Read KIMERU BIBLE PROTESTANT EDITION Ezek 13 Bible Online

Ezek 13 - KIMERU BIBLE PROTESTANT EDITION bible

Ezek 13

¹MWATHANI nî aambarîîrie arambîîra atîrî,

²“Mûtaana wa muntû, roria mantû jamathûûku kîrî iroria bia Israeli bia ûrongo birîa biroragia mantû jatîo. Biîre bithikîîre rûteto rwa MWATHANI.

³MWATHANI Mûrungu ariuga wûi kîrî iroria biaa, birîa bithingataga mathûgaanio jaabio biongwa na boonaga mantû jatîo.

⁴Iroria bieenu buî Israeli nî bia ûtheri ta mbîrwa irî maganjoone.

⁵Iroria bitîîtaga kûrîa rûthingo rûkoborangi kana biaka rûthingo kaîrî, na tontû bûu Israeli îtîûmba kwirwîra rîrîa ndwaa îkeethîrwa îrî o ta rîo ntukû ya MWATHANI.

⁶Iroria biu biaragia ûrongo na kûroria mantû jatî ja mma. Bikaraga bikiugaga MWATHANI nîwe uugîîte îndî MWATHANI atîîthagîrwa abitûmîte, kinya keethîra no biîgagîîra MWATHANI oojûria ûroria bwaabio.

⁷Anga tî ûrongo na waayia biroragia rîrîa biugaga MWATHANI abioneetie na augîîte ûna kinya keethîra MWATHANI gûtî u eethagîrwa abiîrîte.”

⁸Tontû bûû, ûûni MWATHANI Mûrungu ndiuga atîrî, “Tontû nî bûroretie mantû ja ûrongo na bwona bioneki bia ûrongo ûûni nî ndeganîte naabuî.

⁹Ngakanûkia iroria birîa biroragia mantû jatîo na bikoona bioneki bia ûrongo. Bitîîtîkîîrua kîameene gîa antû baakwa, kana mariîtwa jaao jaandîkwa kîrî mariîtwa ja antû ba Israeli. Batîkorocoka nthîgûrûûne yaao kaîrî nîkenda bûkaamenya ni nî ni MWATHANI Mûrungu.

¹⁰ Iroria nî biaatithîtie antû baakwa njîra bikîbeeraga kûrî na thîîrî, o rîrîa gûtî thîîrî îrî o. Rîrîa antû baaka rûthingo rûtî na inya iroria bibi birwakaga îra nîkenda rwonekana ta rûrî na inya.

¹¹Îîra bau baakaga rûthingo ta rûu îra nîkenda rwonekana ta rûrî na inya atî rûthingo rûu rûkaagwa. Naku gûkeethîrwa kûrî na maburiko na ngai ya nchûgû yuure îrî na kîbubani gîkînene.

¹²Rîrîa rûthingo rûu rûkaagwa, anga antû batîbûûria rûrîkû rûthingo rûrîa bûraakîte îra?”

¹³Tontû bûû, MWATHANI Mûrungu ariuga atîrî, “Nkaurithia ngai îrî na kîbubani gîkînene nîûntû bwa mûthûûro jwaakwa, ntûme ngai ya nchûgû îthûûkangie rûthingo rûu.

¹⁴Naani nkaamomora rûthingo rûrîa bwakîte îra ndûgwîthie, mûsingi jwaaru jûthirue buru. Rîrîa rûkagwa bûkaathirîrua o nîkenda bûmenya ni nî ni MWATHANI.

¹⁵Tontû bûû, ngaatûrîkîria mûthûûro jaakwa kîrî rûthingo rûu na barîa barwakîte îra. Ncoke mbwîre atî gûtîîthîrwa kûrî na rûthingo kaîrî kana barîa bararwakîte îra.

¹⁶Iroria bia Israeli birîa biroretie mantû jegiî Jerusalemu na kwona bioneki bia thîîrî rîrîa gûtî na thîîrî, bikaathirua, nîu ûûni MWATHANI Mûrungu nkuuga.”

¹⁷MWATHANI nî aambarîîrie arambîîra atîrî, “Naagwe rî, mûtaana wa muntû, raithîria aka ba kuuma Israeli barîa baroragia mantû kuuma mathûgaanioone jaao na ûrorie ûkîreganaga nabo

¹⁸uuge atîrî, ‘MWATHANI Mûrungu ariuga atî, Wûi kîrî aka barîa boogagîîra tûmîrigi twa ûgaa njareene ciaao na bakaoga mîtwe yaao ireemba nîkenda beethîrwa barî na inya ya kwatha ûtûûro bwa antû bangî ba mîthemba yonthe. Nîka bûkwenda kwîthîrwa bûrî na inya ya kûthithia na mîoyo ya antû baakwa ûrîa bûkwenda nîkenda bwona mpongeeri?

¹⁹Nî bûmbîkîrithîtie mûgiro kîrî antû baakwa nîkenda bwona mûnyaki jûmûkai na bwona irio bibikai. Bûûragaga antû batîbuîri gûkua na bûgacaîîra barîa babuîri kûûragwa. Buî bwaragîria antû baakwa ûrongo nabo bakabwîtîkia.’”

²⁰Tontû bûû, MWATHANI Mûrungu ariuga ûjû, “Ntîkwenda kwona into biu bieenu bia ûrogi bûgûtumîra kûthiria antû nabio. Nkaagiitanga tûmîrigi tûu twa ûrogi bwoogeereete njareene na antû barîa bûgwetie ta nyoni, nkabarekeeria.

²¹Kinya ireemba bieenu ngatamburanga ntuunyûkie antû baakwa kuuma njareene cieenu, naabuî rîu bûkaamenya ni nî ni MWATHANI.

²²Nî bûthirîtie barîa baagîru inya nîûntû bwa waayia bweenu, îndî barîa bathûûku bwabeekîra inya nîkenda batîtigana na ûthûûku bwaao boonokia mîoyo yaao.

²³Tontû bûû, bûtîkoroonua bioneki kaîrî kana bûriingîrua mantû ja waayia kaîrî. Ngaatunyûkia antû baakwa kuuma njareene cieenu, rîu nîrîo bûkaamenya ni nî ni MWATHANI.”