Read KIMERU BIBLE PROTESTANT EDITION Ezek 12 Bible Online

Ezek 12 - KIMERU BIBLE PROTESTANT EDITION bible

Ezek 12

¹MWATHANI nî aambarîîrie arambîîra atîrî,

² “Mûtaana wa muntû, ûtwîre gatîgatî ka antû ndemi, barîa barî meetho na batîonaga, ningî barî matû na batiigagua nîûntû nî antû ndemi.

³“Tontû bûû, rî, mûtaana wa muntû, kûnja mîrigo yaaku wîte kîthamîrioone, mûthenya bagûtegeete, wîte bagûtegeete ûkari ta mûtae kuuma gûntû kûrîa ûrî wîte kûngî. Kwombîka boona ûu bakaamenya atî bo nî ndemi.

⁴Kûnja mîrigo yaaku, ta muntû wîîtîte kîthamîrioone ûmîîke oome mûthenya antû bakîonaga, naagwe gwengwa kûrî ûgoro o bategeete uumagare wîte ta ûrîa antû beetaga kîthamîrioone.

⁵Ningî bategeete o ûu, tûra gîkutho rûthingoone rwa nyomba yaaku bakîonaga umagarîîrie into biaaku o.

⁶Wîkîre mûrigo jwaaku gîturo bategeete, ûjûkamate wîte ûtukû muunduune ûkunîkîte meetho ûtîkeeje kwona kûrîa wîîtîte. Ûntû bûu ûkaathithia bûrî rwano rwa ûrîa antû ba Israeli bakaathithîrua.”

⁷Naani nî ndaathithîrie ûrîa MWATHANI aambîîrîte. Nî ndaajûkîrie mûrigo jwaakwa mûthenya ta mûrigo jwa muntû wîîtîte kîthamîrioone. Ningî gûgûkinya ûgoro ndîratûra gîkutho rûthingoone rwa nyomba ndîraumagarîra o ûtukû muunduune nkamatîte mûrigo jwaakwa na gîturo bategeete.

⁸Rîrîa gwaakeere MWATHANI nî aambarîîrie arambîîra atîrî,

⁹“Mûtaana wa muntû, nîûntû antû ba Israeli tabo antû ba îrema bagakûûria ûrîa ûkûthithia

¹⁰beere atîrî, ‘MWATHANI Mûrungu ariuga ûjû: rwano rûrû rwegie mûtongeeria ûrîa waathaga Jerusalemu na antû bonthe barîa barî ku.’

¹¹Ningî beere atî ûu wathithia nî rwano rwa jarîa jagakarîka kîrî bo bagatawa na baikue kîthamîrioone.

¹²Mûnene waao ûrîa ûbaathaga akajûkia mûrigo ajwîkîre ituro muunduune na aumagarîîre gîkuthoone kîrîa gîtûrîîtwe rûthingoone rwa nyomba. Nawe agaakunîka meetho nîkenda atîkoone kûrîa eetîîrîte.

¹³ Naani nkaagera mûtego mûgwatie mwikie nthîgûrû ya Babiloni îrîa atîona, kinya këethîra nîku agaakuîra.

¹⁴Ningî nkaanyagania barîa bonthe bakaraga amwe nawe, na barîa bamûtumîkagîra, na barîa bamwathaga kîrîra, na kinya njûûrî ciaawe. Antû bakeengana nabo bakîbooragaga.

¹⁵Rîrîa nkaabanyagania mîgongoone na mbaikie nthîgûrûûne ingî, nîrîo bakaamenya atî ni nî ni MWATHANI.

¹⁶Îndî ngaatigaria antû babakai kîrî bo batîûragîrîîtwe ndweene, kana booragwa nî mpara, kana booragwa nî mîrimo îmîthûûku. Nkathithia ûu nîkenda bakûûjagîîra kîrî mîgongo îngî ûrîa bathithagia mantû jamathûûku na nîkenda bamenya atî ni nî ni MWATHANI.”

¹⁷MWATHANI nî aambarîîrie arambîîra atîrî,

¹⁸“Mûtaana wa muntû, rîa biakûrîa biaaku ûgîteetemaga na ûnyuue rûûjî ûkiinainaga nî ûguaa.”

¹⁹Ningî wîre antû bonthe atîrî, “MWATHANI Mûrungu ariuga ûjû mantû jegiî antû barîa batwîre Jerusalemu nthîgûrû ya Israeli: barîtua kûrîîjaga biakûrîa bagîteetemaga na bainainage nî ûguaa bakînyua rûûjî, nîûntû nthîgûrû yaao îgaatigwa îtî gantû nîûntû bwa ûthûûku bwa antû barîa batwîre ku.

²⁰Nacio ntûûra irîa irî na antû ikaathirua na nthîgûrû îtigwe irî maganjo. Rîu bûkaamenya ni nî ni MWATHANI.”

²¹MWATHANI nî aambarîîrie ni Ezekieli arambîîra atîrî,

²²“Mûtaana wa muntû, nîkî antû ba Israeli bakaraga bakiugaga njuno îîjî: ‘Îgiita rîkûrûkaga îndî ûroria bûtîûjûraga?’

²³Beere atîrî, MWATHANI Mûrungu ariuga ûjû: ‘Nkaathiria njuno îîu na batîkoromîtumîra kaîrî Israeli.’ Ningî beere atî îgiita nî rîkinyîte rîrîa ûroria bunthe bûkoojûra.

²⁴Nîkwîthîrwa antû ba Israeli batîîrwa bioneki bia ûrongo kana barorerua ûroria bwa ûrongo kaîrî.

²⁵Îndî ni MWATHANI nkaabaaragîria. Ûntû bûrîa nkaabaaragîria nîbu bûkoojûraga. Buî ndemi, nî îgiiteene rîeenu nkoojûria jarîa jonthe mbugîîte na gûtî gweteera kaîrî.”

²⁶Ningî MWATHANI nî aambarîîrie o kaîrî arambîîra atîrî,

²⁷“Mûtaana wa muntû, antû ba Israeli baugaga ûjû: ‘Ûroria bwaaku na kîoneki kîrîa Mûrungu akwonagia nî jarîa jagaakarîka îgiita rîrîraaja rîrîa rîkeeja.’

²⁸Îndî beere atî MWATHANI Mûrungu ariuga ûjû: ‘Gûtî ûntû noo bûmwe mbugîîte bûgaakarakara kaîrî bûtîûjûrîte. Mantû jonthe jarîa mbugîîte jakoojûra.’”