Read KIMERU BIBLE PROTESTANT EDITION Kîr 1 Bible Online

Kîr 1 - KIMERU BIBLE PROTESTANT EDITION bible

Kîr 1

¹Ntûûra ya Jerusalemu îîrûkîri yatigwa yooruune, yo îrîa îgiita rimwe yoojûri antû! Îkarîte ta mûka ûkuîri, kinya këethîra yaarî ûkumîo mîgongoone îngî. Ntûûra îrîa yakari ta mwarî wa mûnene nandî îtaîtwe yakara ta nkombo.

²Nawe mwarî ûu araaraga kûrîra meethori jakîînamagîîra makaine. Kîrî anyaanya baawe bonthe atîona wa kûmûboreria; acoore baawe bonthe nî bamûgarûkîte, baa anthû baawe.

³Antû ba nthîgûrû ya Juda nî bathirîtie gwikua kîthamîrioone, gûntû kwa mîthangîko na ngûgî indito. Nandî batwîre nthîgûrûûne ingî, na batîonaga antû a kûnogoka. Anthû barîa beenganîte nabo babaguatîre nîûntû nî baarî thîîneene.

⁴Njîra cia gwîta Zaiûni irî na kîrîro, nîûntû gûtî muntû ûgwîîtîîra ku eetîte biathoone. Gûtî muntû ûkûrûkagîîra mpingîroone ciaayo, na athînjîri-Mûrungu baayo nîka bagwikaîra. Aarî ba Jerusalemu bathîînîtue mono bakigwatagwa kwa inya nayo ntûûra yongwa îrî na kîeba.

⁵Anthû baayo nîbo baeete athani baayo, ningî nî bathinyaarîte nîkwîthîrwa MWATHANI nî arekeeretie Zaiûni nîkenda îthîîna nîûntû bwa meeyia jaayo jonthe. Antû baayo bataîtwe bagaikua kîthamîrîoone nî anthû.

⁶Ûthongi bwa Jerusalemu bunthe nî bûthirîte. Atongeeria baayo bakari ta nkûrûngû itîkwona gîa kûrîa; nacio imatûkaga itî na kainya imatûkîîte barîa beenganîte nacio.

⁷Antû ba Jerusalemu nandî barî na mîthangîko baanyaganîrue, nî baaririkanaga ûthongi bwa ntûûra bûrîa bwa mbere. Rîrîa antû ba Jerusalemu baithûkîîrwe nî anthû bataarî na wa kûbateethia. Amiithûkîri nîka baamûthekagîra.

⁸Jerusalemu yaathithîrie meeyia mono nîûntû bûu îragîa rûko mono. Barîa bonthe baamwîkagîîra ka bamîmenagîîria nîûntû bo nî booneete kîthûnû kîaawe; nawe we wengwa aigîîtue mûrimo aithika ûthiû nîûntû bwa nthao.

⁹Rûko rwaawe rwonekanaga o ntûti, îndî we atîthûgaanîria ûrîa agakara nyumeene. Tontû bûû, kûgwa kwaawe nî gûkûnene na atî na wa kûmûboreria. “Itû MWATHANI raithîîria mîthangîko yaakwa nîûntû mwathi waakwa nî oombanîte.”

¹⁰Mûnthû ataambûrûkîtie njara amwiyîra into biaawe birîa biega bionthe; îî we nî ooneete mîgongo îkiithûkîra kîûrû kîaawe gûntû kûrîa MWATHANI aakanîtie antû barîa batî Ayahudi gûkûrûka.

¹¹Antû ba Israeli bonthe nîka bakûrîra bagîcwaa gaantû ga kûrûma; bo barîkûrania into biaao birîa biega na irio nîkenda batûûra mwoyo. “Ndaithîîria itû MWATHANI, woone ûrîa nthîînîte.” Nîu ntûûra îkuuga.

¹²Îrî rîrîra barîa bonthe bagûkûrûkîîra kîrî yo îkiugaga atîrî, “Ntegeeni bwoone, gûtî ûngî woona thîîna ta ûûni; thîîna îrîa MWATHANI andeetereere rîrîa aathûûri.

¹³We aatûmîre mwanki kuuma îgûrû naju jûraîîthia kinya marûitûûne jaakwa. Arangwatia na rûgara arancokia bwa nyuma; antiganîria ndigari na ngirikîte ntukû yonthe.

¹⁴We nî oonere meeyia jaakwa jonthe arajaoogera amwe jonthe; arajacuuria nkingo yaakwa ûrito bwaajo bwanthiriria inya. MWATHANI aranenkanîra kîrî anthû baakwa, nabo nî baarî na inya nkûriki yaakwa.

¹⁵MWATHANI aratiganîîria njûûrî ciaakwa cionthe aratûma antû beeja kûthiria asikarî baakwa. Arathetheera antû baakwa ba Juda ta nzabibû kîmiiriine.

¹⁶Nîkîo gîtûmi nkûrîra; meetho jakarîte jarî na meethori. Gûtî na wa kûmboreria kana wa kûmbîkîra inya kaîrî. Antû baakwa batigi bonka yooruune nîûntû anthû barî na ûûmbani.

¹⁷Antû ba Zaiûni bookîrîîtie njara nîkenda bateethua îndî gûtî muntû ûrî o wa kûbaboreria. MWATHANI nî atûmîte antû ba rûrîîjo rwa Jakubu baithûkîrwa, atûûri baao nîbo baete anthû baao. Anthû baao boonaga Jerusalemu îkari ta gîntû gîkînuunku.

¹⁸Îndî MWATHANI aarî ûûmeene îndî ni ndîrarega kûmwathîkîra Nthikîîreeni buî antû bonthe, bûraithîrie mîthangîko yaakwa. Aarî baakwa na nthaka ciaakwa nî baikîîtue kîthamîrioone.

¹⁹Naani nî ndeetîre anyaanya baakwa îndî barampaîria; athînjîri-Mûrungu baakwa na akûrû baathirîîre ntûûreene bonthe, bagîcwaga biakûrîa, nîkenda batîgaakue

²⁰Itû MWATHANI, nî nkûnyaamaara nî nthangîkîte nkoro nîûntû bwa meeyia jaakwa. Antû baarîûragîrwa njîreene na batonya nyomba no gîkuû.

²¹Igua ûrîa nkûrîra, na ntî na wa kûmboreria. Anthû bonthe baakwa nî bagwîrîtue niuntû nî bagîîtue atî nî ûndeterete thîîna. Tûma ntukû îkinye îrîa waaugîîre atî kinya bo bagaatonya thîîneene.

²²Batuîre kûringana na ûthûûku bwaao bunthe, ûbathithîrie o ta ûrîa ûnthithîrîtie nîûntû bwa meeyia jaakwa jonthe. Ni nogeete nî gûkaya ndathirîrwa nî inya buru.”