Read KIMERU BIBLE PROTESTANT EDITION Jer 46 Bible Online

Jer 46 - KIMERU BIBLE PROTESTANT EDITION bible

Jer 46

¹MWATHANI nî aarîîrie kîroria Jeremia mantû jegiî mîgongo îngî.

² Kwambîrîria na Misri aramwîra mantû jegiî njûûrî ya Farao Neko mûnene wa Misri. Njûûrî îîu nîyo yoombîîrwe ndweene rûteere rwa mûuro jwa Eufurate ntûûreene yetagwa Karikemishi, nî Nebukadineza mûnene wa Babiloni. Njûûrî îîu yoombîîrwe mwakeene jwa îna jwa waathani bwa Jehoiakimu, mûnene wa Juda, mûtaana wa Josia. Nteto iji nîcio MWATHANI augîre:

³“Thuranîreeni rong'o inene na iniini, bwîte ndweene!

⁴Tandîkeeni mbarathi na eetithia cio baciitie! Ibangeeni bûthingateene bwîkîrîte nkobia cia chuuma. Nooreni matumo, bwîkîre nguû cia chuuma kîbara!”

⁵MWATHANI arîûria “Nîmbi nkwona? Ndîona bacokeete bwa nyuma nîûntû nî boombi ndweene. Nchamba ciaao cia ndwaa ikûûmbwa nacio ikûmatûka ciaûra buru; itîgûtega nyuma nî ûguaa nîûntû imakîîtue nteere cionthe! Nîu ûûni MWATHANI nkuuga.

⁶Barîa barî rwîro batîkûûmba kûmatûka, kana nchamba ciiteethia; narîa bwa ûrîo mûuroone jwa Eufurate nî nao bagiitarîrîte bagwa.

⁷Nî mûgongo jûrîkû jûjû jûciûkîîrîîtie ûjû jwimbîte ta mûuro jwa Naili? Ta rûûjî rwa mûuro juunîkarîte?

⁸Nî Misri iimbîte ta mûuro jwa Naili, ta rûûjî rwa îkondoria juunîkarîte. Misri yuugîîte, ‘Nkaaimba mbûjûre nthîgûrû yonthe; nkaathiria ntûûra na antû baacio.

⁹Buî mbarathi itû îteeni ndweene! Naabuî ngaarî cia ndwaa îtangeeni na mpwîî. Nchamba cia ndwaa nî ciumîre, nchamba kuuma Ethiopia na Libia ciume irî na rong'o na nchamba kuuma Ludi irîa ciijî kûratha na moota.’”

¹⁰Îîjî nîyo ntukû ya MWATHANI Mûrungu Mweneinya nîju mûthenya jwa kwirîîria, nîkenda Mûrungu airîîria kîrî anthû baawe. Rûchiû rwaawe rûkabarîa rûnyire na rûnyue tharike ya bo mwanka rûng'anie. Nîkwîthîrwa MWATHANI Mûrungu Mweneinya nî aaeethetie anthû baawe kîgongwana kûu nthîgûrûûne ya bwa ûrîo rûteere rwa mûuro jwa Eufurate.

¹¹Antû ba Misri îteni Gileadi bûgacwee ndawa! Mîtheega yeenu yonthe nî ya ûtheri îtîûmba kûbworia.

¹²Mîgongo îngî nî iigîîtue ûrîa bwîkîri nthao, nayo nthîgûrû yonthe yaigua kîrîro kîeenu. Tontû nchamba ya ndwaa îrîgwîra nchamba îngî na cio-ijîîrî ikamunta nthî.

¹³ MWATHANI nî aarîîrie kîroria Jeremia mantû jegiî Nebukadineza, mûnene wa Babiloni ûrîa akaithûkîra nthîgûrû ya Misri. Aramwîra atîrî,

¹⁴“Tûmîîria kûu Misri, kûu ntûûreene ya Migidoli, ûmenyithanie mantû kûu ntûûreene ya Memufisi na Tahapanehesi, uuge, ‘Ithuranîreni bwikarie nîûntû bionthe birîa bûrî nabio bikathirîrua ndweene.’

¹⁵Nîkî tontû mûrungu jweenu jûrîa jwîtagwa Apisi jûroombîrwe ndweene? Nîkwîthîrwa MWATHANI nîwe ûraajûûmbîre ndweene.

¹⁶Asikarî beenu bagiitarîte baagwa nabo barîîrana atîrî, ‘Tûûkîreeni tûcoke kîrî antû beetû, twîte nthîgûrûûne îrîa twaciarîrwe tûmatûke tûtîkooragwe nî anthû!’

¹⁷Îteeni Farao mûnene wa Misri riîtwa bûmwîte ‘Kîgogo nîûntû bwa gîtuma kîaawe gîkiingî na nîûntû bwa kûrega gûtumîra îgiita rîaawe bûbwega.’

¹⁸Ûûni MWATHANI Mweneinya, nî ni mûnene wa mma, o ta ûrîa kîrîma gîa Tabori kîthûngûkîte nkûrûki ya irîma bingî na o ta ûrîa kîrîma gîa Karimeli kîrî rûteere rwa îria ûu nîu mûnthû ûrîa ûkaabwithûkîra akeethîrwa akari.

¹⁹Ithuranîreni buî antû ba Misri nîûntû bûgatawa buikue kîthamîrioone. Nayo ntûûra ya Memufisi îkaaethua îgaanjo rîtîtûûri nî muntû.

²⁰Misri îkari ta mwari înthongî ya ng'ombe îndî îkaithûkîrwa nî kîbûga kuuma bwa ûrîo.

²¹Kinya asikarî baayo ba gûkombora bakari ta tûregwa tûnoreetue; batairikîîrie ndweene nîka baamatûkîre. Nîkwîthîrwa îgiita rîaao rîa gûkanûkua nî rîaarî rîgûkinya.

²²Misri îmatûkîte îkîringaga kanyua ta njoka, nîûntû anthû baayo beenganîte naayo mono barî na mathoka ta atemi ba mîtî,

²³beetîte gûtema mwitû jwaayo jûmûnene kinya këethîra antû baayo nî babaingî ûrîa batîtarîka, na asikarî baao baingîîte ta ngigî. Ûu nîu ûûni MWATHANI nkuuga.

²⁴Antû ba Misri bageekîrithua nthao banenkanîrwa kîrî anthû baao ba kuuma bwa ûrîo.”

²⁵MWATHANI Mweneinya, Mûrungu wa Israeli ariuga atîrî, “Ngakanûkia Amoni mûrungu jwa ntûûra ya Thebesi, amwe na Misri na mîrungu yaayo, na anene baayo, na nthirie barîa beerîgîîrîte mûnene wa Misri abateethia.

²⁶Nkaabanenkanîra kîrî barîa bakûbacwaa babathiria. Mbanenkanîre kîrî Nebukadineza, mûnene wa Babiloni, na atongeeria ba njûûrî yaawe. Nyumeene, Misri îgatûûrwa o kaîrî o ta ûrîa yaatûûri mbereene. Ûu nîu ûûni MWATHANI nkuuga.”

²⁷ “Buî nthûûmba ciaakwa nchiarwa cia Jakubu, menya bûkîra, kana bûmakua buî Aisraeli. Nîkwîthîrwa nkaabwonokia kuuma nthîgûrû ya kûraaja na mbonokie nchiarwa cieenu kuuma nthîgûrûûne irîa bathaamîrîîtue. Antû ba Israeli bagacoka batûûre thîîrieene, na gûtî muntû ûkabamakia kaîrî.

²⁸MWATHANI arabeera atîrî, Menya bûkîra buî nthûûmba ciaakwa nchiarwa cia Jakubu nîûntû ndî amwe naabuî. Nkathiria mîgongo yonthe kûrîa ndaabwîngîrîrie bûreeta îndî buî ntîbûthiria buru. Nkaabûkanûkia ûrîa bûbuîrîte gûkanûkua, na ntîbûrekeeria bûkaara bûtîkanûkîîtue. Nîu ûûni MWATHANI nkuuga.”