Read KIMERU BIBLE PROTESTANT EDITION Kîr 3 Bible Online

Kîr 3 - KIMERU BIBLE PROTESTANT EDITION bible

Kîr 3

¹Ni nî mbijî ûrîa Mûrungu akanûkanagia.

²We nî ampîngîrîte muunduune jûmûnene gûntû gûtaarî na weerû.

³Nî mma atindîte gûmpûûra mûthenya junthe.

⁴We nî oojûrîîtie mwîrî jwaakwa iroonda na aunanga marûitû jaakwa.

⁵We ambithûkîrîte anciîgîîria nteere cionthe na ûrûrû na mîthangîko

⁶Atûmîte nkara muunduune ta barîa baakuîre tene.

⁷Antheekeete na mînyororo ncheera na ntîûmba kûmatûka kuuma ku.

⁸Kinya ndamûrîîrîra nkîmûrombaga ûteethio atiigagua maromba jaakwa.

⁹Ampingîrîte njîra na rûthingo rwa maiga atûma ndaatia njîra

¹⁰MWATHANI akari ta ndûû îmbiciithîrîte kana ngatûnyi îkwenda kûmbithûkîra.

¹¹Ambikîrîîrie njîreene itî injega angiitanga tûnuku anthiria.

¹²Akûmîîre ûta bwaawe aramberekeeria nîkenda andatha.

¹³Nawe nî aandathîre nkoro na mîgwî ya thigaki yaawe.

¹⁴Nî mpeete gîntû gîa kûthekerwa nî antû bonthe, nî ni bainaga ndwîmboone ciaao rîonthe.

¹⁵Ambûjûrîîtie ûrûrû akî ambogitia na mîthangîko.

¹⁶Athigîthîtîe ûthiû bwaakwa nthî, atûma ndûma mûthanga na maîgo.

¹⁷Ntî na thîîrî nkoroone na kûgwîrua nî mbûrîrîtue nîku.

¹⁸Naani ndiuga atîrî, “Mwago jwaakwa nî jûthiri na kinya wîrîgîîro bwaakwa ndeene ya MWATHANI nî bûthiri.”

¹⁹MWATHANI ririkana mîthangîko yaakwa na ûrûrû, bûrîa ndî nabu nî bûbûthûûku ta ûrogi.

²⁰Nthûgaanagia bwa mantû jau rîonthe nkaigua ndaaga inya.

²¹Îndî nî ncokagîrwa nî wîrîgîîro ndaaririkana ûntû bûbû!

²²Atî kîaao kîa MWATHANI gîtîthiraga kenya, kana wendo bwaawe bûnyiia kinya rî.

²³Biîthagîrwa birî bibierû o rûkîîrî o rûkîîrî nîûntû MWATHANI nî wa gwîtîkîka.

²⁴Mbugaga nkoroone, “Ndî na MWATHANI nî ng'anîri tontû bûu ngeeka wîrîgîîro bwaakwa kîrî we.”

²⁵MWATHANI nî ûmwega kîrî barîa bamwîrîgagîîra na kîrî barîa bamûcwaga.

²⁶Nî bûbwega muntû agakirîîria ageeteera wonokio bwa MWATHANI.

²⁷Nî bûbwega nkûrûki muntû kwiritana ûntû bûu arî ûmwanake.

²⁸Muntû ta ûu abuîrîte gûkara nthî ki rîrîa ûntû ta bûu bwamwîjîîra.

²⁹Abuîrîte kwinyiiyia buru niuntû kwombîka akoona wîrîgîîro.

³⁰Nî kaaba ageetîkîîria kûûrwa na kûrumwa.

³¹MWATHANI atîtîîjîra antû baawe kenya na kenya.

³²Kinya agatûreteera kwithikîîra, we nî wa kîaao, agatwîgîîrua kîaao.

³³Nîkwîthîrwa we atîgwîragua akiona antû bakîthîîna.

³⁴MWATHANI nî amenyaga rîrîa barîa batheeki banyamaaragua kîthaîkoone.

³⁵Akoona rîrîa muntû akûthithîrua ûrîa gûtîagîrîte.

³⁶Ningî akamenya rîrîa magamba jatîkûgiitwa na îota.

³⁷Gûtî we ûûmba kuuga jarîa akwenda jathithue jonthe tiga MWATHANI.

³⁸MWATHANI Ûrîa Ûrî Îgûrû buru nî eetîkagîîria mantû jonthe jameega na jamathûûku jakarîka.

³⁹Muntû atîbuîrîte kûnung'una akanûkua nîûntû bwa meeyia jaawe.

⁴⁰Twitegeeni bwega, tûthûûje mîîtîre yeetû tûcoke kîrî MWATHANI.

⁴¹Tûûkîrieni njara tûthaathayie Mûrungu twinenkanîre kîrî we.

⁴²Nî twîîtie twarega gûkwathîkîra naagwe MWATHANI nî ûregeete gûtûrekera.

⁴³Winganîte naatuî ûthûri, watûûraga ûtî na kîaao.

⁴⁴Ningî gwe withikîte na îtu rîrînene ûrîa maromba jeetû jatîûmba gûgûkinyîra.

⁴⁵Gwe ûtûmîte twaa gîntû gîkîthûûku gîa kûmenwa nî mîgongo îngî.

⁴⁶Anthû beetû bonthe nîka bagûtûcikûûra.

⁴⁷Tûgwati nî ûguaa na kîmako, twathirua twenyangua buru.

⁴⁸Ndîraga îgiita rîonthe nîûntû bwa ûrîa antû beetû bathirîtue.

⁴⁹Meethori jaakwa jatîthiraga ntiga kûrîra,

⁵⁰mwanka rîrîa MWATHANI akandaithîîria kuuma îgûrû ambone.

⁵¹Nkoro yaakwa îthîînîte mono ndoona ûrîa anthû bathûûrîtie antû ba Jerusalemu.

⁵²Ntegeetue na gîtegi ta kanyoni nî anthû baakwa na batî na gîtûmi gîa gûntegia.

⁵³Baangerere îrinyeene ndî mwoyo na barainga îrinya na maiga.

⁵⁴Ndîraambîrîria gûkunîkanua nî rûûjî ndîrauga, “Ndîkûthira.”

⁵⁵Naani ndîrakaîra MWATHANI ndî o kûu îrinyeene,

⁵⁶ndîramûromba nawe araigua maromba jaakwa.

⁵⁷Gwe nî wambigîrue ûrambîîra. “Menya ûkîra.”

⁵⁸Gwe MWATHANI nî waantunyûkîrie na ûrambonokia.

⁵⁹Tontû gwe MWATHANI nî wooneete ûrîa anthû baakwa banthithîrîtie, ngiitîra îgamba ûrîa kwagîrîte.

⁶⁰Gwe nî wooneete wûûî bunthe bûrîa banthithîrîtie, nî woneete mîbango yaao yonthe.

⁶¹Gwe MWATHANI nî wigîîtue ûrîa bagûncikûûra wamenya ûrîa bangitîrîte.

⁶²Baakara ntukû yonthe bakîaragia ciaakwa na kûmbangîra mîbango îmîthûûku.

⁶³Bambinaga ndwîmboone ciaao bakaaragia ciaakwa ikaroone biaao ntukû yonthe.

⁶⁴Itû MWATHANI kanûkia anthû kûringana na mathithio jaao.

⁶⁵Bagwatithie kîrumi gîaaku ûbathirie wîrîgîîro

⁶⁶Itû gwe MWATHANI îngana nabo ûthûûri ûboorage ûbathirie nthîgûrûûne.