa bûkwenda. Naani nkabûcokeria ûrîa MWATHANI akabwîra, na gûtî bu nkabwitha.”

⁵Nabo baareera Jeremia atîrî, “MWATHANI arotûgiitîra îgamba bûbûûî tuî twarega kûthithia mantû jonthe jarîa MWATHANI Mûrungu waaku agaagûtûma ûtwîra.

⁶Kinya ûntû bûu bwethîrwa bûrî bûbwega kana bûbûûî tûkaabûthithia; twathîkîre MWATHANI Mûrungu weetû, ûu tûgûgûtûma kîrî we, nîkenda naatuî twona wega twamwathîkîra.”

⁷Nyuma ya ntukû îkûmi kuuma rîrîa antû beerîre Jeremia abarombere, MWATHANI nî aarîîrie Jeremia.

⁸Jeremia nî eetîre Johanani mûtaana wa Karea, na atongeeria ba njûûrî bonthe barîa baarî amwe nawe, na antû bonthe kuuma ûrîa mûnini buru mwanka ûrîa mûnene.

⁹Jeremia arabeera atîrî, “MWATHANI Mûrungu wa Israeli ûrîa bûrantûmîte kîrî we nîkenda mwîra îromba rîeenu ariuga ûjû:

¹⁰Buî bwakara nthîgûrûûne îîjî, naani nkabwaka na ntîbûtharia. Nkabwaanda na ntîbûkûûra. Nî ndiithikîrîte nîûntû bwa ûrîa ndaabûthithîîrie bûbûûî.

¹¹Menya bûtemûka nîûntû bwa mûnene wa Babiloni ûrîa bûgûkîra. Menya bûmûkîra nîûntû nkethagîrwa ndî amwe naabuî mbwonokagie na bûtuunyûkagie kuuma kîrî we. Ûu nîu ûûni MWATHANI nkuuga.

¹²Nkabwigîîrua kîaao ntûme mûnene ûu abwigîîrua kîaao abûrekeeria bûtûûre nthîgûrûûne yeenu yongwa.

¹³“Îndî buî menya buuga, ‘Tûtîkara nthîgûrûûne îîjî,’ naabuî bûrega kwathîkîra MWATHANI Mûrungu weenu.

¹⁴Menya buuga, ‘Arî nîka tûgeeta nthîgûrûûne ya Misri kûrîa gûtîîthîrwa kûrî na ndwaa, kana twigua tarumbeta cia ndwaa îkîgamba, kana twaga irio, tûgatûûre ku.’

¹⁵MWATHANI Mweneinya Mûrungu wa Israeli arîbwîra ûjû buî antû ba Juda barîa bûtigeere: Bwethîrwa buugîîte na mma atî bûgeeta Misri gûtûûra ku,

¹⁶ndwaa îrîa bûgûkîra îkaabûthirîria kûu nthîgûrûûne ya Misri. Kinya mpara îrîa bûgûkîra îkaabûrîîra Misri mono. Ningî kûu nîku bûgaakuîra.

¹⁷Antû bonthe barîa bagacoka Misri gûtûûra ku, bakooragîrwa ndweene, na booragwe nî mpara na nî mîrimo. Nabo batîona muntû wa gûtigara kana wa gûteetha kuuma ûthûûkuune bûu nkabareetera.”

¹⁸Nîkwîthîrwa MWATHANI Mweneinya, Mûrungu wa Israeli ariuga atîrî, “O ta ûrîa mûthûûro jwaakwa na marûrû jaakwa jaatûrîkîîre antû barîa batwîre Jerusalemu, nîu mûthûûro jwaakwa jûgatûrîkîra antû barîa bagaacoka Misri. Nabo bagakara ta gîntû gîkîthûûku, na ta gîntû gîa kûmakania, na ta gîntû gîkîrume, na ta gîntû gîa kûmeneerua. Naabuî bûtîkorocoka kwona gûntû gûkû kaîrî.”

¹⁹Buî antû ba Juda barîa batigeere MWATHANI arîbwîra atîrî, “Bûgéeta Misri. Menyeni na mma naarua nkûbûkaania

²⁰bûtîkaathithie yaatia rîrîthûûku. Nîkwîthîrwa nî buî bûraantûmîte kîrî MWATHANI Mûrungu weenu bwambîîra, ‘Tûrombere kîrî MWATHANI Mûrungu weetû, nabu ûntû bunthe bûrîa MWATHANI Mûrungu weetû, agakwîra ûtwîre, tûkabûthithia.’

²¹Naani naarua îîjî nkûbwîra mantû jonthe jarîa MWATHANI Mûrungu weenu araambîrîte mbwîre. Îndî gûtî noo bûmwe bwaajo bûrathîkîra.

²²Nandî menyeni na mma atî no mwanka bûûragîrwe nthîgûrûûne îîu bûkwenda gwîta gûtûûra. Naabuî bûkooragîrwa ndweene, na bûûragwe nî mpara na bûûragwe nî mîrimo.”