Read KIMERU BIBLE PROTESTANT EDITION Ezek 11 Bible Online

Ezek 11 - KIMERU BIBLE PROTESTANT EDITION bible

Ezek 11

¹Roho nî aambûkîrîrie na arambikia mpingîroone ya bwa gaiti ga kîûrû kîa MWATHANI. Mpingîro îîu yategeete bwa gaiti. Au mpingîroone nî kwaarî na antû mîrongo îîrî na bataano. Ndîroona Jaazania mûtaana wa Azuri na Pelatia mûtaana wa Benaia, barîa baarî atongeeria ba kîrîndî barî amwe na antû bau.

²Mwathani arambîîra atîrî, “Mûtaana wa muntû, baba nîbo barîa babangaga ûthûûku na nîbo baeejanaga kîrîra gîkîthûûku ntûûreene.

³Nîbo baugaga atî, ‘Îgiita rîrî akuî gûkinya rîa gwaka nyomba. Ntûûra îîjî îkari ta nyongû îrî riiko, naatuî tûkari ta nyama irî ku.’

⁴Tontû bûû rî mûtaana wa muntû, barorerie mantû jamathûûku jegiî ûrîa bagaakanûkua.”

⁵Roho wa MWATHANI aratonya kîrî ni arambîîra mbuge atîrî, “MWATHANI ariuga ûjû: buî antû ba Israeli nî bûthûgaanagia na nî mbijî jarîa jarî mathûgaanioone jeenu.

⁶Buî bûûjûrîtie ntûûra na antû barîa bûûragîte na bwojûria njîra ciaayo na biimba.

⁷Tontû bûû, MWATHANI Mûrungu ariuga ûjû: Barîa bwîkîte ntûûreene booragi nîbo nyama, nayo ntûûra îîjî nîyo nyongû. Îndî buî bûkaaritwa ntûûreene.

⁸MWATHANI Mûrungu ariuga atîrî, ‘Nî bûkîraga ndwaa, îndî nkaabûreetera yo.’

⁹Nkaabûrita ntûûreene îîu mbûnenkanîre njareene cia antû ageni nabo babûkanûkie.

¹⁰Bûkooragîrwa ndweene. Nkaabûkanûkia bûrî mwankeene jwa Israeli, naabuî rîu bûkaamenya ni nî ni MWATHANI.

¹¹Ntûûra îîjî îtîkara ta nyongû naabuî bûkara ta nyama irî nyongûûne îîu; nkaabukanûkia bûrî mwankeene jwa Israeli.

¹²Naabuî bûkaamenya ni nî ni MWATHANI nîkwîthîrwa buî bûreganaga na Waatho bwaakwa na mataaro jaakwa îndî bûkathingata mataaro ja antû ba mîgongo îrîa îbûthiûrûkîrîte.”

¹³O nkîroragia ûu, Pelatia mûtaana wa Benaia aragwa na arakua. Rîu ndîreenamîîria mwanka nthî; ndîrarîra na kajû nkiugaga atîrî, “Itû MWATHANI Mûrungu, nîka ûkaathiria Aisraeli barîa batigeere buru?”

¹⁴MWATHANI nî aambarîîrie arambîîra atîrî,

¹⁵“Mûtaana wa muntû, antû barîa baatigîrwe Jerusalemu, tabo antû beenu barîaria mantû jabwegiî buî bûrî kîthamîrioone bakiugaga atîrî, ‘Buî bûrî kûraaja na MWATHANI, nayo nthîgûrû îîjî nî tuî tûtigîri yaa yeetû.’”

¹⁶Tontû bûû, MWATHANI Mûrungu ariuga ûjû, “Kinya këethîra nî ndaabaikîrie kûraaja kîrî mîgongo mîgeni, na ndaabanyagania nthîgûrû ingî, nî mbîthîrîtwe ndî amwe nabo nthîgûrûûne îrîa barî kagiita gagakai.”

¹⁷Tontû bûû, MWATHANI Mûrungu ariuga ûjû, “Nkaabûûthûrania amwe mbûrite nthîgûrûûne irîa bûnyaganîtue mbûnenkere nthîgûrû ya Israeli.

¹⁸Nabo rîrîa bagaacoka ku, bakaathiria buru mîrungu ya mîng'uanano yonthe na into bingî bionthe birîa bitîtheri.

¹⁹ Naani nkaabeekîra nkoro înjerû na Roho ûmwerû. Nkaabarita nkoro înjûmo ya kûrega kwathîka, mbeekîre nkoro ya waathîki,

²⁰nîkenda baathîkagîra Waatho bwaakwa na bathingataga mataaro jaakwa. Nabo bakaa antû baakwa naani mpee Mûrungu waao.

²¹Îndî barîa beendaga kûthaathayia mîrungu ya mîng'uanano îtî na gîtûmi, nkaabakanûkia, nîûntû bwa ûthûûku bûrîa bathithîtie, ûu nîu ni MWATHANI Mûrungu ndauga.”

²² Rîu akerubimu barabuurûka na magûrû jarîa jaakari ta ja baisikiri jareeta jarî rûteere rwaao, na weerû bûbûnene bûrîa bwonanagia atî mwago jwa Mûrungu wa Israeli jûrî antû au nî jwaarî îgûrû rîaao.

²³Nabu weerû bûu bwonanagia mwago jwa Mûrungu jûrî ntûûreene, bûrauma ntûûreene bûreeta kîrîmeene kîrîa kîrî bwa gaiti ga ntûûra.

²⁴Roho wa Mûrungu arancokia kaîrî na njîra ya kîoneki kîrî atae bangî Babiloni, nakîo kîoneki kîu kîrathira.

²⁵Naani ndîreera atae bangî mantû jonthe jarîa MWATHANI aambonetie.