Read KIMERU BIBLE PROTESTANT EDITION Jer 9 Bible Online

Jer 9 - KIMERU BIBLE PROTESTANT EDITION bible

Jer 9

¹Wûi këethîra mûtwe jwaakwa nî kîthima kîa rûûjî, na meetho jaakwa tûthima twa rûûjî, ndîngî kûrîrîra antû baakwa barîa booragi ûtukû na mûthenya!

²Wûi këethîra rwanda kûrî na gûntû gwa kûraarwa nî mûgeendi, ndîngî gûtiga antû beetû, ngeeta nkauma kîrî bo. Nîkwîthîrwa bo bonthe tî eetîkua kîrî Mûrungu, îndî nî kîûthûrano kîa aaîrania.

³Nabo bakûmaga mîromo yaao ta moota bakîaria ûrongo, nabu ûrongo bwingîîte bwojûra nthîgûrû, antûûne a ûûma. Nîkwîthîrwa baumaga ûthûûkuune beetîte ûthûûkuune. Ningî bo batîmbijî, nîu MWATHANI akuuga.

⁴O muntû wonthe nî aimenyeere kîrî mûtûûri waawe. Ningî menya eetîkia kinya mûtaana wa ng'ina nîkwîthîrwa o muntû wonthe acwaga njîra ya kwayia mûtaana wa ng'ina, na o mûtûûri wonthe eetaga akîguutaga mûtûûri waawe.

⁵Antû bonthe bakaraga bakîaayia atûûri baao, gûtî muntû waaragia mma. Nabo bairitanîte kwaria ûrongo, bagatumîra inya yaao yonthe kûthithia meeyia na batiriraga.

⁶Batwîre kwinyanîîria na kwayia bangî, nabo nî bambutatîrîte, nîu MWATHANI akuuga.

⁷Tontû bûû, MWATHANI Mweneinya ariuga ûjû, “Atîrî, ga nkaabatheria na mwanki ta ûrîa chuuma îtheragua. Tontû rî, nîatîa ûngî mpûûmbîkia kûthithîria antû baakwa?

⁸Ndûûme ciaao nî ta mîgwî ya ûbai; nî ciaragia ûrongo Muntû aaragîria mûtûûri waawe nteto cia ûkiri na mîromo akî, îndî nkoroone agîcwaga njîra ya kûmûthiria.

⁹Nîka nkarega kûbakanûkîria mantû jau? Nîu MWATHANI akûûria. Nîka nkarega kwirîîria kîrî mûgongo ta jûjû?

¹⁰Ndîûkia kajû mbuge mbu na ndîre nîûntû bwa irîma, na nîûntû bwa gûntû gwa kûrîthia bûûrîîne, nîkwîthîrwa gûntû kûu kunthe nî kûîthîîtue na gûtî muntû ûkûrûkagîîra nao. Tûjû twa ndîîthia tûtiigîkaga ku. Nacio nyoni îrîa îburûkagîra îgûrû na nyamû cia kîthaka nî ciamatûkîre irauma ku.

¹¹Naani nkaeethia Jerusalemu îgaanjo na kîmamo kîa mbîrwa. Nacio ntûûra cia Juda ndithirie buru, itigwe itî na ba gûtûûra ku.”

¹²Nî muntû ûrîkû mûûme ûûmbîkia gûciûra mantû jaja? Nûû wigîîtue kajû ka MWATHANI nîkenda atûmîîria mantû jau? Nîkî tontû nthîgûrû îthûûkangîtue yaakara ta rwanda, mwanka kwëethîrwa gûtî muntû ûkagiitanîîria ku?

¹³MWATHANI ariuga ûjû, “Antû baakwa nî batigîte kwathîkîra Waatho bwaakwa bûrîa ndaabanenkeere, ningî batîathîkîrîte kajû gaakwa, kana bathithia ûrîa mbeerîte.

¹⁴Îndî bo boomîtie nkoro bathingatîte mairîrîîria jaao na bathaathayia mîrungu ya mîng'uanano ya Baali o ta ûrîa baaritanîrwe nî biûjûjû biaao.”

¹⁵Tontû bûû, MWATHANI Mweneinya, Mûrungu wa Israeli ariuga ûjû, “Atîrî, ngatûma barîe irio birî ng'ana na mbanenkere rûûjî rûrî na ûrogi banyue.

¹⁶Naani nkaabanyagania mîgongoone yonthe îrîa bo kana biûjûjû biaao bitaamenya. Ningî nkaabathingatithia rûchiû mwanka mbathirie buru.”

¹⁷MWATHANI Mweneinya ariuga ûjû, “Thûgaania ûrîa mantû jakari, wîîte aka barîa barîraga îgiita rîa gîkuû wîîte aka barîa baijî kûrîra beeje.

¹⁸Nî beeje ntûtî baringe mîthûmba ya mbu naatuî tûrîre, meetho jeetû jeetîke meethori ta rûûjî.”

¹⁹Kûrî kajû ga kîrîro gakwigigua kuuma Zaiûni, gakiugaga, “Nî tûthirîte buru! Twekîrithua nthao imbîî, nîûntû nî tûthaamîtue kuuma nthîgûrû yeetû na nîûntû ikaro bieetû nî bithûkangîtue.”

²⁰Buî aka thikîreeni rûteto rwa MWATHANI bwigue na matû jeenu ûrîa MWATHANI akuuga. Ritaneeni aarî beenu ûrîa kûrîragwa na muntû arîtane ûngî rwîmbo rwa kîrîro.

²¹Tontû gîkuû kîîjîte gîakinya ndiriceene cieetû, gîatonya mwanka nyomba cieetû cia anene. Kîthirîtie twaana njîreene na antû baabeethî biaragoone.

²²Beere “MWATHANI ariuga ûjû: Biimba bia antû bikagwa nthî bikare ta ithûmba bia ntaka bienine. Bikaringwa nthî ta imaanja bia nkano na bitîona wa kûbiûthûrania.”

²³Ningî MWATHANI ariuga ûjû, “Barîa boome nî batige gwikumia na ûûme bwaao, nabo barîa barî inya batige gwikumia na inya yaao, na itonga bitige gwikumia na ûtonga bwaao.

²⁴ Îndî ûrîa wonthe ûkwenda gwikumia nî aikumie nîûntû bwa ûntû bûbû; atî nî athirîtie kûmenyana naani, na akûmenya atî nî ni MWATHANI ûrîa wiganagîîrua kîaao kîrîa gîtîthiraga, na nî nthithanagîria mantû na îota na nkathithanîria ûrîa kwagîrîte. Nîkwîthîrwa mantû jau nîjo ngwîragîrua nîu MWATHANI akuuga.

²⁵“Atîrî, îgiita nî rîîjîte, nîu MWATHANI akuuga, rîrîa ngaakanûkia bonthe barîa barî na rwano rwa kîrîkanîro gîaakwa rwa rûtaano îndî batîûjûragia kîrîkanîro kîu.

²⁶Ngaakanûkia Misri, na Juda, na Edomu, na nchiarwa cia Amoni, na Moabu, na bonthe barîa batûûraga rwanda barîa beenjaga mîtuundu mîthia. Nîkwîthîrwa antû ba mîgongo îîjî yonthe na antû ba Israeli bonthe batîûjûragia kîrîkanîro gîaakwa.”