Read KIMERU BIBLE PROTESTANT EDITION Jer 52 Bible Online

Jer 52 - KIMERU BIBLE PROTESTANT EDITION bible

Jer 52

¹Zedekia aarî na ûkûrû bwa mîaka mîrongo îîrî na jûmwe rîrîa aaere mûnene wa Juda. Nî aathanîre arî Jerusalemu mîaka îkûmi na jûmwe. Ng'ina wa Zedekia eetagwa Hamutali, nawe aarî mwarî wa Jeremia wa kuuma Libuna.

²Zedekia nî aathithîrie mantû jamathûûku mbere ya MWATHANI, o ta jarîa jonthe mûnene Jehoiakimu aathithîtie.

³MWATHANI nî aathûûrîrue nî antû ba Jerusalemu na ba Juda mono mwanka arabeenga buru barauma kîrî we. Zedekia nî aareganîre na waathani bwa mûnene wa Babiloni.

⁴ Tontû bûû, Nebukadineza amwe na njûûrî yaawe nî baaithûkîîre Jerusalemu kûrî ntukû ya îkûmi, ya mweri jwa îkûmi, mwakeene jwa kenda jwa waathani bwa Zedekia. Nebukadineza na njûûrî ciaawe baraaithûkîra Jerusalemu baramîcîgîîria kunthe.

⁵Nabo bakarîre bacîgîîrîîtie ntûûra mwanka mwaka jwa îkûmi na jûmwe jwa waathani bwa mûnene Zedekia.

⁶Nayo ntukû ya kenda ya mweri jwa îna o mwakeene jûu, mpara nî yaingîîre mono na antû bataarî na gîa kûrîa.

⁷ Rîu nîrîo nthingo cia ntûûra ciakoborerwe, nacio njûûrî cionthe irauma ntûûreene iramatûka kûrî ûtukû. Cietîrîîre kamuundeene ka mûnene na iratonyeera mpingîroone îrîa îrî gatîgatî ka nthingo cio-ijîîrî, irauma ireeta bwa rûteere rwa bwa kîguuru kîa Jorodani.

⁸Îndî njûûrî ya Babiloni nî yeenganîre na mûnene Zedekia îramûgwatagwatîra bûûrîîne ya Jeriko. Nayo njûûrî ya Zedekia yonthe îraaraganua îramûtiganîîria.

⁹Nacio njûûrî cia Babiloni iragwata mûnene Zedekia iramwikia ntûûreene ya Ribula nthîgûrûûne ya Hamathi kîrî mûnene wa Babiloni. Kûu nîku mûnene wa Babiloni aagiitîîre Zedekia îgamba.

¹⁰Mûnene wa Babiloni arooraga ataana ba Zedekia, Zedekia ategeete, ningî arooragîra atongeeria ba Juda bonthe au ntûûreene ya Ribula.

¹¹ Ningî nî aatûrangîre Zedekia meetho na aramûtheeka na nyororo, na aramûjûkia aramwikia Babiloni kûrîa amwîkîre ncheera mwanka ntukû îrîa aakuîre.

¹²Kûrî ntukû ya îkûmi, ya mweri jwa îtaano, mwakeene jwa îkûmi na kenda jwa waathani bwa Nebukadineza mûnene wa Babiloni, mûtongeeria wa njûûrî ûrîa waeejaga mûnene kîrîra, nî aatonyere Jerusalemu. Mûtongeeria ûu wa njûûrî eetagwa Nebuzaradani.

¹³ Nî aaîthîrie kîûrû, na gîkaro kîa mûnene, na nyomba cionthe cia Jerusalemu. Aaîthîrie nyomba cionthe irîa ciaarî gîtûmi.

¹⁴Nacio njûûrî cia Babiloni cionthe irîa ciaarî amwe na mûtongeeria ûu Nebuzaradani nî ciaamomorangîre nthingo cionthe irîa ciaathiûrûkîrîte ntûûra ya Jerusalemu.

¹⁵Ningî Nebuzaradani nî aataîre atae bamwe barîa baarî nkîa buru, na antû barîa baatigeere ntûûreene, na barîa baarî bakuinenkanîra kîrî waathani bwa mûnene wa Babiloni, amwe na aaki barîa baatigeere.

¹⁶Îndî Nebuzaradani nî aatigîre antû barîa baarî nkîa buru nîkenda bamenyagîîra mîzabibû na barîmaga miuunda.

¹⁷ Nabo antû ba Babiloni nî baunangîre na gûkûûra itugî bia îturutia birîa biaarî kîûrûûne, ningî barathûûkangia tûgaarî, na gîtangi kîa îturutia kîrîa kîaarî ku. Baracoka baraikia îturutia rîu Babiloni.

¹⁸Ningî barajûkia nyongû, na iciko, na mîgwati ya kworia ntambi na mpakûri irîa ciatumagîrwa kwaambîrîria tharike ya kîgongwa na into bia kwîthîria ubaani, na into bionthe bia îturutia birîa biatumagîrwa kîûrûûne.

¹⁹Barajûkia tûmpakûri tûrîa tûniini, na into bia gûkamata makara ja mwanki, na mpakûri îrîa ciatumagîrwa kwambîria tharike ya into birîa biaritagwa kîgongwana, na nyongû irîa ciîkagîrwa mûju, na itugî bia kûrîkîîra taawa, na into bia ubaani, na mpakûri cia kîgongwana gîa gwîtûûrîria. Mûtongeeria ûu wa akaria nî ajûkîrie into birîa biaarî bia thaabu na bia fetha.

²⁰Înto bia îturutia birîa biathithîtue nî Solomoni nîûntû bwa kîûrû bîarî na ûrito bûbûnene mono. Nabio biaarî bibi: îtugi birîa biîrî, na gîtangi, na ndeegwa cia îturutia irîa ikûmi na ijîîrî, irîa ciaarî rungu rwa gîtangi, na tûgaarî.

²¹Îtugî birîa biîrî nî bianguanene. O gîtugî kîaarî kîa ûraaja bwa mita kenda (9m) na wariî kûthiûrûka bwa mita ithaathatû (6m). Nabu ûmatu bwaabio bwaarî milimita mîrongo mûgwanja na ithaano (75mm), na nî biaarî na gîkurungu.

²²Îgûrû rîa itugî biu kwaarî na biûmbwa bia îturutia. O kîûmbwa kîaarî kîa ûraaja bwa mita ijîîrî na nusu (2.5m), nabio biagemetue na mwîîndo jwa îturutia jwakari ta rûgara rwa mîkukumanga.

²³Nteere cia biumbwa biu kwathithîtue mîkukumanga mîrongo kenda na îtantatû (96). Mîkukumanga yonthe îrîa yaathithîtue mwîîndoone jûu nî îgana rîmwe (100).

²⁴Nebuzaradani ûu mûtongeeria wa akaria nî aajûkîrie mûthînjîri-Mûrungu ûrîa mûnene tawe Seraia, na Zefania mûthînjîri-Mûrungu ûrîa ûthingatîte ûu ûngî, na akaria barîa bathatû baakaragia kîarago gîa kîûrû, arabaeethia atae.

²⁵Ningî ntûûreene arajûkia mûtongeeria ûrîa warûngamîrîte antû ba ndwaa aramweethia mûtae, amwe na akûrû mûgwanja barîa baarî ntûûreene barîa baathaga mûnene kîrîra. Arajûkia mwandîki wa mantû ja njûûrî aramweethia mûtae, amwe na antû bangî mîrongo îtaantatû (60) barîa baarî ba îgweeta ntuûreene îu.

²⁶Nebuzaradani arabajûkia arabaikia ntûûreene ya Ribula kîrî mûnene wa Babiloni.

²⁷Mûnene wa Babiloni arabaûûra ibooko na arabooragîra kûu ntûûreene ya Ribula nthîgûrûûne ya Hamathi. Tontû bûû, antû ba Juda baraikua kîthamîrioone, kuuma nthîgûrûûne yaao.

²⁸Nabo antû barîa Nebukadineza aataîre araikia kîthamîrioone baarî baba: mwakeene jwa mûgwanja kuuma akwambîrîria kwaathana nî ataîre Ayahudi ngiri ithatû cia mîrongo îîrî na bathatû (3,023).

²⁹Mwakeene jwa îkûmi na înaana kuuma akwambîrîria kwaathana, arî Jerusalemu aataîre antû magana janaana ja mîrongo îthatû na baîrî (832).

³⁰Mwakeene jwa mîrongo îîrî na îthatû jwa waathani bwa Nebukadineza, Nebuzaradani mûtongeeria wa akaria nî aataîre Ayahudi magana mûgwanja ja mîrongo îna na bataano (745). Antû bonthe barîa baataîrwe baraikua kîthamîrioone baarî ngiri inya cia magana jatantatû (4,600).

³¹Mwakeene jûrîa Evili-merodaki aaere mûnene wa Babiloni, nî aigîrîîrue mûnene Jehoiakini kîaao aramûrita ncheera. Aamûrekererie kûrî ntukû ya mîrongo îîrî na ithaano, ya mweri jwa îkûmi na îîrî mwakeene jwa mîrongo îthatû na mûgwanja kuuma rîrîa Jehoiakini mûnene wa Juda aagwatîrwe.

³²Evili-merodaki araigîîrua Jehoiakini kîaao aramwaa gîtîîo gîkînene nkûrûki ya anene bangî bonthe barîa baarî nawe kîthamîrioone kûu Babiloni.

³³Tontû bûû, Jehoiakini araeewa rûûtha, ararita nguû irîa aarî nacio ncheera. Ntukû cionthe nî aarîjanagîra na mûnene.

³⁴Ningî nî aaejagwa into bionthe birîa aarî na ûbatu nabio rîrîa rîonthe aarî mwoyo.