Read KIMERU BIBLE PROTESTANT EDITION Jer 50 Bible Online

Jer 50 - KIMERU BIBLE PROTESTANT EDITION bible

Jer 50

¹ MWATHANI nî aarîîrie kîroria Jeremia mantû jegiî ntûûra ya Babiloni na nthîgûrû yaao, aramwîra atîrî,

²“Tûmîrieni mîgongoone bwonanie rwaano bûtîkwitha nteto buuge, ‘Babiloni îgûtawa, naju mûrungu jwa mûng'uanano jûrîa jwîtagwa Beli jûgwîkîrithua nthao, naju mûrungu jwa mûng'uanano jûrîa jwîtagwa Merodaki jûkwaraganua na mîng'uanano yaaju îgwîkîrithua nthao.’”

³Nîkwîthîrwa mûgongo jûkauma bwa ûrîo jwithûkîre Babiloni jûmîethie îgaanjo rîtîgatûûrwa nî antû. Antû bakaamatûka na nyomoo imatûke ciume ku.

⁴MWATHANI ariuga atîrî, “Îgiita rîu rîakinya, antû ba Israeli na ba Juda bakeeja gûncwa bakîrîraga, ni MWATHANI Mûrungu waao.

⁵Nabo bakoorithîria njîra ya gwîta Zaiûni baamîthingate bakiugaga atîrî, ‘Njûûni tûgeeke kîrîkanîro gîa kenya na MWATHANI.’

⁶“Antû baakwa bakari ta ng'ondu ciûrîte. Nabo baûrîte nîûntû arîîthi baao nîbo babaatithîtie njîra. Baumaga kîrîmeene kîmwe bageeta kîngî. Nabo nî boorîrîîtue nî mîciî yaao.

⁷Antû baakwa baithûkaagîrwa nî bonthe barîa baraboona, na anthû baao bakauga atîrî, ‘Tuî tûtî na yaatia nîûntû antû ba Israeli ka beeîrîtie MWATHANI ûrîa ûrî gîtûûro kîaao, na ûrîa waarî wîrîgîîro bwa biûjûjû biaao’

⁸ “Buî antû ba Israeli matûkeeni buume ntûûreene ya Babiloni na buume nthîgûrûûne yaao. Kareni ta nthenge îrîa îtongagîîria mbûri ingî buume nthîgûrû iu.

⁹Tontû rî, ni mbûkaûkîtie gîkundi kîa mîgongo îrî na inya mono kuuma bwa ûrîo, ntûme iithûkîre Babiloni. Nayo mîgongo îîu îkaibangania iithûkîre Babiloni na îmîûmbe. Asikarî ba mîgongo îîu nî baijî kûratha na mîgwî mono na batîatagia kîrîa bakûratha.

¹⁰Nthîgûrû ya Babiloni îkaithûkîrwa îtawe, anthû baao bajûkie o birîa bionthe bakeenda, nîu ûûni MWATHANI nkuuga.”

¹¹MWATHANI ariuga atîrî, “Buî antû ba Babiloni bûgwîrîtue nîûntû nî bwaithûkîîre nthîgûrû yaakwa. Bûgwîrîîtue ta mwari ya ng'ombe îrî nyakiine bwatua kûringa nyiûrû ta mbarathi ndûme.

¹²Ntûûra ya Babiloni tayo kaumo keenu îgeekîrithua nthao na îîkîrithue îgi. Nayo îkaa ya mûthia kîrî mîgongo yonthe yee îgaanjo rîtîtûûri nî antû.

¹³Nayo ntûûra îîu îtîtûûrwa nî muntû nîûntû bwa îkanûkia rîaakwa îndî yo îkaa îgaanjo. Muntû wonthe ûrîa ûgakûrûkagîîra Babiloni akamakaga na arigarage nî mantû jarîa akoona.

¹⁴Buî bwinthe bûrathaga na mîgwî ithuranîreni bûcîgîîrie Babiloni bûmiithûkîre. Naabuî bûmîrathe bûtî gûtîgia mûgwî noo jûmwe nîkwîthîrwa nî îmbîîrîîtie ni MWATHANI.

¹⁵Ringeeni nkuuro cia kûûmbana bûthiûrûkîrîte Babiloni nîûntû îkûûmbwa buru. Nthingo ciaayo irîa ndikie igûkoborangwa na mînaara yaayo yaringwa nthî. Nîkwîthîrwa MWATHANI nîwe ûkwirîîria. Mîthithîrie o ta ûrîa yathithîrîtie nthîgûrû ingî.

¹⁶Bûkarekeeria Babiloni yoona mwaandi wa mbeeû kana yoona mûkethi wa gûketha. Nîkwîthîrwa anthû bakaamiithûkîra na bonthe barîa batwîre ku bakamatûka bacoke nthîgûrûûne ciaao.”

¹⁷Ningî MWATHANI nî aaugîre atîrî, “Antû ba Israeli bakari ta ng'ondu ciîngi na cianyaganua nî ngatûnyi. Mbere nî mûnene wa Asîria waamiithûkîîre, na nandî nî Nebukadineza mûnene wa Babiloni ûkûbatuutuma.

¹⁸Tontû bûû, ûûni MWATHANI Mweneinya Mûrungu wa Israeli ndiuga atîrî, ngaakanûkia mûnene wa Babiloni na nthîgûrû yaawe, o ta ûrîa ndakanûkîrie mûnene wa Asîria.

¹⁹Ngaacokia antû ba Israeli nthîgûrûûne yaao. Nabo bakaarîîjaga irio biûmîte kîrîmeene gîa Karimeli na bia kuuma nthîgûrû ya Bashani. Ningî bakaarîîjaga kîrîa kîonthe bakeendaga kuuma irîmeene bia Efuraimu na nthîgûrûûne ya Gileadi.

²⁰Îgiita rîu rîakinya nkaarekera antû ba Israeli na ba Juda barîa bakeethîrwa batigeere meeyia jaao jonthe na batîcoka kwîyia kaîrî.”

²¹MWATHANI nî eerîre anthû ba Babiloni atîrî, “Ithûkîreeni antû ba Merathaimu na barîa batwîre Pekodi. Naabuî bûboorage bûbathirie buru na bûthithie jarîa jonthe mbwîrîte. Ûu nîu ûûni MWATHANI nkuuga.

²²Kûrî na gîtûma gîkiingî kîa ndwaa nthîgûrûûne, kûrî na kûthiranua gûkûnene.

²³Babiloni nî ta nchûgûma îrîa yûûraga nthîgûrû cionthe îndî nchûgûma îîu nî yuunangi. Nayo mîgongo îngî nî îrigarîtue nî ûntû bûu.

²⁴Ndagûkûmîîre mûtego jwakûgwatia gwe Babiloni naju nî jwaakûgwatîrie, mbere ya ûmenya jûrî o nîûntû nîka waarûjaga naani.

²⁵Ûûni MWATHANI nî ndugûrîte kûrîa into biaakwa bia ndwaa birî ndabirita ku na mûthûûro nîûntû ûûni MWATHANI Mûrungu Mweneinya ndî na ngûgî ya kûrita nthîgûrûûne ya Babiloni.

²⁶Ithûkîreeni Babiloni kuuma nteere cionthe na bûrugûre nchuku ciaayo. Mîûthûranieni ithûmba ta irio bûmîthirie îthire buru na menya bûtigia noo mbi biaayo.

²⁷Ûrageeni asikarî baao bonthe bathire buru. Wûi kîrî buî antû ba Babiloni nîûntû îgiita rîeenu rîa gûkanûkua rîgûkinya.”

²⁸Antû bamatûkîte kuuma Babiloni beetîte Jerusalemu nî bakuuga ûrîa MWATHANI Mûrungu weetû akwirîîria kîrî antû ba Babiloni nîûntû Ababiloni nî beenyangîrie kîûrû kîaawe.

²⁹ “Îteeni antû bonthe barîa barathaga na mîgwî beete bakaithûkîre Babiloni. Nî beete bamîcîgîîrie na menya barekeeria muntû noo ûmwe amatûka. Kanûkia Babiloni kûringana na mathithio jaayo jarîa jonthe îthithîtie. Nthîgûrû ya Babiloni nî îregeete kûmbathîkîra nîûntû bwa rwikumio rwaayo. Yaarega kûmbathîkîra ni MWATHANI, Ûrîa Mûtheru wa Israeli.

³⁰Tontû bûû, nthaka ciaayo ikooragîrwa njîreene cia ntûûra na njûûrî ciaayo cionthe ithirue ntukû îîu. Ûu nîu ûûni MWATHANI nkuuga.”

³¹“Atîrî, gwe Babiloni ûrî mwikumia na ngaagûkanûkia nîûntû ntukû yaaku ya gûkanûkua îgûkinya, nîu ûûni MWATHANI Mûrungu Mweneinya kuuga.

³²Gwe mwikumia Babiloni mûgwîre ûkaagwa ûtîona wa gûgûûkîîria. Ningî nkaaîthia ntûûra ciaaku na bionthe birîa birî akuî naagwe bikaaîîthua.”

³³Ûûni MWATHANI Mweneinya ndiuga atîrî: Antû ba Israeli na ba Juda nî bainyîîrîîtue. Barîa babataîte babagwete babarikia na batîkwenda kûbarekeeria beeta.

³⁴Ûûni nî ni mûkûûri waao na ndî inya. Riîtwa rîaakwa nî MWATHANI Mweneinya. Naani nkaabakaria ntûme nthîgûrû yonthe îîthîrwe îrî na thîîrî. Îndî antû ba Babiloni batîthîrwa barî na thîîrî.

³⁵Ûûni MWATHANI nkaabûthiria buî antû ba Babiloni nthirîrie atongeeria beenu ndweene o amwe na antû beenu barîa boome.

³⁶Iroria bieenu bia ûrongo nî biaa nabio bikooragwa Asikarî beenu barî na ûguaa nabo bakooragwa.

³⁷Mbarathi na ngaarî cia ndwaa ikaathirîrua ndweene asikarî ba gûkombora kinya bo bakooragwa nîûntû batî na inya. Ndwaa îîu îgatûma mîthithû yaao îtawe buru.

³⁸Ngai nî yûûre mîuro ya Babiloni yûûme nîûntû Babiloni nî nthîgûrû îthaathagia mîrungu ya mîng'uanano, na antû baayo nî biaa.

³⁹ Tontû bûû, Babiloni îgaatûûragwa nî mbiti na thirai na nyamû ingî cia kîthaka. Gûtî antû bagatûûraga kûû kaîrî kenya na kenya.

⁴⁰ O ta ûrîa Mûrungu aathirîrie ntûûra ya Sodomu na ya Gomora na tûtûûra tûrîa twaaithiûrûkîrîte, nîo u Babiloni îtîona muntû wa gûtûûra ku kana wa gûkûrûkîîra ku. Ûu nîu ûûni MWATHANI ndauga.

⁴¹Atîrî, antû baumîte nthîgûrûûne ya bwa ûrîo naju nî mûgongo jûrî kûraaja. Anene babaingî nî bakwithuranîra nîûntû bwa ndwaa.

⁴²Nabo bagwete moota na nchiû; na nî antû babathûûku mono na batî kîaao. Naju mûruumo jwaao nî ta jwa îria rîkûruuma beetithîtie mbarathi ciaao, baitungîte ta antû beetîte ndweene nîkenda barwaa naagwe Babiloni!

⁴³Mûnene wa Babiloni nawe aigua mantû jaao njara ciaawe ikagogoa na ikaaga inya buru. Akagwatwa nî ûguaa bûbûnene na akagwatwa nî mûrimo ta jwa mûka akîeewa mwana.

⁴⁴“Atîrî, O ta ûrîa ngatûnyi yuumaga kîthakeene kûu Jorodani îgeeta îkaithûkîra ng'ondu irîîthîtue, nîu kinya ni nkaithûkîra nthîgûrû ya Babiloni. Naani ngatûma bamatûke kuuma kûu na nthuure mûnene o ûrîa nkeenda wa kûmîathaga. Tontû rî, nûû ûngî ûkari ta ûûni? Nûû ûûmba kûmbûûria ûntû? Ka kûrî mûnene ûûmba kûrwaa naani?

⁴⁵Tontû bûû, igueni mîbango îrîa MWATHANI arî nayo yegiî Babiloni, tayo nthîgûrû ya Akalidea: twaana twaayo tûgakururua na nthî, nabo antû barigare boona mantû jau.

⁴⁶Rîrîa Babiloni îkaathirua, mûruumo jwa kûgwa kwaayo na kîrîro kîa antû baayo gîkaigîîgua nthîgûrûûne kunthe.”