Read KIMERU BIBLE PROTESTANT EDITION Jer 5 Bible Online

Jer 5 - KIMERU BIBLE PROTESTANT EDITION bible

Jer 5

¹Îtaîtanieni na tûjîra twa Jerusalemu, nandî bûcionere bwingwa nîkenda bûmenya, bûcwee kunthe kûrîa antû bakaraga, bwoone këethîra bûkoona muntû noo ûmwe ûrîa ûthithagia mantû ja îota kana ûcwaga mma. Bwamwona, nkaamîrekera.

²Kinya këethîra antû baciîtagia bakiugaga “Tontû bwa ûrîa MWATHANI arî mwoyo.” Mûciîtio jwaao nî jwa ûrongo.

³Anga gwe MWATHANI tî ûûma weendaga kwona kîrî antû baaku? Gwe nî ûbaûrîte, nabo batiigue ûrûrû. Gwe nî ûbaunangîte nabo batîcoke ûûmeene. Îndî bo boomagarîte ta iiga, baarega kwirira buru.

⁴Naani ndîrathûgaania, “Antû baba nî nkîa itî na ûûme, nîkwîthîrwa batiijî njîra cia MWATHANI, kana bamenya Waatho bwa Mûrungu waao.

⁵Rîu ndauga ka mbîte kîrî atongeeria mbaarîrie, nîkwîthîrwa nî baijî njîra ya MWATHANI na nî baijî Waatho bwa Mûrungu waao.” Îndî bonthe bakari ûmwe, nî baunîte Waatho bwa Mûrungu, na baarega kûmwathîkîra.

⁶Tontû bûû, ngatûnyi ikauma mwitûûne iboorage, nacio nkarî ciume rwanda îbathirie buru. Nkarî îkarîte îtegeete ntûûra ciaao cietereete muntû ûrîa ûkaumagara ku imûtambûrange tûchunchî tûchunchî. Tontû meeyia jaao nî jamaingî na nî batigîte Mûrungu waao.

⁷Nîatîa mpûûmba kûbûrekera, o rîrîa aana beenu bantiganîrîtie bathaathayia mîrungu ya ûrongo? Rîrîa ndaabamathîre baanyira buru baambîrîîrie kûmaramara bûgîîtanagia na nyomba cia maraya.

⁸Bakari ta mbarathi ndûme ireri bwega îkwenda nka, antû bonthe nîka bakwirîrîria eekûrû ba atûûri baao.

⁹Nîka ni nkarega kûbakanûkîria mantû jaja? Nîu MWATHANI akûûria. Nîka nkarega kwirîîria kîrî mûgongo ta jûjû?

¹⁰Îtanieni na mpari ciaao cia mîzabibû bûmîînyangie îndî bûkaamîthiria buru bûcae mpang'i ciaayo nîûntû tî cia MWATHANI.

¹¹Antû ba Israeli na antû ba Juda nî bakarîte batî eetîkua kîrî ni buru, nîu MWATHANI akuuga.

¹²Antû ba Israeli baciaîtie mantûûne jegiî MWATHANI, baciîra atîrî, “Gûtî u agaatûthithia, na gûtî ûthûûku bûgatwîjîîra, ningî tûtîkorona ndwaa kana mpara.

¹³Iroria bieete bia gûtûringagîra gîtuma akî, na rûteto rwa MWATHANI rûtî ndeene yaao.” Mantû jau bakuuga nîjo jongwa bakaathithîrua!

¹⁴Tontû bûû, MWATHANI Mûrungu Mweneinya ariuga ûjû, “Nîkwîthîrwa antû ba Israeli nî buuîtie mantû jau, ûûni ngatûma nteto ciaakwa ciee mwanki kanyueene gaaku, nabo antû bau batuîke nkû cia kwîîthua nî mwanki jûu.

¹⁵Atîrî, buî antû ba Israeli, ngatûma bwithûkîrwe nî mûgongo jwa kuuma kûraaja, nîu MWATHANI akuuga. Naju nî mûgongo jûtwîre o kuuma tene, jûrîa buî bûtiijî rûthiomi rwaao kana bûmenya ûrîa antû baajû bakuuga.

¹⁶Thigaaki ciaao nî ta mbîrîra itîkunîki, nabo antû baaju bonthe nî nchamba.

¹⁷Nabo bakarîa maketha jeenu na irio bieenu bathirie. Bakooraga nthaka cieenu na aarî beenu, barîe ndîîthia cieenu cia mbûri na ng'ondu, na ng'ombe, ningî bathirie mîzabibû yeenu na mîkûû yeenu. Kinya ntûûra cieenu irîa bwirigîrîte bwarikia bakaithiria.

¹⁸“Ningî kinya îgiita rîu ntîbûthiria buru, nîu MWATHANI akuuga.

¹⁹Antû beenu rîrîa bakaabûûria, ‘Nîkî tontû MWATHANI Mûrungu weetû atûthithîrîtie mantû jaja jonthe?’ Bûbeere atîrî, ‘O ta ûrîa bûtigîte MWATHANI bwathaathayia mîrungu mîgeni nthîgûrûûne yeenu, nîo u bûgaatumîkîra antû ba kûngî nthîgûrûûne îtî yeenu.’”

²⁰Tûmîîria mantû jaja kîrî antû ba Israeli na Juda,

²¹ ûbeere atîrî, “Thikîîreeni mantû jaja buî biaa, antû batîthûgaanagia, buî bûrî meetho na bûtîonaga na bûrî na matû na bûtiigagua.

²² Nîkî tontû bûtînkîraga? Nîkî tontû bûtîteetemaga bwambona? Nîu MWATHANI akûûria. Nî ni ndeekîre mûthanga jûrî mwanka jwa îria, naju mwanka jûu nî jwa gûtûûra, jûrîa îria rîtîkûrûkaga, mîgombe yarîo îtîûmba kûjuuna, kinya yaumbuthûka îkîringanaga, îtîûmba kuunîkara.

²³Nabo antû baba barî nkoro injûmo cia îrema, bo bagarûkîte baantiganîria.

²⁴Ningî bo batiugaga nkoroone ciaao, ‘tûkîreni MWATHANI Mûrungu weetû, we weejanaga ngai îgiita rîaayo rîa mûratho na rîa ûthima, ningî we ûtûmaga tûketha îgiita rîa maketha.’

²⁵Nî meeyia jeenu jatûmîte mantû jau jonthe jaûra, na nîjo jatûmîte bûtîkoone wega.

²⁶Nîkwîthîrwa antû babaaî barî gatîgatîîne ka antû baakwa; bakaraga baiciithîte ta antû bakûgwatia nyoni. Nabo bakûmaga mîtego bakagwatia antû.

²⁷O ta ûrîa gîkuîki kîûjûraga nyoni nîu nyomba cia bau baaî ciûjûrîte waayia. Tontû bûû, baneneete, baa itonga,

²⁸banora bagîta maguta. Bo batiijî mwanka jwa kûthithia mantû jamathûûku. Batîtujagîra aana barîa batî na aciari magamba na îota na ningî batîtetagîîra barîa barî na ûbatu.

²⁹Nîka nkarega kûbakanûkîa nîûntû bwa mantû jau? Nîu MWATHANI akûûria. Nîka nkarega kwirîîria kîrî mûgongo ta jûjû?”

³⁰Kûrî ûntû bwa kûrîgaria, bûbûthûûku mono bûkarîkîte nthîgûrûûne îîjî:

³¹Iroria biroragia mantû jatî ja mma, nabo athînjîri-Mûrungu baathanaga ûrîa bakwenda. Nabo antû baakwa nîu beendaga. Îndî buî rî, nîatîa bûkaathithia mûthiro jwakinya?