Read KIMERU BIBLE PROTESTANT EDITION Jer 7 Bible Online

Jer 7 - KIMERU BIBLE PROTESTANT EDITION bible

Jer 7

¹MWATHANI nî aarîîrie Jeremia aramwîra atîrî,

²“Rûngama mpingîroone ya nyomba ya MWATHANI ûtûmîîrie mantû jaja ûûge, ‘Thikîîreeni rûteto rwa MWATHANI buî bwinthe antû ba Juda barîa bûkûrûkaga na mpingîro iji bwîjîte kûthaathayia MWATHANI.’”

³MWATHANI Mûrungu Mweneinya, Mûrungu wa Israeli ariuga ûjû, “Thondekeni mîîtîre yeenu na mathithio jeenu naani rîu nkaareka bûtûûre gûntû gûkû.

⁴Tigeeni gûciayia na nteto itî cia mma bûkiugaga, ‘Gîkî nî kîûrû kîa MWATHANI, gîkî nî kîûrû kîa MWATHANI, gîkî nî kîûrû kîa MWATHANI!’

⁵Nîkwîthîrwa bwaathondeka mîîtîre yeenu bwega na mathithio jeenu, bwathithanîria mantû ja îota muntû na mûtûûri waawe;

⁶na bwethîrwa bûtîinyîîria ageni, na aana barîa batî na aciari kana ntigwa; ningî bwethîrwa bûtîîtûûra tharike ya antû batîîtie gûntû gûkû, kana bûthingatana na mîrungu îngî îbûthûûkia;

⁷rîu nkaareka bûtûûre gûntû gûkû, nthîgûrûûne îrîa karaaja ndaaere biûjûjû bieenu yaa yaao mwanka kenya.

⁸“Atîrî, bwîtîkîtie nteto cia waayia na gûtî u ikaabûguna.

⁹Nîka bûkaiyaga, na bûkooragana, na bûkathûngîîra, na gûciîtagia na ûrongo, na kwîîthagîria Baali ubaani, na kûthingataga mîrungu îngî îrîa bûtiijî,

¹⁰îndî rîu bûkeeja kûrûngama mbere yaakwa nyomba îîjî îgwetanagîrua na riîtwa rîaakwa bûkaugaga, ‘Tuî nî twonoketue,’ îndî bûgeeta na mbere kûthithia mantû jau jonthe jamathûûku.

¹¹ Nîka nyomba îîjî îgwetanagîrua na riîtwa rîaakwa îtuîkîte gîciitho gîa atuunyani meethoone jeenu? Atîrî, ûûni ningwa nî mboneete mantû jau,” nîu MWATHANI akuuga.

¹² Nandî îteeni Shilo kûrîa nyomba îrîa ndaathathaîrua kîambîrîriene yaarî, bûcionere ûrîa ndaathithîîrie antû au nîûntû bwa ûthûûku bwa antû baakwa Israeli.

¹³Nîkwîthîrwa buî nî bûthithîtie mantû jaja jonthe, kînya këethîra ni nkarîte nkîbwaragîria magiita jonthe, buî nî bûregeete kûnthikîîra, na ndaabwîta bûkarega gûncokeria, nîu MWATHANI akuuga.

¹⁴Tontû bûû, nkaathithîria nyomba îîjî îgwetanagîrua na riîtwa rîaakwa, îrîa buî bwîtîkîtie, na gûntû gûkû ndaaere biûjûjû bieenu amwe naabuî, o ta ûrîa ndaathithîîrie Shilo.

¹⁵Ningî nkaabûta buume meethoone jaakwa o ta ûrîa ndaateere antû ba ndûgû cieenu bonthe, tabo nchiarwa cia Efuraimu.

¹⁶MWATHANI arambîîra atîrî, “Îndî gwe Jeremia menya ûrombera antû baba. Ûkaabarîrîra, kana ûbarombera, kana ûbeerencanîîra kîrî ni, nîûntû ntîkûthikîîra.

¹⁷Ka ûtîkwona ûrîa baakûthithia ntûûreene cia Juda na njîreene cia Jerusalemu?

¹⁸ Aana bariuna nkû, beethe bagaakia mwanki, aka nabo bagakima mûtu, nîkenda barugîra mûrungu jwa mûka jwa îgûrû mîgaate. Ningî barîritîra mîrungu îngî igongwana bia gwîtûûrîria nîkenda banthûûria.”

¹⁹MWATHANI ariuga ûjû, “Bûriuga nî ni bakûthûûria? Anga tî bo bongwa bagûciangaratania na bakaithaithia.”

²⁰Tontû bûû, MWATHANI Mûrungu ariuga ûjû, “Atîrî, ngatûrîkîria antû ba gûntû gûkû mûthûûro jwaakwa jûmûnene, na nyomoo, na mîtî, na imera bia nthîgûrû. Nabio bikaaya na mwanki jûtîorua.”

²¹MWATHANI Mweneinya, Mûrungu wa Israeli ariuga atîrî, “Ringanîreni igongwana birîa bûnditagîra bia gwakîîria, na igongwana bingî bieenu, bûbirîe bionthe.

²²Nîkwîthîrwa rîrîa ndaaritîre biûjûjû bieenu nthîgûrû ya Misri, ntaabiîrîre binditagîre igongwana bia gwakîîria kana igongwana bia mûthemba jûngî.

²³Nî ndaabiîrîre rîaathana rîrî atî, ‘Bwathîkagîre kajû gaakwa naani nkaa Mûrungu weenu, naabuî bûkaa antû baakwa. Ningî îtageeni na njîra îrîa yonthe nkaabwîrîra, nîkenda mantû jeenu jaa jameega.’

²⁴Îndî bo bataathîkîîre kana noo bathikîîra. Tontû bwa ûûmo bwa nkoro ciaao, nî baathingatîre mathûgaanio jaao bongwa na mairîrîîria jamaaî ja nkoro ciaao, baracoka na nyuma antû a gwîta na mbere.

²⁵Kuuma ntukû îrîa biûjûjû bieenu biaumîre nthîgûrûûne ya Misri mwanka naarua îîjî, nkarîte magiita jonthe nkîbitûmagîra nthûûmba ciaakwa iroria o ntukû o ntukû.

²⁶Îndî amwe na jau bitaanthikîîra, kana bimbigua, îndî nîka biomîrie mîtwe, birathithia mantû jamathûûku nkûrûki ya biûjûjû biaao.

²⁷Tontû bûû, kinya wabeera mantû jau jonthe, batîkûthikîîra. Ûkaabeeta îndî batîgûcokeria.

²⁸Naagwe ûbeere ûjû, ‘Jûjû nîju mûgongo jûrîa jûregeete kûthikîîra kajû ka MWATHANI Mûrungu waao. Ningî nî jûregeete kwathîka. Ûûma nî bûûrîte buru, bûtîonora tûnyueene twa antû ba mûgongo jûu.’” MWATHANI ariuga atîrî,

²⁹“Enjeni mîtuundu bûmîte, bwitie irîmeene bitî mîtî bwirîrîre, nîûntû MWATHANI nî aregeete na atiganîria nthukî îîjî îmûthûûrîtie.

³⁰Nîkwîthîrwa antû ba Juda bathithîtie ûthûûku meethoone jaakwa, nîu MWATHANI akuuga. Nî beekîte mîrungu yaao ya mîng'uanano nyomba îrîa îgwetanagîrua na riîtwa rîaakwa baamîîkîra mûgiro.

³¹ Ningî nî baakîte kîritîro gîtûmbîîne antû-arîa-kûritagîrwa-igongwana gwîtagwa Tofethi kîguuruune kîa Hinomu, nîkenda baritaga aana baao barî igongwana bia gwakîîria. Ûûni ntaabeera bathithie mantû ta jau kana kinya njathûgaanîria.

³²Tontû bûû, îgiita nî rîîjîte rîrîa antû au gûgaatiga gwîtagwa Tofethi, kana Kîguuru kîa Hinomu, gûtue gwîtagwa Kîguuru gîa kîthînjîro, nîu MWATHANI akuuga. Nîkwîthîrwa bakaathika akuû au Tofethi nîûntû gûntû kûngî kunthe gûkeethîrwa kûûjûri.

³³Nabio biimba bia antû baba bikaa irio bia nyoni îrîa îburûkagîra îgûrû na bia nyamû cia kîthaka, na gûtî muntû ûgaaciînga.

³⁴ Naani ngaakiria kajû ga nkerû ntûûreene cia Juda na njîreene cia Jerusalemu. Ningî nthirie kajû ga kûgwîrîrua mûjûkania na mûjûkua kuuma kîrî bo, nîkwîthîrwa nthîgûrû îgaatuîka rwanda.”