Read KIMERU BIBLE PROTESTANT EDITION Ezek 10 Bible Online

Ezek 10 - KIMERU BIBLE PROTESTANT EDITION bible

Ezek 10

¹ Rîrîa ndaategere îgûrû rîa mîtwe ya akerubimu nî ndoonere gîntû gîakûmari na gîakari ta rûriga rwaaki na iiga rîa goro rîa rangi ya wiirû bwa îgûrû.

² Mûrungu nî eerîre muntû ûrîa weekîrîte nguû cia gatani atîrî, “Îta ûtonye gatîgatî ka magûrû jarîa jakarî ta ja baisikiri, jarîa jakûthiûrûka rungu rwa akerubimu wooje makara ja mwanki na njara, naagwe ûjagere ntûûreene kunthe.” Nawe muntû ûu areeta mûtegeete.

³Nabo akerubimu baarûngami rûteere rwa bwa ûmotho bwa kîûrû. Nawe muntû ûu weekîrîte nguû cia gatani rîrîa aatongere kîûrû, kîrûngûûjû gîa toogi kîroojûra kîaragoone kîa ndeene.

⁴Nabu weerû bûbûnene bûrîa bwonanagia mwago jwa Mûrungu bûrauma kîrî akerubimu bau bûreeta mwariine jwa kîûrû. Kîûrû kîroojûra îtu na kîarago kîroojûra weerû bûu bwa mwago.

⁵Naju mûgambîre jwa mathagu ja akerubimu jwaigigagua mwanka kîaragoone kîa oome. Naju mûgambîre jûu jwakari ta kajû ka Mûrungu Mweneinya rîrîa akwaria.

⁶Rîrîa MWATHANI eerîre muntû ûu weekîrîte nguû ya gatani eete ajûkie makara kuuma gatîgatî ka magûrû jarîa jaarî rungu rwa akerubimu muntû ûu nî eetîre ararûngama rûteere rwa kûgûrû kûmwe.

⁷Ûmwe wa akerubimu aratambûrûkia njara arajûkia makara jarîa jaarî gatîgatî ka magûrû ja akerubimu, aranenkera muntû ûu weekîrîte nguû cia gatani. Muntû ûu arajûkia makara na areeta.

⁸Akerubimu boonekaga barî na njara ta cia antû rungu rwa mathagu jaao.

⁹ Rîrîa ndaaciûkîrie meetho rî, nî ndoonere magûrû jana jakari ta ja baisikiri jarî rûteere rwa akerubimu, o kûgûrû kûrî rûteere rwa mûkerubi ûmwe. Magûrû jau jaakengakengaga ta maiga ja goro.

¹⁰Ningî jonthe nîka jaang'uanene, jakari ta kûgûrû kûrî ndeene ya kûgûrû kûngî.

¹¹Rîrîa akerubimu bau beetaga nî boombaga gwîta o rûteere rûrîa bakwenda batîkûgarûka. Najo magûrû jau jeetaga jathingatene rûteere rûrîa kûgûrû kwa mbere gweetaga.

¹² Nabo nî baarî na meetho kunthe mîîrîîne yaao: mîgongo, na njara, na mathaguune jaao. Akerubimu bau baarî na magûrû jana jakari ta ja baisikiri na kinya jo nî jaarî na meetho.

¹³Magûrû jau nî jeetîrwe nkiigagua, “Magûrû ja kîbuubani.”

¹⁴ O mûkerubimu aarî na moothiû jana: ûthiû bwa mbere bwakari ta bwa ndeegwa, nabu ûthiû bwa jaîrî bwakari ta ûthiû bwa muntû, na ûthiû bwa jathatû bwakari ta ûthiû bwa ngatûnyi, na ûthiû bwa jana bwakari ta ûthiû bwa nderi.

¹⁵Nabo akerubimu bau nî bookagîîra bakabuurûka. Akerubimu bau nîbo biumbe birîa birî mwoyo birîa ndoonere mûuroone jwa Kebari.

¹⁶Nabo akerubimu bau rîrîa beetaga, magûrû nî jeetanagia nabo jarî rûteere. Rîrîa akerubimu bau bookagîîria mathagu bakîenda kûbuurûka, magûrû jau no jeethagîrwa jarî rûteere rwaao.

¹⁷Baarûngama najo jakarûngama; bookîîra baitia bwa îgûrû najo jagaitania nabo; nîkwîthîrwa roho wa biumbe biu birî mwoyo nîwe waarî ndeene yaajo.

¹⁸Nabu weerû bûrîa bwenagia mono kwonania mwago jwa MWATHANI, bûrauma mwariine jwa kîûrû bûreeta bûrarûngama îgûrû rîa akerubimu.

¹⁹Naabo akerubimu barookîîra barabuurûûka mbategeete na magûrû jareeta jarî rûteere rwaao. Naabo bareeta bararûngama mpingîroone ya bwa gaiti ga kîûrû kîa MWATHANI. Nabu weerû bûu bweenagia kwonania mwago jwa Mûrungu wa Israeli nî bwaarî îgûrû rîaao.

²⁰Akerubimu bau nîbo biumbe birîa birî mwoyo birîa ndoonere birî rungu rwa Mûrungu wa Israeli, rîrîa ndaarî mûuroone jwa Kebari. Naani ndîramenya nîcio akerubimu.

²¹O nyamû nî yaarî na moothiû jana, na mathagu jana. Rungu rwa mathagu jau nî kwaarî na into biaakari ta njara cia antû.

²²Najo moothiû jaacio jaakari o ta moothiû jarîa ndooneete rûteere rwa mûuro jwa Kebari; o nyamû yeetagîîra arîa yeethagîrwa îtegeete.