Read KIMERU BIBLE PROTESTANT EDITION Kîr 4 Bible Online

Kîr 4 - KIMERU BIBLE PROTESTANT EDITION bible

Kîr 4

¹Thaabu nî îtukîte yaatiga kûmentamenta thaabu îrîa îthereetue buru nî îthûûkîte; maiga jarîa ja kîûrû janyaganîtue kunthe.

²Antû ba Zaiûni baarî ba gîtûmi mono o ta ûrîa thaabu îrî gîtûmi, îndî nandî boonagwa ta nyongû irîa îtî na gîtûmi.

³Kinya mbîrwa nî cionkagia biana biaacio na ikabirera bwega, Îndî antû baakwa baeete babathûûku ta thirai rwanda.

⁴Aana ba antû ba Jerusalemu, baakujaga nî mpara na nyoonta, baarombaga biakûrîa na batîonaga wa kûbarûmia gantû.

⁵Antû barîa baarîjaga biakûrîa bibithongi, nandî nîbo bakûûragîrwa nî mpara njîreene. Barîa baareri ûtongeene nandî bakarîte nthî ithûmbeene bia matî bagîcwaga biakûrîa.

⁶ Antû ba Jerusalemu bakanûkîîtue nkûrûki ya antû ba Sodomu, Sodomu îrîa yaathirîruee ntûti mbere yoona wa kûmîteethia.

⁷Atongeeria beetû baatheri ta nkamia, beerûi ta îria, mîîrî yaao yaatunîi tunî. Ûthongi bwaao bwakari ta maiga ja goro ja rangi ja wiirû bwa îgûrû.

⁸Îndî bairûîte bakara ta makara batîûmba kûmenyekana njîreene. Ikonde bia mîîrî yaao birûmatanîte na mîrûitû yaao. Nabio biûmagari ta rûkû.

⁹Nî kaaba barîa booragîrwe ndweene nkûrûki ya barîa booragîrwe nî mpara. Baathîrîrue nî mpara nîûntû gûtaarî na irîo.

¹⁰ Aka barîa beendeete aana baao mono nî baarugîre aana bau bongwa baraa biakûrîa biaao rîrîa antû baakwa baathirîrue.

¹¹MWATHANI aatûrîkîrie mûthûûro jwaawe junthe, jûkari ta mwanki jwakîîtue Zaiûni naju jûraîîthia mîsingi yonthe.

¹²Anene na antû barîa baatwîre nthîgûrûûne batîngî gwîtîkia atî kûrî mûnthû ûrîngî ûûmba gûtonya mpingîro cia Jerusalemu.

¹³Mantû jau jaakarîkîre nîûntû bwa meeyia ja iroria na athînjîri-Mûrungu barîa booragîre antû babaagîru.

¹⁴Nabo beetaga njîreene ta ntumuumu beekîri rûko mono nî tharike mwanka gûkaa gûtî muntû ûrîngîenda gûtonga nguû ciaao.

¹⁵Antû babeeraga, “Ûmeeni aja buî antû ba rûko Îteeni bûgáantonga!” Tontû bûû, baratuîka eereeri batî na gîkaro. Nabo beetaga kuuma nthîgûrû îmwe gwîta îngî batîkûgwatwa ûgeni

¹⁶Nî MWATHANI wengwa wabanyagîrie aratiga kûbamenyeera. Araagîra athînjîri-Mûrungu gîtûmi aratiga kuona atongeeria wendo.

¹⁷Twakarîre tweteereete ûteethio tûranoga, twetereete antû ba mûgongo jûngî batûteethia îndî bataatûteetherie.

¹⁸Anthû beetû bakarîre batûkabîrîte tûtîngî ûmba gwîtaîta njîreene. Ntukû cieetû ciaarî intare, mûthiro jweetû nî jwaarî jûgûkinya.

¹⁹Barîa beenganîte naatuî baarî mpwîî mono nkûrûki ya ndiiû cia îgûrû. Nabo beenganîrîre naatuî irîmeene na gûtwiciithîra rwanda.

²⁰Nabo nî baagwatîre mûnene ûrîa wathuuri nî MWATHANI, ûrîa twetîkîtie agatûkaria kuuma kîrî anthû.

²¹Buî antû ba Edomu na Uzi no bûgwîrue nandî; îndî îgîîta rîgakinya bûkaamakua bwîtage bûrî kîthûnû

²²Zaiûni nî îrîte îrîi rîa meeyia jaayo. MWATHANI atîrekeeria antû ba Zaiûni bakara kîthamîrioone kaîrî. Îndî gwe Edomu ûgakanûkua nî MWATHANI oonanie werûûne meeyia jaaku.