Read KIMERU BIBLE PROTESTANT EDITION Jer 6 Bible Online

Jer 6 - KIMERU BIBLE PROTESTANT EDITION bible

Jer 6

¹Buî antû ba Benjamini matûkeeni bûgaciithe, buume Jerusalemu buru. Ringeni tarumbeta kûu Tekoa, na bûgwatie inyinga bia kwonania ûgwati kûu Bethihazikeremu. Nîkwîthîrwa ûthûûku na wînyangia nî buumîte bwa ûrîo.

²Nkaathiria ntûûra ya Zaiûni kinya këethîra nî înthongi na ya ûkiri.

³Arîîthi, barî na mbûri na ng'ondu ciaao, bakaithûkîra Jerusalemu, baambe maema jaao kûmîthiûrûkîra, barîîthie o muntû antû arîa arî.

⁴Nabo bariuga, “Ithuranîreni tûrwee na Jerusalemu Umagareni tûbaithûkîre thaa thita. Îî, tûkûûra, nîûntû ntukû gaîkûthîra, nîkwîthîrwa riûa rîrî akuî kûthwaa.

⁵Ûkîîreeni tûmiithûkîre na ûtukû tûthirie ikaro bia anene baayo.”

⁶Nîkwîthîrwa MWATHANI Mweneinya ariuga ûjû: “Rekeeni mîtî ya Jerusalemu bûûmbe mîkûmbû ya gûtumîra ndweene kûmîthiûrûkîra. Ntûûra îîu no mwanka îthirue nîûntû gûtî bûngî îtwîrie tiga kwinyîrania.

⁷O ta ûrîa kîthima gîkaraga gîkîritaga rûûjî nîo u Jerusalemu îkaraga îkîritaga ûthûûku bûbwerû. Ndeene yaayo kuumaga tûjû twa ndwaa na twa wînyangia. Mbîthagîrwa ndî na mûrimo na ngûma magiita jonthe.

⁸Imenyeere gwe Jerusalemu ntîkeeje gûgûteejanîria, ûtuîka nthîgûrû îtîtûûri nî muntû.”

⁹MWATHANI Mweneinya ariuga ûjû: “Ketha matigari ja Israeli o ta ûrîa mûzabibû jûkethagwa, ûtambûrûkie njara ûkethe mpang'i kaîrî o ta ûrîa mûkethi nzabibû athithagia.”

¹⁰Nûû nandî nkwarîria nîkenda aabagondokera, nabo baigua? Atîrî, matû jaao nî jaingi, batîûmba kwigua. Rûteto rwa MWATHANI kîrî bo, nî gîntû gîa kûmeneerua, na batîrwendaga.

¹¹Mûthûûro jwa MWATHANI nî jûmbûjûrîte na nî noogeete gûkara naju. “Jûtûrîkîrie kîrî aana njîreene, na kinya biûthûranoone bia antû babeethî. Ningî mûkûrû na mwekûrû waawe bagaakindwa nîju, na kinya barîa bakûrîte mma baatindira.

¹² Nyomba ciaao ikaanenkanîrwa kîrî antû bangî, o amwe na miuunda yaao na aka baao. Nîkwîthîrwa ngaakanûkia atûûri ba nthî îîjî,” nîu MWATHANI akuuga.

¹³“Tontû bo bonthe kuuma ûrîa mûnini gwata ûrîa mûnene, nî babakoroku mantûûne jegiî waayia. Ningî kuuma kîroria gwata mûthînjîri-Mûrungu bonthe nî arongo.

¹⁴ Bo no kuua bakuua antû baakwa ironda, bakîbeeraga ‘Kûrî na thîîrî, kûrî na thîîrî!’ O rîrîa gûtî thîîrî îrî o.

¹⁵Kûrîîndî baaigagua nthao rîrîa baathithagia mantû jamathûûku? Arî bo! Bataaigagua nthao. Kinya moothiû jaao jataatuka nîûntû bwa meeyia jaao. Tontû bûû, bakagwa nthî o ta barîa barîîkîtie kûgwa. Rîrîa nkaabakanûkia, bakoombwa buru.” Nîu MWATHANI akuuga.

¹⁶ MWATHANI nî eerîre antû baawe ûjû: “Rûngameni macemanîrio ja njîra, bûraithîrie, bûûrithîrie njîra îrîa ya mbere, naabuî bûmîthingate, nîkenda bwona kînogoko.” Îndî bo barauga, “Tûtîthingata njîra îîu.”

¹⁷Ndaabûnenkeere akaria, ndîrabeera, “Thikagîîreni kajû ka tarumbeta.” Îndî nabo barauga, “Tûtîthikîîra.”

¹⁸Tontû bûû, nthikîîreeni buî mîgongo, naabuî biûthûrano bwigue ûrîa nkaathithîria antû baakwa.

¹⁹Igueni buî antû ba nthîgûrû, atîrî, nî ndeetereete antû baba ûthûûku nîûntû nî maciara ja njîra ciaao, nîûntû batîtindanîrîte na nteto ciaakwa, nabu Waatho bwaakwa nî babûregeete.

²⁰Ubaani îrîa ndeetagîrwa kuuma Sheba nî yaakî? Kana macoco jarîa jaumaga nthîgûrû cia kûraaja nî jaakî? Igongwana bieenu bia gwakîîria bitîngwîragia, na ntîbiîtîkîîria.

²¹Tontû bûû, MWATHANI ariuga ûjû: “Atîrî, ngeekîîra antû baba itinkî birîa bikaabagiitaragia. Aciari na aana baao, atûûri baao na acoore baao bakaathirua.”

²²MWATHANI ariuga ûjû, “Atîrî, antû nî baumîte nthîgûrû ya bwa ûrîo, mûgongo jûmûnene nî jûûkaûkîte juumîte kûraaaja mîthia ya nthîgûrû.

²³Nabo bagwete moota na mîthîrî, na nî antû babaî batî kîaao, barîkinya nthî îkaruruma ta mîgombe ya îria. Beetithîtie mbarathi, baibangîte nîûntû bwa ndwaa beejîte kûrwaa naagwe Jerusalemu.”

²⁴Tuî nî twigîîtue mantû jau, naatuî njara cieetû nî igoogoi buru nîûntû bwa kwaga ûgîîte. Nî tûgwati nî ûrûrû ta ûrûrû bwa mûka akîewa mwana.

²⁵Menya buumagara bwîta bûûrîîne kana bwîtaîta njîreene nîûntû mûnthû arî na rûchiû na nteere cionthe kûrî na maitha.

²⁶Buî antû ba Jerusalemu îkîreni ithango, bwitugutie mûjuune. Ithikîîreeni ta muntû ûkûrîrîra mûtaana waawe wa mûûmwe, bûgie na kîrîro gîkînene. Nîkwîthîrwa o ntûti mwînyangia agaakwîjîîra.

²⁷“Jeremia, kîrî antû baakwa nkweethetie mûcûnkûûni wa chuuma, nîkenda ûcûnkûûnaga mîîtîre yaao ûmîmenya.

²⁸Antû baakwa bonthe nî ndemi injûmo nkoro, bo beetaga bakîaragia ûrongo, na bakari ta îturutia na chuuma, birîa birootaga, na bonthe barî mathithio jamathûûku mono.

²⁹Nkunîi îîkîrîîtwe mwanki jûmwingî îndî chuuma îtîgûkeruka, chuuma îrîa ntheru buru îtigwa. Antû barîa baaî batîkûthira.

³⁰Bo nî ta macuunko ja fetha jarîa jateejagwa, nîkwîthîrwa MWATHANI nî abaregeete.”