Read KIMERU BIBLE PROTESTANT EDITION Jer 51 Bible Online

Jer 51 - KIMERU BIBLE PROTESTANT EDITION bible

Jer 51

¹MWATHANI ariuga atîrî, “Nkareteera Babiloni na antû baayo kiurutani gîa kûthûkangia.

²Ngatûma anthû ba kwera Babiloni ta ûrîa mwere jweragwa, nayo ntukû îîu ya thîîna yakinya bakamiithûkîra kuuma nteere cionthe mwanka batige nthîgûrû îrî întheri.

³Bûkarekeni arathi ba mîgwî baayo bakûma ûta kana bûreka beekîra nguû ya chuuma ya ndwaa kîbara. Menya bûcaîîra nthaka ciaayo nacio njûûrî ciaao ithirieni buru.

⁴Barîa booragi bakagwa nau nthîgûrûûne ya Babiloni, nabo barîa boonjeretue ndweene bagwe njîreene cia ntûûra ciaao.

⁵Nîkwîthîrwa gûtî rîo Israeli na Juda cierûkîrwa nî Mûrungu waao, MWATHANI Mweneinya, îndî nthîgûrû ya Babiloni nî îthithîtie ûthûûku mbere ya Ûrîa Mûtheru wa Israeli.

⁶Matûkeeni buume Babiloni bûtîkeeje kûûragwa, rîrîa ngaakanûkia Babiloni mîthirie; mîkanûkie ûrîa kwagîrîte mîkanûkie nkiirîîria nîûntû îgiita nî rîkinyi rîa kwirîîria.

⁷ Babiloni yaakari ta gîkombe kîa thaabu kîrî njareene cia MWATHANI, nakîo kîranyuithia mîgongo îroogita. Mîgongo yaanyuîre mûthûûro jwa MWATHANI ta ndibei îkûnyua, îrathûûka mîtwe.

⁸Îndî Babiloni nî îthirîtue o ntûti. Rîreeni nîûntû bwa Babiloni, bûmîcwîre ndawa ya iroonda biaayo kwombîka îkoorua.

⁹ Ageni barîa batwîre Babiloni baugaga atîrî, ‘Nî tweendaga gûteethia Babiloni îndî gûtoombîkîre. Tûmîtigeeni nandî twaane o muntû o muntû eete nthîgûrû yaao. Nîkwîthîrwa îkanûkia rîaao nî rîrînene na Mûrungu nî amîthirîtie buru.’”

¹⁰Antû ba Israeli nî baaugîre atîrî, “MWATHANI akwonania tûrî ûûmeene njûûni twîte tûkeere barîa barî Zaiûni ûrîa MWATHANI Mûrungu weetû athithîtie.”

¹¹Atongeeria ba njûûrî nî beerîre asikarî atîrî, “Nooreeni mîgwî, na bûgwate rong'o!” MWATHANI nî ookaûkîîtie anene ba Media, nîûntû wendi bwaawe nî atî Babiloni îthirue buru. Ûu nîu akairîîria nîûntû bwa ûrîa kîûrû kîaawe kîaathûûkangîrue.

¹²Onanieni rwaano rwa kwithûkîra nthîngo cia nthîgûrû ya Babiloni; îkîreeni akaria inya, bwongeere akaria barîa barî ntûûreene. Thuranîreeni asikarî ba kwithûkîra ntûûra, nîkwîthîrwa MWATHANI nî aabangîre na akûûjûria mûbango jwaawe jûrîa augîrîte jwegiî antû ba Babiloni.

¹³ Wûi kîrî gwe ûtwîre nthîgûrû ya ndûûjî inyiingî gwe ûtwîre ûtongeene. Mûthia jwaaku jûgûkinya nîûntû îgiita rîaaku rîa gûkua rîgûkinya.

¹⁴MWATHANI Mweneinya nî aciîtîtie auga atîrî: “No mwanka mbûreetere antû babaingî ta ngigî ba kûbwithûkîra, nabo bagakuura kwonania ûûmbani.”

¹⁵Mûrungu nîwe woombîre nthîgûrû na inya yaawe aramîîka arîa îrî na ûûme bwaawe na aratambûrûkia îgûrû.

¹⁶Aaragia rûûjî rûkaambîrîria kûringana kûu îgûrû; atûmaga matu joothûrana kuuma ituri bionthe bia nthî; Nîwe ûreetaga ndweni rîrîa gûkuura, na akarekeeria ruuo kûrîa arwîkaga.

¹⁷Antû bonthe nî biaa bitî ûûme, aturi ba thaabu beekîrithagua nthao nî mîrungu yaao ya mîng'uanano, nîûntû mîng'uanano îîu ya chuuma tî mîrungu ya mma na îtî mwoyo.

¹⁸Mîrungu îîu ya mîng'uanano nî ya ûtheri buru na nî ngûgî ya gûciayia. Nayo rîrîa îgaatuîrwa îkaathirua buru.

¹⁹Îndî Mûrungu wa Jakubu atîkarî ta yo, nîkwîthîrwa nîwe woombîre into bionthe na Israeli nî antû baawe barîa aithuurîrîte. Riîtwa rîaawe nî MWATHANI Mweneinya.

²⁰MWATHANI arîîra Babiloni atîrî, “Gwe ûrî nchûgûma yaakwa ya ndwaa, nîgwe ndaatumagîra kûthetheera mîgongo na kûthiria moonene.

²¹Nîgwe ndaatumagîra kûthiria mbarathi na eetithia baacio; na kûthiria ngaarî cia ndwaa na eetithia baacio.

²²Ndaagûtumagîra kûûraga aka na arûme; barîa akûrû na barîa baanake. Nîgwe ndaatumagîra kûûraga tûîjî na twaarî.

²³Gwe ndaagûtumagîra kûûraga ndîîthia na arîîthi baacio; ndaagûtumagîra kûûraga arîmi na mûraû, amwe na ndeegwa ciaaju; na ndagûtumîra kûthetheera anene na arûngamîîri baarîa baathanaga amwe nabo.”

²⁴MWATHANI ariuga atîrî, “Ngaakanûkia Babiloni na antû bonthe barîa batwîre ku, bûtegeete na meetho jeenu nîûntû bwa ûthûûku bunthe bûrîa baathithîîrie Zaiûni.

²⁵Babiloni, ni ndî mûnthû waaku. Babiloni gwe ûrî inya ta kîrîma gwe ûthûûkangîtie nthîgûrû yonthe. Ngatambûrûkia njara nkûgwate nkwingiritie kuuma maigeene jau ûtegeki nkwethie kîrîma kîîthîîtue, nîu ûûni MWATHANI nkuuga.

²⁶Kuuma kîrî gwe gûtîonora maiga ja waaki îndî gwe ûgatûûra ûrî îgaanjo nîu MWATHANI akuuga.

²⁷Onieni antû ba mîgongo rwano rwa gwîta ndweene, nthîgûrû ciûkîrîîrie bendera na bûringe tarumbeta ciîtîte ndweene. Îîra Njûûrî ya mûgongo jwa Ararati, na jwa Mini, na jwa Ashikenazi ithûkîre Babiloni. Nî bathuure mûtongeeria, beete ndweene barî na mbarathi inyiingî ta ngigî.

²⁸Thuranîreeni mîgongo nîkenda ithûkîra Babiloni bûtûmanîre anene ba Media, amwe na atongeeria ba njûûrî cia nthîgûrû irîa yaathaga.

²⁹Nthîgûrû iinainîte na yateetema îrî na mûrimo nîûntû mûbango jwa MWATHANI jwa kweethia Babiloni îgaanjo rîtîtûûri nî antû jûrî akuî kûûjûra.

³⁰Nchamba cia Babiloni cia ndwaa igûtiga kûrwaa ikarîte bitiiroone biaacio. Bathirîri nî inya na ûtîu boomba kûthithia. Ikaro bia ntûûra nî bicinîtue mwanki na mpingîro ciaayo ciaunangwa.

³¹Antû barîûgîa bathingatanîte gwîta kwîra mûnene wa Babiloni atî ntûûra nî iithûkîri kuuma nteere cionthe.

³²Mariûko ja ndûûjî nî jataîtwe nacio nthingo irîa ndikie nî ciîthîîtue nacio njûûrî nî igwati nî ûguaa bûbûnene.”

³³MWATHANI Mweneinya, Mûrungu wa Israeli ariuga ûjû: “Ntûûra ya Babiloni îgakara ta îtîîri rîkûûrîrwa mwere rîrîa îgakinyangîrwa nthî, na îgiita rîa kûmîketha rîrî akuî gûkinya!”

³⁴Antû ba Jerusalemu bariuga atîrî, “Nebukadineza mûnene wa Babiloni nî aathirîrie ntûûra ya Jerusalemu buru. Aataîre ntûûra îratigwa îrî întheri aramîrîa o ta ûrîa nyamû îmbîî îthithagia, birîa atigarîrie, arata.

³⁵Israeli nî yuuge, ‘Ûthûûku bûrîa tuî na aana beetû twoneete bûrocokera Babiloni.’ Jerusalemu nayo nî yuuge, ‘Tharike yeetû îrocokera Ababiloni.’”

³⁶Tontû bûû, MWATHANI ariuga atîrî, “Nkabûteteera mbûûrîîrie nîûntû bwa ûrîa babûthithîrîtie. Nkanyaaria ndûûjî cia Babiloni, kûrîa ciumaga kûûme buru.

³⁷Babiloni nayo îkaa kîthûmba kîa îgaanjo kûrîa mbîrwa îgakaraga, yee gîntû gîa kûmeneerua gûtîtûûri nî antû.

³⁸Ababiloni bakaruuma ta ngatûnyi barîranîre ta bianaana bia ngatûnyi.

³⁹Rîrîa barî na mpara nkaabathithîria kîatho ntûme boogite na bagwîrue Nabo beeta kûmama batîûkîîra kaîrî. Ûu nîu ûûni MWATHANI nkuuga.

⁴⁰Nkaabaikia kîthînjîroone bakathînjwe ta ntûrûme kana nthenge.”

⁴¹MWATHANI nî aarîrie mantû jegiî Babeli arauga atîrî, “Babiloni ntûûra îrîa îkumagua nî nthîgûrû yonthe yeete gîntû gîa kûmakania îkîonwa.

⁴²Anthû bakari ta îria riunûkîrîte ntûûreene ya Babiloni Bakari ta mîgombe îkondoretie ntûûra.

⁴³Tûtûûra tûrîa tûmîthiûrûkîrîte tweetheetue maganjo, twakara ta rwanda rûrûûmo rûtîtûûri nî antû na antû batîîtagîîra ku.

⁴⁴Ngakanûkia mûrungu jwa mûng'uanano jûrîa jwîtagwa Beli jûrîa jûrî kûu Babiloni, ntûme jûtaîke kîrîa jûmeretie. Antû ba mîgongo batîkorweta Babiloni kûjûthaathayia kaîrî rûthingo rwa Babiloni nî rûmomorangi.

⁴⁵Antû ba Israeli ûmeeni Babiloni, matûkeeni bûtîkeeje kûûraganîrua na antû ba ntûûra îîu nkîbakanûkia na mûthûûro.

⁴⁶Bûgákueni nkoro kana bûkîra nîûntû bwa nteto iu bûkwigua nthîgûrûûne. O mwaka o mwaka nguutû ta iu nî ciaragua, nguutû cia kwîthîrwa kûrî na ndwaa nthîgûrû îkîrûjaga na îngî.

⁴⁷Tontû bûû, rî, îgiita nî rîîjîte, rîrîa ngakanûkia mîrungu ya mîng'uanano ya Babiloni nayo nthîgûrû îîu yonthe îgeekîrithua nthao. Antû baayo bonthe bakooragwa bathiranîrue nayo.

⁴⁸ Nayo nthîgûrû na îgûrû na bionthe birîa birî ku bikaina na nkerû rîrîa Babiloni îkathirua, nîûntû amiithûkîri bakauma bwa ûrîo. Ûu nîu ûûni MWATHANI nkuuga.

⁴⁹ Babiloni no mwanka îthirue nîûntû nî yooraagîre antû ba Israeli yooragîre antû nthîgûrûûne kunthe.”

⁵⁰Ningî MWATHANI nî aarîîrie antû ba Israeli barîa baarî Babiloni arabeera atîrî, “Buî bwonokeete ndweene, Îteeni na menya bûrûngama. Kinya bwethîrwa bûrî kûraaja ririkanageeni MWATHANI na bûkaririkana Jerusalemu.

⁵¹Buî bûriuga atîrî, ‘Tuî nî tûmeni na twîkîrithîûtue nthao na tûtî na inya kaîrî nîkwîthîrwa anthû nî batonyete antû arîa kûtheri mono kîûrûûne.’

⁵²Tontû bûû, îgiita nî rîîjîte rîrîa ngakanûkia mîrungu ya mîng'uanano ya Babiloni. Antû baayo bakeethîrwa beekîri ngûma bakeethîrwa bagwîte kunthe bagîkaaga nî ûrûrû.

⁵³Kinya Babiloni îgaitia bwa îgûrû na kinya îgaaka nthingo indikie indaaja no mwanka iithûkîrwe na îthirue. Ûu nîu ûûni MWATHANI nkuuga.”

⁵⁴MWATHANI ariuga atîrî, “Igueni kîrîro kuuma Babiloni bwigue kîrîro nthîgûrûûne ya Akalidea nîûntû nî înyangîtue mono.

⁵⁵Nîkwîthîrwa MWATHANI akathiria Babiloni akirie kajû kaayo buru. Njûûrî ciûgîîte kîrî yo ta mîgombe îmînene ciaithûkîra Babiloni igîkuuraga.

⁵⁶Njûûrî ciîtîte kwithûkîra Babiloni Asikarî ba Babiloni bagwatwe na moota jaao jaunangwe. Nîkwîthîrwa ûûni MWATHANI Mûrungu ni nkanûkagia antû na ngakanûkia Babiloni ûrîa kwaagîrîte.

⁵⁷Nkaanyuithia atongeeria baayo boogite amwe na antû baayo barîa boome, na nyuithie atongeeria baayo ba njûûrî, amwe na asikarî baayo. Nabo bamama batîûkîîra kaîrî. Nîu ûûni Mûnene nkuuga, ûûni ûrîa wîtagwa MWATHANI Mweneinya.”

⁵⁸MWATHANI Mweneinya ariuga ûjû: “Nthingo irîa ndaaja cia Babiloni îkagwîthua na mpingîro ciaayo irîa nene ciîthue. Into birîa antû ba mîgongo bacwaga bikaûrîra mwankiine.”

⁵⁹Kûrî mwakeene jwa îna jwa waathani bwa Zedekia mûnene wa Juda, kîroria Jeremia nî eerîre Seraia mûtaana wa Neria nteto irîa akaathoma eeta Babiloni. Neria aarî mûtaana wa Mahaseia. Seraia nîwe waatumîkagîra Zedekia mûnene wa Juda.

⁶⁰Jeremia nî aandîkîre moothûûku jonthe jarîa jakeejîîra nthîgûrû ya Babiloni yukuune.

⁶¹Jeremia areera Seraia atîrî, “Weeta Babiloni woone ûkûthomera antû mantû jaja jonthe.

⁶²Naagwe ûrombe uuge ûjû, ‘Itû MWATHANI gwe nî uugîîte atî ûkaathiria Babiloni, mwanka kwage gîntû kîrî mwoyo ku. Naku kwage muntû kana nyomoo, gûkare ta rwanda mwanka kenya.’

⁶³ Naagwe Sereia wathiria kûthoma yuku rîu, ûrîogeere iigeene ûcoke ûrîgere rûûjîîne rwa Eufurate.

⁶⁴Ningî uuge atîrî, ‘Ûu nîu Babiloni îgakara. Yaathirua îtîcoka gûûkîîra kaîrî nîûntû bwa ûrîa MWATHANI akamîthiria buru.’” Au nîo nteto cia Jeremia ciaakinyîîre mûthia.