Read KIMERU BIBLE PROTESTANT EDITION Jer 8 Bible Online

Jer 8 - KIMERU BIBLE PROTESTANT EDITION bible

Jer 8

¹MWATHANI ariuga atîrî, “Îgiita rîu, marûitû ja anene ba Juda na ja atongeeria ba Juda, na ja athînjîri-Mûrungu, na ja iroria, na ja atûûri ba Jerusalemu jakathikûrwa mbîrîreene ciaao.

²Najo jageekwa au mbere ya riûa, na mweri, na njûûrî yonthe ya îgûrû, birîa bo beendere mono na baabitumîkîra, na baabithingata na baabithaathayia. Najo jatîûthûranua, kana jathikwa. Jagakara ta matî îgûrû rîa nthîgûrû.

³Nabo bonthe barîa bagaatigara ba mûgongo jûjû mûthûûku, o gûntû kunthe kûrîa nkeethîrwa mbanyaganîtie, nî gîkuû bakeenda antû a mwoyo, nîu MWATHANI Mweneinya akuuga.”

⁴MWATHANI nî aambîrîre mbîre antû ba Israeli atîrî, “Ka-muntû akagwa atîûkagîîra kaîrî? Ka-muntû agata njîra atîmîcwaga kaîrî?

⁵Nîkî îndî ûntû antû baba bakaraga magiita jonthe bagîcokaga na nyuma? Bakaraga barûmatîte waayia na batîbûtigaga.

⁶Mbathikîîrîte bwega îndî batîaragia ûrîa kwagîrîte, gûtî muntû wiriraga meeyia jaawe aciûria, ‘Nîatîa ûjû ndaathithia?’ O muntû agwataga njîra yaawe ta mbarathi îmatûkîte îîtîte ndweene.

⁷Kinya namîtoori cia îgûrû nî imenyaga magiita jaacio jarîa icokaga. Nkûngûthikû, na mûgûrû, na mpung'au nî ciijî rîrîa ithaamaga. Îndî antû baakwa batiijî mawaatho ja MWATHANI.

⁸Nîatîa bûkuuga, ‘Tûrî baboome, ningî tûrî na Waatho bwa MWATHANI’ Anga tî aandîki aayia bagarûrîte Waatho bwatuîka bwa ûrongo.

⁹Barîa boome bagaacokerwa nî nthao. Bakaangaratana na batawe. Atîrî, baregeete rûteto rwa MWATHANI nî ûûme bûrîkû barî nabu?

¹⁰ Tontû bûû, nkaanenkanîra aka baao kîrî antû bangî na nenkanîre miuunda yaao kîrî maitha, nîkwîthîrwa bo kuuma barîa aniini mwanka barîa anene, banyontereete kwona into na njîra îtî ya mma. Kuuma kîroria mwanka mûthînjîri-Mûrungu bonthe bathithagia mantû ja waayia.

¹¹ Bo no kuua bakuua antû baakwa ironda bakîbeeraga, ‘Kûrî na thîîrî, kûrî na thîîrî!’ O rîrîa gûtî thîîrî îrî o.

¹²Kûrî rîo baaigagua nthao rîrîa baathithagia mantû jamathûûku? Arî bo! Bataaigagua nthao. Kinya moothiû jaao jataatuka nîûntû bwa meeyia jaao. Tontû bûû, bûkagwa nthî o ta barîa barîîkîtie kûgwa. Rîrîa nkaabakanûkia bakoombwa buru, nîu MWATHANI akuuga.

¹³Naani nkaabathiria buru, nîu MWATHANI akuuga. Gûtî nzabibû igaatigara mîzabibûûne, kana nkûû cionora mîkûûne, na kinya mabûûra jakanyaara nkaabareetera antû ba kûbakinyanga.

¹⁴Nîatîa twakara nthî ki? Tûûthûraneni tûtonye ntûûreene irîa mbirigîre tûkaathirîre ku. Nîkwîthîrwa MWATHANI Mûrungu weetû atûgitîrîte tûthirue. We atûnenkerete rûûjî rwa thumu tûnyua, nîûntû nî tûîîrîtie MWATHANI.

¹⁵Twerîgîrîte kwona thîîrî îndî gûtî munya twona. Twerîgîrîte kûgîa na îgiita rîa kworua îndî rî, nî kûmakua akî twoneete.

¹⁶Kûringa nyiûrû kwa mbarathi ciaao kûriigîîgua muntû arî Dani Nacio mbarathi ndûme ciaao ciatiia nthîgûrû yonthe îkainaina. Nabo beejîte kûthiria nthîgûrû na bionthe birîa birî ku, kûthiria ntûûra na atûûri baayo.

¹⁷Atîrî, nkaabûtûmîra njoka nthangacî irîa itîûmba kûaamua nacio ikaabûrûma, nîu MWATHANI akuuga.”

¹⁸Kwithikîîra gwaakwa gûtîûmba kworua, na nkoro yaakwa nî yaajîtue.

¹⁹Thikîîra kîrîro gîa antû baakwa nthîgûrûûne kunthe. Ka MWATHANI atî Zaiûni? Ka mûnene waayo atî ku? Nîkî tontû bo banthûûrîtie na mîng'uanano yaao ya kûjîyia, na mîrungu yaao mîgeni?

²⁰Antû nabo barauga, “Maketha jagûkûrûka, na thaano îkûthira, îndî tûtîroonokua.”

²¹Nkoro yaakwa îrî na ûrûrû nîûntû antû beetû nî bathirîtue. Naani nî ngwati nî kîmako na kwithikîîra.

²²Ka Gileadi gûtî na ndawa? Ka gûtî ndagitarî ûrîku? Nîkî îndî ûntû antû beetû batîoreetue mîrimo?