Read KIMERU BIBLE PROTESTANT EDITION Jer 43 Bible Online

Jer 43 - KIMERU BIBLE PROTESTANT EDITION bible

Jer 43

¹Jeremia nî eerîre antû bonthe nteto irîa cionthe MWATHANI Mûrungu waao aamûtûmîte abeera.

²Rîu, Azaria mûtaana wa Hoshaia, na Johanani mûtaana wa Karea, na antû barîa aikumia bonthe bareera Jeremia atîrî, “Nî ûrongo ûkwaria. MWATHANI Mûrungu weetû atîgûtûmîte ûtûkaania gwîta gûtûûra Misri.

³Îndî gwe nî Baruku mûtaana wa Neria ûgûtûmîte nîkenda ûtûthûûkia ûtûnenkanîra kîrî Ababiloni nîkenda batûûraga kana batwikia kîthamîrioone Babiloni.”

⁴Tontû bûû, Johanani mûtaana wa Karea, na atongeeria ba njûûrî bonthe, na antû bangî bonthe nî baaregere kwathîkîra MWATHANI, bakara nthîgûrûûne ya Juda.

⁵Îndî Johanani mûtaana wa Karea na atongeeria bonthe ba njûûrî, nî baajûkîrie antû barîa bonthe batigeere nthîgûrûûne ya Juda barabaikia Misri. Antû bau nîbo barîa baarî bagûcoka gûtûûra nthîgûrûûne ya Juda kuuma mîgongoone yonthe îrîa baarî bagwikua kîthamîrioone.

⁶Barajûkia arûme, na aka, na twaana, na aarî ba mûnene. Ningî barajûkia antû bonthe barîa Nebuzaradani mûtongeeria wa akaria aarî agûtiga ûkarieene bwa Gedalia mûtaana wa Ahikamu. Ahikamu aarî mûtaana wa Shafani. Ningî barajûkia kîroria Jeremia na Baruku mûtaana wa Neria.

⁷Nabo bararega kwathîkîra MWATHANI bareeta barakinya ntûûreene ya Tahapanehesi nthîgûrûûne ya Misri.

⁸MWATHANI nî aarîîrie Jeremia arî kûu ntûûreene ya Tahapanehesi aramwîra atîrî,

⁹“Jûkia maiga jamanene ûjaithe mûthetuune jwa yûmba au kajîreene gîkûrûkîîroone kîa gîkaro kîaa Farao, kûu Tahapanehesi antû ba Juda bategeete.

¹⁰Wîre antû bau atîrî, ‘Ûûni MWATHANI Mweneinya, Mûrungu wa Israeli ndiuga ûjû: ngatûma nthûûmba yaakwa Nebukadineza mûnene wa Babiloni eeje arûngîke rûriga rwaawe rwa ûnene maigeene jau waitha au. Naani ngaataambia ûnene bwaawe bûkunîke maiga jau.

¹¹Nebukadineza ageeta aithûkîre nthîgûrû ya Misri. Nabo antû bamwe bakooragwa nî mîrimo, na bangî baikue kîthamîrioone, na bangî booragîrwe ndweene.

¹²Ningî akaaîthia biûrû bia mîrungu ya Misri. Acoke ajûkie mîrungu îîu amiikie kîthamîrioone. O ta ûrîa muntû aritaga ndaa nguûne ciaawe, nîu Nebukadineza akaarita antû Misri, aane arî kiindajî.

¹³Ningî akaamomoranga itugî birîa birombagwa birî mîrungu ya mîng'uanano birî ntûûreene ya Heliopolisi, kûu nthîgûrûûne ya Misri. Acoke aîthie biûrû bia mîrungu ya mîng'uanano kûu Misri.’”