Read KIMERU BIBLE PROTESTANT EDITION Ezek 16 Bible Online

Ezek 16 - KIMERU BIBLE PROTESTANT EDITION bible

Ezek 16

¹MWATHANI nî aambarîîrie o kaîrî ûûni Ezekieli arambîîra atîrî,

²“Mûtaana wa muntû, îîra ntûûra ya Jerusalemu mantû jamathûûku jarîa îthithîtie.

³Mîîre atîrî, MWATHANI Mûrungu arîîra Jerusalemu ûjû: ‘Gwe waaciarîri nthîgûrûûne ya Kanaani. Abaagu aaumîte nthîgûrûûne ya Amori na nyakwe aaumîte nthîgûrûûne ya Ahiti.

⁴Ningî rîrîa waaciarîrwe mûkou jwaaku jûtaagiitîrwe, na ûtaathambîrue na rûûjî, kana waakwa chumbî kana ûtungwa na nguû.

⁵Gûtî muntû waakwigîîrue kîaao akûthithîria no ûntû bûmwe bwa jau. Îndî gwe nîka waateerwe kîthakeene, nîûntû waathûûrîrwe kuuma ntukû îrîa waaciarîrwe.’

⁶“Naani nî ndaakwonere nkûrûkîte ûkiigaragaragia tharikeene ûgûciarwa. Rîrîa waarî tharikeene, nî ndakwarîrie ndîrakwîra ‘Tûûra!’

⁷Ndîratûma ûkûra bwega o ta mûtî, ûragîa inya, ûrareea na ûraa mwarî. Ûrauma nyoonto, na mûtuundu jûrakûra îndî waarî kîthûnû.

⁸“Rîrîa ndaakûrûkîrîîte akuî na gwe kaîrî, ndîrakwona, nî waarî ûgûkinyia ûkûrû bwa kûgûrwa. Naani ndîratambûrûkia nguû yaakwa ndîragûkunîka kîthûnû gîaaku. Ndîragûciîtîria na ndîreeka kîrîkanîro naagwe ûraa waakwa, nîu ni MWATHANI Mûrungu nkuuga.

⁹Rîu, ndîrakûthambia tharike yaaku na rûûjî na ndîragwaka maguta.

¹⁰Ndîragwîkîra nguû cia gûtuma na ndigi, na iraatû biaathithîtue na mûgûûta na gîtambaa gîa kîongo, kîa gatani, na nguû ya îgûrû ya goro mono.

¹¹Ningî ndîrakûgemia na ndîragwîkîra bangiri njara na ndîragwîkîra mîkathî ya goro nkingo.

¹²Ndîragwîkîra kîmata nyiûrû na mina matû, na thirû înthongi mûtwe.

¹³Tontû bûû, ûrathongomua na thaabu, na fetha. Nguû ciaaku ciaarî cia gatani irîa njega buru na nguû cia hariri na irîa ciagemetue na ndigi. Biakûrîa biaaku biaarî bia mûtu jûrîa mwinyu buru, na nainchû na maguta ja mîzeituni. Naagwe ûrathongoma mono, ûraa mûka-mûnene.

¹⁴Naagwe ûragîa îgweta mono ndeene ya mîgongo îngî nîûntû bwa ûthongi bwaaku, nîûntû nî ndaakûthongomeetie bwega mono. Ûu nîu ûûni MWATHANI Mûrungu nkuuga.

¹⁵“Îndî gwe ûraciîtîkia gwengwa nîûntû bwa ûthongi bûu, ûraambîrîria kûringa ûmaraya na muntû o wonthe ûrîa waakûrûkaga na njîra. Naagwe ûreenyangia ûthongi bwaaku nabo.

¹⁶Ûrajûkia nguû imwe ciaaku ûraigemeria gûntû gwa kûriingîra ûmaraya, bûrîa bûtonekanîte au mbereene na bûtîkoroonekana kaîrî.

¹⁷Ningî ûrarita into biaaku bia thaabu na fetha birîa ndaakûthongomeetie nabio, ûraithithîria mîng'uanano ya arûme ya kûmaramara nayo.

¹⁸Ûrajûkia nguû ciaaku irîa nthongi irîa ndaakûnenkerete ûreekîra mîng'uanano îîu. Ûracoka ûrajûkia maguta jarîa ja mîzeituni ndaakûnenkerete na ubaani ûramîritîra birî kîgongwana.

¹⁹Ningî nî ndaakweere kinya biakûrîa nabio biaarî maguta ja mîzeituni na mûtu jûrîa mûthongi na nainchû. Naagwe ûrabijûkia ûrabirita birî kîgongwana kîrî yeera rîrîthongi kîrî mîrungu ya mîng'uanano. Ûu nîu ni MWATHANI Mûrungu nkuuga.

²⁰“Ûracoka ûrooraga ataana baaku na aarî baaku, barîa waanciarîrîte ûrabarita barî kîgongwana kîrî mîrungu ya mîng'uanano nîkenda booragwa. Kûrega gwîtîkia kûu gwaaku ga kûrî ûntû bûbûniini?

²¹Atî ûûraga aana baakwa na ûbarita ta kîgongwana gîa gwakîîria?

²²Kîrî ûthûûku bûu wathithagia na ûûmaramariine bwaaku, ûtaaririkanaga kinya rîrîa waarî gakeenke, rîrîa waigaragaragia tharikeene ûrî kîthûnû buru ûtî na nguû.”

²³MWATHANI Mweneinya ariuga atîrî, “Wûi! Wûi kîrî gwe! Nyuma ya kûthithia mantû jamaingî jamathûûku. Ûu nîu MWATHANI Mûrungu akuuga.

²⁴Nteere cia njîra cionthe nî waakîte gûntû gwa kûthaathaîria mîrungu ya mîng'uanano nîkenda ûtaambia ûmaraya bwaaku.

²⁵Ikuumbone bionthe bia njîra nî waakîre gûntû gwa kûthaathaîria mîrungu ya mîng'uanano. Ûramaramara na o bunka muntû wakûrûkagîîra njîreene îîu, ûrathûûkia ûthongi bwaaku. Ntukû cionthe nîka wongagîîra ûmaraya bwaaku.

²⁶Kinya Amisri, atûûri baaku barîa bendeete mantû ja ûmaramari nî waamaramarîre nabo, wathithagia ûu nîkenda ûnthûûria.

²⁷Tontû bûû, ngûtambûrûkia njara nîkenda ngûkanûkia. Ngaagûtuunya kiigai gîaaku, na nkûnenkanîre kîrî anthû baaku Afilisti, nîûntû kinya bo nî bameneete ûmaramari bwaaku.

²⁸Ningî nî waaringîre ûmaraya kinya na Asîria, nîûntû ûting'anagîrwa. Îî kinya rîrîa wamaramarîre nabo, ûtaang'anîîrwe.

²⁹Ûracoka ûramaramara na nthîgûrû ya Babiloni îrîa îringaga biashara. Kinya yo îtaatûmîre ûng'anîrwa.

³⁰“MWATHANI Mûrungu arîkûûria ka wendeete ûmaramari bûng'ana atîa? Kinya wathithia ûmaraya bûng'ana ûû, ûtîng'anagîrwa.

³¹Njîreene cionthe nî waakîrîte mîrungu ya mîng'uanano gûntû kwa kûmîthaathaîria nîkenda ûtaambia ûmaraya. Îndî gwe ûtaakari ta maraya jangî, nîûntû ûteendaga kûrîyia.

³²Gwe ûkari ta mûka mûthûngîîri, ûrîa ûthûngagîîra na antû ageni antû a kûthengeerwa nî mûkûrû waawe.

³³Arûme nîbo barîaga maraya, îndî gwe nîka ûrîaga arûme bau, ûgacoka ûkabakukuma nîkenda beeja kîrî gwe kuuma nteere cionthe.

³⁴Tontû bûû, gwe waarî mwanya buru na amaraya bangî. Gûtî muntû waagûcwaga bûringa nawe ûmaraya bûu. Gwe nîka waarîaga antû îndî gwe ûtaarîagwa. Tontû bûû, gwe waarî mwanya na bangî.”

³⁵MWATHANI ariuga atîrî, “Nandî rî Jerusalemu, gwe maraya, thikîîra ûrîa MWATHANI akuuga.

³⁶MWATHANI Mûrungu ariuga gwe nî waaritîre nguû ta maraya ûrainenkanîra kîrî anyaanya baaku bonthe, na kîrî mîrungu ya mîng'uanano. Ningî nî waaritîre aana baaku barî kîgongwana kîrî mîrungu îîu ya mîng'uanano.

³⁷Tontû bûû, nkaareeta anyaanya baaku bonthe barîa weendeete na barîa ûthwîre, mbothûranie kuuma nteere cionthe. Naani ngaakûrita nguû nîkenda boona kîthûnû gîaaku.

³⁸Ngakûgiitîra ta ûrîa nkanûkagia aka athûngîîri na barîa ooragani. Tontû bwa mûthûûro na rûriitho rwaakwa ngaatua ûûragwe.

³⁹Ngaakûnenkanîra kîrî anyaanya baaku nabo bakaamomoranga tûtûmbî tûrîa ûthithagîria ûmaraya bwaaku. Nabo bagaakûrita nguû bagûtuunye into bia goro birîa wîkagîra bagûtige ûtheri.

⁴⁰Bakaareeta kîrîndî gîkiingî gîkûûrage na maiga na gîkûgiitange tûchunchî na nchiû.

⁴¹Bakaaîthia nyomba ciaaku na bagûkanûkie aka bangî bategeete. Naani ngatûma ûtigane na ûmaraya bwaaku, ûtige gûkukuma anyaanya baaku.

⁴²Tontû bûû, mûthûûro jwaakwa jûkathira mborere. Naani ntîthûûra kaîrî.

⁴³Nî ûûrîrîîtue nî mantû jarîa ndaakûthithîrîtie ûrî ûmwîthî, na woorîrua ûrîa wanthûûrîtie nîûntû bwa mantû jarîa wathithîîrie. Tontû bûû, ngakûrîyia nîûntû bwa mantû jarîa ûthithîtie. Nîkî ûntû woongereete ûmaraya kîrî moothûûku jaaku jangî? Ûu nîu MWATHANI Mûrungu agûkûûria.”

⁴⁴MWATHANI ariuga atîrî, “Muntû wonthe ûrîa ûtumagîra njuno, agatumîra njuno îîjî îgûrû rîaaku; ‘Mwarî akari o ta ng'ina.’

⁴⁵Gwe ûrî mwarî wa nyakwe, nyakwe ûrîa waathûûrîre mûkûrû waawe amwe na aana. Ningî gwe ûrî mwarî wa ng'ina wa aarî ba nyakwe, barîa baathûûrîre akûrû baao amwe na aana. Nyakwe nî wa kuuma nthîgûrûûne ya Ahiti na abaagu nî wa kuuma nthîgûrûûne ya Amori.

⁴⁶Mwarî wa nyakwe ûrîa mûkûrû nî Samaria îrîa îrî bwa ûrîo bwaaku, amwe na tûtûûra tûrîa tûmîthiûrûkîrîte. Ningî mwarî wa nyakwe ûrîa mûnini nî Sodomu îrîa îrî bwa ûmotho bwaaku, amwe na tûtûûra tûrîa tûmîthiûrûkîrîte.

⁴⁷Amwe na bûu ûtabathingatîre ûng'anîrwa nî mîîtîre yaao, kana ûthithia moothûûku ta jarîa baathithagia. Nyuma ya kagiita gagakai nîgwe waarî mûmaramari nkûrûki ya bo na njîra cionthe.

⁴⁸“Ûûni MWATHANI Mûrungu ûrîa ûrî mwoyo ndîkwîra ûjû: mwarî wa nyakwe ntûûra ya Sodomu amwe na tûtûûra twaayo îtathithia moothûûku ta jarîa ûthithîtie gwe amwe na tûtûûra twaaku.

⁴⁹Atîrî, meeyia ja mwarî wa nyakwe tawe ntûûra ya Sodomu nî jaja: we na tûtûûra twaawe baarî na rwikumio nîûntû bwa kwîthîrwa barî na biakûrîa bia kûng'ana, na bakarîte kiindajî. Îndî bo bataateethagia nkîa na barîa baarî na ûbatu.

⁵⁰Nabo nî baaikumîtie na barathithia mantû jamathûûku mono. Tontû bûû, ndîrabathiria buru o ta ûrîa bwijî.

⁵¹Samaria îtaathithia kinya nusu ya mantû jaaku jamathûûku. Nîgwe ûthithîtie mantû jamathûûku nkûrûki ya yo, watûma aarî ba nyakwe booneka ta baagîrîte nîûntû bwa mantû jamathûûku jonthe jarîa ûthithîtie.

⁵²Ûmîîria nthao ciaaku kinya cio. Nîkwîthîrwa aarî ba nyakwe barîoneka barî babeega bakîringithanua na ûthûûku bûrîa ûthithîtie. Tontû bûû, wimene nîûntû bwa gûtûma aarî ba nyakwe booneka barî babaagîru.”

⁵³MWATHANI nî eerîre Jerusalemu atîrî, “Ngaacokanîîria ntûûra ya Sodomu na tûtûûra twaayo ûthinyaari bûrîa twaarî nabu na ncokanîîrie Samaria na tûtûra twaayo ûthinyaari bûrîa twaarî nabu. Ningî ngaagûcokeria ûthinyaari bwaaku wengwa.

⁵⁴Naagwe ûkaigua ûrî na nthao. Nacio ikooneeria aarî ba nyakwe atî nîbo baarî babeega nkûrûki yaaku.

⁵⁵Nabo aarî ba nyakwe, ntûûra ya Sodomu na ntûûra ya Samaria na tûtûûra tûrîa tûcithiûrûkîrîte tûgaacoka kûthinyaara kaîrî. Kinya gwe amwe na tûtûûra tûrîa tûkûthiûrûkîrîte bûgaacoka kûthinyaara kaîrî.

⁵⁶Anga ûtaaragia bwa Sodomu rîrîa waikumagia,

⁵⁷mbere ya ûthûûku bwaaku buumîrua? Nandî gwe ûkari tayo, nthîgûrû ya Edomu na ya Afilisti baaragia ciaaku. Ningî atûûri bangî baaku bonthe nîka bakûthwîre.

⁵⁸No mwanka ûkanûkue nîûntû bwa ûthûngîîri bwaaku na ûmaramari bûrîa ûthithîtie. Ûu nîu MWATHANI akuuga.”

⁵⁹MWATHANI Mweneinya ariuga atîrî, “Nî mma ngaakûthithîria ûrîa wagîrîte kûthithîrua, nîûntû gwe nî woonanîrie rûmena ûrarega gwîka kîrîkanîro.

⁶⁰Amwe na bûu nkaaririkana kîrîkanîro gîaakwa naagwe kîrîa tweekanîrîte ûrî ûmwîthî. Naani ngeekanîra naagwe kîrîkanîro kîrîa gîgaatûûra kenya na kenya.

⁶¹Rîu ûkaririkana ûrîa ûthithîtie ûcokerwe nî nthao. Îgiita rîu nîrîo rîrîa ngaagûcokeria aarî ba nyakwe bo baîrî; ûrîa mûkûrû na ûrîa mwanake. Ngaatûma bae ta aarî baaku kinya këethîra tîkîo kîrîkanîro twekanîrîte.

⁶²Nkaarikithia kîrîkanîro gîaakwa naagwe, nîkenda ûkaamenya atî ni nî ni MWATHANI.

⁶³Ngaakûrekera meeyia jonthe jarîa wathithia, îndî gwe rîrîa ûkajaririkanaga ûkaigua nthao ûrîa ûtîûmba kwaria.” Ûu nîu ni MWATHANI Mûrungu nkuuga.