Read KIMERU BIBLE PROTESTANT EDITION Jer 48 Bible Online

Jer 48 - KIMERU BIBLE PROTESTANT EDITION bible

Jer 48

¹ MWATHANI Mweneinya, Mûrungu wa Israeli nî aarîrie nteto iji ciegiî nthîgûrû ya Moabu: “Wûi naanû ntûûra ya Nebo îkûthirua buru! Ntûûra ya Kiriathaimu nî îtaîtwe yeekîrwa nthao. Giitiiro gîa ntûûra îîu nî kîmomorangi na antû baayo beekîrithua nthao.

²Rwikumio rwa Moabu rûkûthira. Anthû bakwithûkîra ntûûra ya Heshiboni bamîtaa, barîenda kûthiria nthîgûrû ya Moabu buru. Kinya gwe ntûûra ya Madimeni kira ki, nîûntû ûkaithûkîrwa ndweene.

³Antû ba ntûûra ya Horonaimu barîkaya bakauga, ‘Tûkûûragwa twathirua buru.’

⁴Moabu îkûthirua igueni twaana twaayo tûkîrîra.

⁵Igueni bakîrîra baitîîtie ntûûreene ya Luhithi na barî mwînamoone jwa ntûûra ya Horonaimu no gûkaya bagûkaya,

⁶bakiugaga, ‘Matûkeeni bûcionokie bûmatûke ta ntigiri cia kîthaka irî rwanda.’

⁷Nîkwîthîrwa bwîrîgagîîra gûteethua nî giitiiro kîeenu kîrîa gîaki kîarika, na ûtonga bweenu, kinya buî bûgatawa, amwe na mûrungu jweenu jwa mûng'uanano jûrîa jwîtagwa Kemoshi na athînjîri-mûrungu baaju na atongeeria baaju, bwikue kîthamîrioone.

⁸Ntûûra cionthe ikeenyangua, nabio iguuru na bûûrî bithûûkangue. Ûu nîu ûûni MWATHANI ndauga.

⁹Nyagieni chumbî nthîgûrûûne ya Moabu nîkwîthîrwa îkaathirua ntûti îtî thau. Ntûûra ciaayo igatigwa irî maganjo itîtûûri nî antû.

¹⁰Arî na kîrumi muntû ûrîa ûtîritaga ngûgî ya MWATHANI bwega! Arî na kîrumi muntû ûrîa ûkarega kûûraga antû ba Moabu.”

¹¹Ningî MWATHANI nî aaugîre atîrî, “Moabu îtûûraga kiindajî kuuma tene îtaikua kîthamîrioone. Moabu îkari ta ndibei ikembeete nyongûûne îtathukathukwa kuuma nyongûûne îmwe îgîîkîrwa kîrî îngî. Mûchemo jwaayo jûtathûûka na mûrîo jwaayo jûtaagarûka.

¹²“Tontû bûû, rî, îgiita nî rîîjîte rîrîa ngatûma anthû bathukathuke Moabu ta ndibei, bamîrite nyongûûne na boorage nyongû iu.

¹³Nîrîo Moabu îkaigua nthao nîûntû bwa mûrungu jwa mûng'uanano taju Kemoshi, o ta ûrîa antû ba Israeli baigîrue nthao nîûntû bwa kwîrîgîîra mûrungu jwa mûng'uanano taju Betheli.

¹⁴Nîatîa buî antû ba Moabu bûûmba kuuga bûrî nchamba cia ndwaa?

¹⁵Ûrîa ûkaathiria Moabu buru na ntûûra ciaayo agûkinya nacio nthaka ciaayo irîa irî inya ciûragi nîu ûûni MWATHANI Mweneinya nkuuga.

¹⁶Kûthirua kwa Moabu kûrî akuî mono na kwînyangua kwaayo gûtî kûraaja.

¹⁷Buî bûtwîre akuî na Moabu rîreeni nîûntû bwaayo. Naabuî bwinthe barîa bwijî nkuma yaayo ugeeni ‘Waathani bwa Moabu bwa inya bûkûthirua, ûkumio bwaayo na inya bitî o kaîrî.’

¹⁸Buî barîa bûtwîre ntûûreene ya Diboni umeeni arîa bûkaraga gwa ûkumio bûkare nthî mûthetuune. Ûrîa ûkaithûkîra Moabu agûkinya na akûthûûkangia biitiiro bieenu.

¹⁹Buî barîa bûtwîre ntûûreene ya Aroeri rûngameni rûteere rwa njîra bûcionere ûrithîrieni barîa bamatûki bûmenye nîkî nîûntû bamatûki.

²⁰Nabo bau bamatûki bagacokia atîrî, ‘Nî Moabu îthirîtue rîreeni amwe naatuî nîûntû bwa Moabu nî îîkîrithîitue nthao. Tûmîîrieni bûrî rûteere rwa mûuro jwa Arinoni atî Moabu nî îthirîtue buru.’

²¹“Ntûûra cia bûûrî igûkanûkua, nacio nî Holoni, na Jahaza, na Mefaathi,

²²na Diboni, na Nebo, na Bethi-dibulathaimu,

²³na Kiriathaimu, na Bethigamuli, na Bethimeoni,

²⁴na Keriothi, na Bozra, na ntûûra cionthe cia nthîgûrû ya Moabu.

²⁵Inya ya Moabu nî îthirîtue buru, nîu ûûni MWATHANI ndauga.”

²⁶Ningî MWATHANI nî aaugîre atîrî, “Anthû ba Moabu, nyuithieni Moabu yoogite, nîûntû nî îndemeete ni MWATHANI. Ningî Moabu îkaigaragaria mataîkeene jaayo nabo antû bakamîthekera.

²⁷Naabuî antû ba Moabu, ririkaneeni ûrîa bwamenagîîria antû ba Israeli, bûkainainia biongo bieenu bûkîbacikûûraga ta aamba bûgweete.

²⁸Buî antû ba Moabu umeeni ntûûreene cieenu bwîte bûgatûûre ndwareene cia maiga. Bûkare ta kîjea gîakîte gîtara mûromoone jwa mûcîcîbîro.

²⁹Nî twigîîtue bwa rwikumio rwa Moabu, twaigua ûrîa antû baayo baciûkaûkîrîîtie, barî na rambu, na bagîciimbaimbagia.

³⁰Ûûni MWATHANI ndiuga atî nî nkûmenya rwikumio rwa Moabu, na mathithio jaayo tî ja mma.

³¹Nîkîo gîtûmi nkûrîrîra antû ba Moabu bonthe, nkarîra nîûntû bwa antû ba ntûûra ya Kiriheresi.

³²Nkarîrîra antû ba ntûûra ya Sibima nkûrûki ya ûrîa ndaarîrîîre ntûûra ya Jazeri. Sibima îkari ta mûzabibû jûrî na mpang'i citambîte bwa îria rîa Chumbî mwanka îgakinya ntûûra ya Jazeri. Îndî nandî nzabibû ciaaku gwe ntûûra ya Sibima cia îgiita rîa mpio na rîa mûû ikwînyangua buru.

³³Antû ba Moabu nî batigîte kûgwîrua na batî na nkerû nîûntû ndibei nî îtigîte kûthithua imiiriine.

³⁴“Antû ba ntûûra ya Heshiboni, na ba ntûûra ya Eleale nî bakûrîra. Kîrîro kîaao nakîo nî gîkwigîîgua mwanka ntûûreene ya Jahazi. Ningî nî gîkwigîîgua nî antû ba ntûûra ya Zoari, na gîkaigîîgua mwanka ntûûreene ya Horonaimu na ya Egilathi-shelishiya. Kinya rûûjî rwa Nimurimu nî rûwîte.

³⁵Nkaarigîîria antû ba Moabu kûthaathayia na kûritîra mîrungu yaao ya mîng'uanano igongwana na kûmîîthîria ubaani. Nîu ûûni MWATHANI ndauga.

³⁶Tontû bûû, nî nkûrîra nîûntû bwa antû ba Moabu na ba Kiriheresi, O ta muntû ûkûringa mûtûrirû akiina rwîmbo rwa kwithikîîra, nîûntû into birîa bionthe araarî nabio nî bithirîtue.

³⁷Antû bonthe nî beenjeete mîtwe na ireru na baitemanga njara; bonthe beekîra mathango.

³⁸Îgûrûgûrû rîa nyomba cionthe cia nthîgûrû ya Moabu na gûntû kunthe kûrîa antû batirimanaga nî kîrîro akî. Nîkwîthîrwa nî mbûragîte Moabu ta ûrîa nyongû yûûragagwa rîrîa gûtî muntû ûkûmîenda. Nîu ûûni MWATHANI nkuuga.

³⁹Nîatîa ûjû Moabu yathirua! Oona ûrîa antû baayo bakûrîra! Raithîîria ûrîa bakunîkîte moothiû jaao nî nthao. Moabu yeete gîntû gîa kûmeneerua na gîa kûmakania kîrî barîa bamîcîgîîrîîtie.”

⁴⁰MWATHANI aariuga ûjû: “Atîrî, kûrî mûgongo jûkaburûûka ta ndiiû naju jûkunîke Moabu yonthe na mathagu jaaju.

⁴¹Ntûûra cia Moabu igatawa na biitiiro biaacio birîa biaki biarîka bithirue buru. Nchamba cia ndwaa cia Moabu ntukû îîu ikagwatwa nî ûguaa ta mûka ûrî na mûrimo jwa kûewa mwana.

⁴²Moabu îkathirua buru îtige kwaa mûgongo kaîrî nîûntû nî yaaregere kwathîkîra MWATHANI.

⁴³Antû ba Moabu mbere yeenu kûrî na imakania, na marinya, na mîkûmo. Nîu ûûni MWATHANI ndabwîra.

⁴⁴Muntû ûrîa ûkaamatûka îmakania akagwa mariinyeene, nawe ûrîa ûkauma mariinyeene jau akagwatwa nî mîkûmo. Ûûni MWATHANI ndiuga atîrî, ‘Nî mbîkîte rîrîa mantû jau jonthe jakeejîîra Moabu îkanûkue.

⁴⁵Antû bamatûkîte ndwaa beetîte gwiciitha ntûûreene ya Heshiboni ntûûra îrîa yaathagwa nî mûnene Sihoni, îndî ntûûra îîu nî îîthîtue, na kinya ntûûra irîa irî irîmeene irîa itwîrwe nî antû barîa beendeete ndwaa ikaaîîthua.

⁴⁶Wûi kîrî gwe Moabu, antû barîa bathaathagia mûrungu jwa mûng’uanano taju Kemoshi bûkûthira. Nîkwîthîrwa aana beenu ba aarî na nthaka nî bataîtwe baikua kîthamîrioone.

⁴⁷Îndî nyumeene ngacokeria Moabu ûthinyaari bwaao. Ûu nîu ûûni MWATHANI nkuuga.” Rîu nîrîo îkanûkia rîa Moabu.