Read KIMERU BIBLE PROTESTANT EDITION Kîr 2 Bible Online

Kîr 2 - KIMERU BIBLE PROTESTANT EDITION bible

Kîr 2

¹MWATHANI nî aathûûrîre na arakunîka Zaiûni na muundu. Kinya këethîra yaarî mwago jwa Israeli nî aajûthirîrie buru. Rîrîa aathûûri ataririkana kinya kîûrû kîaawe.

²MWATHANI nî eenyangîrie gûntû kûrîa Aisraeli baatûûraga atî na kîaao; arathiria ntûûra indikie cionthe cia Juda nîûntû bwa mûthûûro jwaawe. Areetera nthîgûrû na atongeeria baayo nthao inyiingî.

³Tontû bwa mûthûûro jwaawe jûmûnene nî athirîtie inya ya Israeli yonthe. Ningî nî aregeere gûteethia Israeli îgiita rîrîa yaithûkiri nî anthû. MWATHANI aaîthîrie nchiarwa cia Jakubu ta ûrîa mwanki jwa rwanda jwîîthagia kunthe.

⁴MWATHANI ni aathûkîîre antû ba Israeli ta mûnthû arooraga barîa twendeete. MWATHANI nî aîthîtie antû ba Zaiûni na mûthûûro jwaawe jûrîa jûkari ta mwanki.

⁵MWATHANI athûûkangîtie Israeli, eenyangia ikaro bia anene baayo bionthe na biitiiro birîa biaki biarika abieethia maganjo. Ningî nî areeterete antû ba Juda kîrîro na kwithikîîra gûtî na mûthia.

⁶Nawe atharîîtie kîûrû kîaawe ta ûrîa kagaanda ka muunda katharagua. Ningî nî atharîîtie gûntû kûrîa gûkûngûagîrwa biatho birîa bituui na sabatû. Kinya anene na athînjîri-Mûrungu nî bakinyîri nî mûthûûro jwaawe.

⁷MWATHANI nî athûûrîte kîritîro kîaawe kîa igongwana na eerûkîra kîûrû kîaawe. MWATHANI nî anekeeretie anthû bamomoranga nthingo cia gîkaro kîa mûnene. Atûma anthû bakuura nîûntû bwa ûûmbani, gûntû kûrîa twathaathaîria MWATHANI tûgwîrîtue.

⁸MWATHANI nî aagiitîre atî no mwanka nthingo cia Zaiûni imomorwe. Nî aathimîre rûthingo nîkenda oona rûkûmomorwa runthe. Nandî mînaara na nthingo nî biamomorangîrwa buru.

⁹Mpingîro ciaayo igwîte nthîgûrû mîgaamba yaacio yunangi yeekwa kîthûmba. Nawe mûnene na atongeeria ba Israeli barî kîthamîrioone mîgongoone îngî. Waatho bwa Mûrungu bûtigîte kûritanwa na iroria biaao bitîguûragîrua bioneki nî MWATHANI.

¹⁰Akûrû ba Jerusalemu bakari nthî ki baigerereete mûju biongo na bageekîra mathango kwonania kwîthikîîra. Nabo aarî ba Jerusalemu baturîîtîe maru beenamîîrîa mwanka nthî kwonania kîeba.

¹¹Meetho jaakwa nî jamatuune nîûntû bwa kûrîra; nkoro yaakwa nî îthîînîte mono. Nî nogeete nî kûrîra nîûntû bwa ûrîa antû baakwa bathirîtue na nîûntû bwa ûrîa twaana tûkûgirîkîra njîreene cia ntûûra.

¹²Aana barîîragîra ba ng'ina bakiugaga, “Nîkû tûkûrita biakûrîa na bia kûnyua?” Nabo bagirîkîrîte njîreene cia ntûûra bagakuîra njareene cia ba ng'ina.

¹³Nîatîa mpûûmbîkia kuuga bwaaku gwe Jerusalemu na nîmbi mpûûmbîkia gûkûng'uanania nayo? Mpûûmbîkia gûkûng'uanania na mbi gwe Jerusalemu nîkenda nkûboreria? Kwînyangua gwaaku nî gûkûnene ûrîa gûtîûmba gûkworia.

¹⁴Iroria bieenu bibûroragîria ûroria bwa ûrongo na kûbwonera mantû jatî ja mma. Bio bitîgwetaga meeyia jeenu nîkenda noo bwirira, îndî no kûroria bibûroragîria mantû ja ûrongo na waayia.

¹⁵Barîa bonthe bakûrûkagîîra arîa ûrî gwe Jerusalemu nîka bagûkombaga. Bainainagia mîtwe boona ûrîa weete îgaanjo. Booragia, “Îîjî nîyo ntûûra îrîa yeeragwa nî înthongi, îrîa nthîgûrû yonthe yeendeete.”

¹⁶Anthû baaku bonthe ka bagukurungaga. Bakuminyaga mînyîrî bakîûgaga atîrî, “Nî tûramûthirîrie buru! Îgiita rîrî nîrîo twendaga rîkinya nandî tûkwona ûrîa gwakara.”

¹⁷MWATHANI akûthithia ûrîa eendaga, akûûjûrîa mîciîtîo yaawe îrîa eekîîre o kuuma tene. Akûtharia atî na kîaao, na gûtûma anthû baikumia nîûntû bagûkûûmba, athûûngûûra inya ya anthû baaku.

¹⁸Buî antû ba Jerusalemu kaîreeni MWATHANI. Nthingo ciaayo nî imûrîrîre, ûtukû na mûthenya meethori jeenamage ta rûûjî bûtîgûtiga.

¹⁹Kaîreeni MWATHANI ûtukû bunthe; kuuma ûgoro îreeni MWATHANI ûrîa bûkwenda bûmûrombe nîûntû bwa aana beenu barîa bakûûragîrwa nî mpara njîreene cionthe.

²⁰Ûûi MWATHANI tega, kûrî bangî waakanûkîa mûthemba jûjû? Aka nîka bakûrîa aana barîa baciere, nabo athînjîri-Mûrungu na iroria booragîri kîûrûûne kîongwa.

²¹Antû babakûrû na babaanake bonthe bakuîrîte njîreene; aarî na nthaka booragwa nî anthû. Gwe waabooragîre nîûntû bwa mûthûûro jwaaku wabathiria ûtî na kîaao.

²²Gwe weetîre anthû ba kuuma nteere cionthe beeja kîrî ni ta kîathoone gîgîtue bejîte; nîkenda bamakia na gûtî muntû woonokere kana ateetha ntukû îrîa waatûrîkîrie mûthûûro jwaaku. Anthû baakwa booragîre aana baakwa barîa nciere na ndaarera.