Read KIMERU BIBLE PROTESTANT EDITION Jer 49 Bible Online

Jer 49 - KIMERU BIBLE PROTESTANT EDITION bible

Jer 49

¹ Mantûûne jegiî nthîgûrû ya Amoni, MWATHANI ariuga atîrî, “Nîka Israeli îtî antû ba kûmîrwîrîîra? Nîkî îndî ûntû bareteete antû barîa bathaathagia mûrungu jwa mûng'uanano jûrîa jwîtagwa Moleki bakaithûkîra antû ba mwîrîga jwa Gadi na bagatûûra ku?

²Tontû bûû, rî, îgiita nî rîîjîte rîrîa antû ba Raba ntûûra îrîa nene ya Aamoni bakaigua tûjû twa antû barî ndweene. Nayo ntûûra îîu îkaeethua îgaanjo na tûtûûra twaayo twîîthue na mwanki. Nayo Israeli îgataa barîa bamîtaîte, nîu ûûni MWATHANI nkuuga.

³Rîreeni buî antû ba ntûûra ya Heshiboni nîûntû ntûûra ya Ai nî îthirîtue Aka ba ntûûra ya Raba nî bauge mbu bekîre mathango bûkîrîraga, bamatûkîte ndwegoone cionthe. Tontû mûrungu jwa mûng'uanano jûrîa jwîtagwa Moleki jûgaikua kîthamîrioone amwe na athînjîri-mûrungu baaju na atongeeria baaju.

⁴Buî antû ba Amoni bûtî eetîkua bûrî aikumia. Nîkî bûgwikumia nîûntû bwa inya îrîa bûrî nayo? Buî bwîkîte wîrîgîîro bweenu mîthithûûne yeenu bûkiugaga, ‘Nûû ûûmba gûtwithûkîra?’

⁵Ûûni MWATHANI Mûrungu Mweneinya ndiuga atîrî, nkabûreetera ûthûûku, Ûthûûku bûu nabu bûkauma kîrî antû barîa babûciîgîrîîtie naabuî bûkamatûka bwinthe O muntû eete njîra yaawe na gûtîonora wa kûbûcokanîîria kaîrî.

⁶Îndî nyumeene ngacokeria Aamoni wega bwaao kaîrî, nîu ûûni MWATHANI nkuuga.”

⁷ Mantûûne jegiî Edomu, MWATHANI Mweneinya ariuga ûjû: “Nîka antû ba Temani bathirîri nî ûmenyo? Nîka kîrîra kîthaamîte barîa boome?

⁸ Antû ba ntûûra ya Dedani îteeni bûgaaiciithe. Tontû îgiita nî rîîjîte rîa gûkanûkia nchiarwa cia Esaû.

⁹Akethi ba nzabibû nî batigaragia nzabibû îmwe baketha. Nabo aamba beejaga ûtukû bakaiyia birîa bakwenda akî.

¹⁰Ûûni nkoonania kûrîa kunthe antû ba Edomu baciithîte, nabo batîûmba gûciitha kaîrî. Antû ba Edomu amwe na atûûri baao bonthe bakathirua buru.

¹¹Ntigîreeni twaana tweenu tûrîa tûkîa na bûntigîre aka beenu barîa ntigwa naani nkabamenyeera.”

¹²Nîkwîthîrwa MWATHANI arîûria atîrî, “Këethîra antû nî baakanûkîrue kinya barîa baatabuîrîte gûkanûkua rî, nî buî bûgakara bûtîkanûkîîtue? Arî, kinya buî no mwanka bûkanûkue.

¹³Nîkwîthîrwa ni MWATHANI ningwa nî nciîtîtie atî ntûûra ya Bozra îkaa ta gîntû gîa kûmakania, yeethue îgaanjo, na yee ta gîntû gîa kûmeneerua na ta gîntû gîkîrume. Tûtûûra tûrîa tûmîthiûrûkîrîte tunthe tûkathirua twee maganjo.”

¹⁴Ûûni Jeremia nî menyete kuuma kîrî MWATHANI atî nî atûmanîte mîgongoone auga atîrî, “Ithuranîreni bwithûkîre nthîgûrû ya Edomu.”

¹⁵Nîkwîthîrwa MWATHANI akaaeethia Edomu mûgongo jûmûnini buru gatîgatîîne ka mîgongo îngî îtue kûmenagîîrua nî mîgongo îngî.

¹⁶MWATHANI arîbwîra atîrî, “Nî bwaîîrîîtue nî rwikumio rweenu. Gûtî muntû ûkûbûkîra ta ûrîa bûkûthûgaania. Buî bûtwîre ndwareene cia maiga na irîmeene. Kinya bwethîrwa bwakîte nja cieenu irîmeene ta ûrîa ndiiû yaakaga gîtara kîaayo nkaabûgwîthia nthî.”

¹⁷Ningî MWATHANI nî aaugîre atîrî, “Edomu îkaa gîntû gîa kûmakania. Nabo bonthe barîa bagakûrûkîîra kîrî yo bakarigara nî ûrîa yooneete mîtino îmiingî.

¹⁸O ta ûrîa Sodomu na Gomora na tûtûûra tûrîa twaithiûrûkîrîte ciathirîrue, iraaaga muntû ûtwîre ku no u Edomu îgakara.

¹⁹O ta ûrîa ngatûnyi yuumaga kîthakeene kûu Jorodani îgeeta kwithûkîra nkanata îndiku ya ng'ondu, nîu kinya ni nkaithûkîra Aedomu ntûtî. Nabo bamatûke baume nthîgûrûûne yaao. Naani nkaathuura mûnene o ûrîa nkeenda wa kwathaga nthîgûrû îîu. Tontû rî, nûû ûngî ûkari ta ûûni? Nûû ûûmba kûngambithia? Nî mûtongeeria ûrîkû ûûmba gûmpûmîîria.

²⁰Nandî rî, thikîreeni mîbango îrîa ûûni MWATHANI mbûbangîrîte buî antû ba Edomu, ûrîa mbangîte kûthiria ntûûra ya Temani. Ngaakûrûria aana ba antû ba Temani antû bonthe barigare.

²¹Nayo nthîgûrû ya Edomu îkagwa. Kûgwa kûu gûgatûma nthîgûrû yonthe iinaine. Nakîo kîrîro gîa gwikaîra gîkaigîîgua kûraaja mwanka Îrieene Îtuune.

²²Anthû bakaithûkîra ntûûra ya Bozra o ta ûrîa rwîgî rwînamaga kûgwata gîntû rûtaambûrûkîîtie mathagu. Nacio nchamba cia ndwaa cia Edomu ikagwatwa nî ûguaa ta bûrîa bûgwataga mûka akîewa mwana.”

²³ Ningî MWATHANI nî aarîrie mantû jegiî Damaski arauga atîrî, “Antû ba nthûûra ya Hamathi na ya Aripadi bathîînîte na barigara mono nîûntû nî baigîîtue nteto itî injega. Nabo nî booragi nî ûguaa, baaga thîîrî ta îria rîkuurugana.

²⁴Antû ba Damaski bathirîri nî inya buru bamatûka nî ûguaa. Mûrimo na kîeba nî bibagwete o ta ûrîa bigwataga mûka akîewa mwana.

²⁵Nîatîa ntûûra îrûkîri nî antû na nîu îtûûraga na nkerû?

²⁶Îgiita nî rîîjîte rîrîa nthaka ciaao ikooragîrwa kîaragoone nacio njûûrî ciaao ithirue ntûkû îîu. Nîu ûûni MWATHANI Mweneinya nkuuga.

²⁷Nkaaîthia nthingo cia Damaski na mpîîthie giitiiro kîa mûnene Beni-hadadi kîrîa gîaki kîarika.”

²⁸MWATHANI ariuga ûjû mantûûne jegiî mwîrîga jwa Kedari na mîgongo îrîa yaathagwa nî ntûûra ya Hazori îrîa Nebukadineza mûnene wa Babiloni aathirîrie. “Îthûkîra mwîrîga jwa Kendari! Thiria antû ba bwa gaiti buru!

²⁹Bûjûkie maema jaao na ndîîthia ciaao, bûjûkie itambaa bia maema jaao na into biaao; bûjûkie nkamîîra ciaao na bûbeere atîrî, ‘Nî bûthiûrûkîri nî ûthûûku nteere cionthe.

³⁰Buî bûtwîre ntûûreene ya Hazori matûkeeni bwîte kûraaja bûgaiciithe! Ûu nîu ûûni MWATHANI ndauga. Nîkwîthîrwa Nebukadineza mûnene wa Babiloni arî na mûbango jûmûthûûku, mûbango jwa kûbûthiria.

³¹Îteeni bwithûkîre mûgongo jûrîa jûthinyaarîte jûtî na thîîna. Ntûûra yaao îtî na mpingîro na kuburi.

³²Nkamîîra ciaao na ndîîthia ciaao cia ng’ombe, mbûri na ng'ondu igatawa. Nkaanyagania Arabu barîa batûûraga rwanda mbareetere thîîna kuuma nteere cionthe.

³³Ntûûra ya Hazori îkaa gîkaro kîa mbîrwa Yee îgaanjo rîtîtûûri nî muntû na gûtî muntû ûgaatûûra ku.”

³⁴Nyuma ya Zedekia kwaa mûnene wa Juda, MWATHANI nî aarîîrie kîroria Jeremia mantû jegiî nthîgûrû ya Elamu.

³⁵Aramwîra atîrî, “Ûûni MWATHANI Mweneinya ndiuga atîrî: nkaathiria asikarî ba Elamu barîa batumagîra ûta, barîa batûmaga îîthîrwa îrî na inya.

³⁶Nkareeta anthû kuuma nteere cio-inya; ncoke mbanyaganie nteereene iu cio-inya, mwanka kwîthîrwe gûtî mûgongoone noo jûmwe antû ba Elamu batîîthîrwa barî.

³⁷Nkaamakia antû ba Elamu bakîre anthû baao barîa bacwaga kûbathiria. Naani nkabareetera ûthûûku bûbûnene nîûntû bwa mûthûûro jwaakwa. Ûu nîu ûûni MWATHANI nkuuga.

³⁸Ningî nkaathiria atongeeria baao na mûnene waao. Naani kaathanaga ndî kûu Elamu. Ûu nîu ûûni MWATHANI nkuuga.

³⁹“Îndî îgiita rîgaakinya rîrîa ngacokeria antû ba Elamu wega bwaao, nîu ûûni MWATHANI kuuga.”