Read KIMERU BIBLE PROTESTANT EDITION Ezek 17 Bible Online

Ezek 17 - KIMERU BIBLE PROTESTANT EDITION bible

Ezek 17

¹MWATHANI nî aambarîîrie ûûni Ezekieli arambîîra atîrî,

²“Mûtaana wa muntû, îîra antû ba Israeli baciûre ntaî îîjî, na ûbeere ngerekano îîjî;

³Beere MWATHANI Mûrungu ariuga ûjû: Kûrî ndiiû yeetîre Lebanoni îrakinya kathûmbi ka mûtarakwa. Nayo yaarî înene mono, îrî na mathagu jamanene na mbûî inene. Nayo yaarî na rangi inyiingî inthongi.

⁴Nî yaaunîre karwang'i kamwe ka mûtarakwa îragaikia nthîgûrû ya aringi biashara, na îrageeka ntûûreene îmwe ya aringi biashara nthîgûrû îîu.

⁵Rîu nî yaacokere îrajûkia karwang'i kuuma nthîgûrû ya Israeli na îrakaanda mûthetuune jûmûnoru na antû kwaarî rûûjî rwa kûng'ana.

⁶Nako karakûra karataamba karaa mûzabibû jûrî na mpang'i na mabûûra. Mpang'i nacio irakûra ciitîtie bwa kûrîa ndiiû yaarî. Nayo mîri îrakûra îreenama nthîgûrû mono.

⁷“Îndî rî, nî kwaarî na ndiiû îngî înene, na yaarî na mathagu jamanene, na mbûî inene. Atîrî, mûzabibû jûu naju nî jwerekeerie mpang'i na mîri kîrî yo nîkenda îbiîtûûrîria rûûjî, jûrî arîa jwaandi.

⁸Ndiiû îîu nî yaajûkûûrîre îrajwaanda gûntû gûkûnoru akuî na rûûjî rwa kûng'ana nîkenda juuma mpang'i, na jûciara nzabibû na jwaa mûtî jûmwega mono.

⁹Tontû bûû, MWATHANI Mûrungu arîûria ûjû, mûzabibû jûu jûgakûra? Anga ndiiû yajûkûûra na yaunanga mpang'i ciaaju, anga mabûûra jatînyaara? Mûzabibû jûu no jûkûûrwe gûtîgûtumîrwa inya înyiingî na jûtîkwenda antû babaingî ba kûjûkûûra.

¹⁰Rîrîa jûgakûûrwa nîkenda jwaandwa antû angî, jûkagwata? Anga jûtîûma buru jûrî au jwaandi rîrîa jwaringwa nî ruuo rwa bwa gaiti?”

¹¹MWATHANI nî aambarîîrie arambîîra atîrî,

¹² “Ûûria ndemi iji këethîra nî ikûmenya ûrîa ngerekano îîjî îkuuga. Beere atîrî, mûnene wa Babiloni nî eetîre Jerusalemu, aragwata mûnene waayo amwe na atongeeria bangî baayo areeta nabo Babiloni.

¹³Ningî arajûkia ûmwe wa antû ba nja ya mûnene areeka kîrîkanîro nawe, na aramûnywithia muuma.

¹⁴Naju muuma jûu jwaarî atî mûgongo jûu no mwanka jwathîkîre Waatho na jûtigane na gûciimbaimbagia na jwîte na mbere kûmenyeera kîrîkanîro kîu.

¹⁵Îndî mûnene wa Juda nî aathûkîrie kîrîkanîro kîu aratûmana Misri nîkenda aeewa mbarathi na njûûrî înene ya ndwaa. Muntû ûu oomba kûûmbana? Muntû ta ûu oomba kwonoka? Muntû ta ûu ûthûûkîtie kîrîkanîro ateetha?

¹⁶MWATHANI Mûrungu ariuga atîrî, Nî mma ûntû ngaatûûra mwoyo, mûnene ûu wa Juda agaakuîra Babiloni, nîûntû nîku ûrîa waamweetherie mûnene na bareekanîîra mûciîtio jûrîa athûûkîtie, atûûraga.

¹⁷Kinya Farao na njûûrî yaawe înene ya ndwaa, îrîa îrî inya mono îtîmûteethia, rîrîa Ababiloni bakaithûka na beenje mîguuru kûthiûrûkîra ntûûra na baciîgîîrie nthingo irîa ciaaki bakîenda kûûraga antû babaingî.

¹⁸Nîkwîthîrwa we ataathingatîre mîciîtio eeka kîrîkanîro kîrîa eekîte, îndî nîka aathithîrie mantû jarîa augîîte atîthithia, tontû bûu atîonoka.”

¹⁹Tontû bûû, MWATHANI Mûrungu ariuga atîrî, “Nî mma ûntû ngaatûûra mwoyo no mwanka mûrîyie nîûntû bwa gwîka kîrîkanîro agîtumagîra riîtwa rîaakwa na agakîthûûkia.

²⁰Naani nkaagera neeti mûgwate nayo. Ningî nkaamwikia Babiloni mûkanûkîrie nao, nîûntû bwa kûrega kwaa mwîtîkua kîrî ni.

²¹Asikarî baawe ba ndwaa barîa beega buru bakooragîrwa ndweene, na barîa bagaatigara bakaanyaganua kunthe. Rîu nîrîo bûkaamenya ni nî ni MWATHANI.”

²²MWATHANI Mûrungu nî aambarîîrie arambîîra atîrî, “Ni ningwa nkauna karwang'i gakeethî kuuma kathûmbî ka mûtarakwa. Îî nkauna karwang'i gakeethî kuuma kathûmbi ka mûtî. Naani ningwa ngaakaanda kîrîmeene gîkîraaja.

²³Naani ngaakaanda kîrîmeene kîa Israeli kîrîa kîraaja buru. Nako gagaakûra kae mûtarakwa jûmûnene jûrî na mpang'i na jwîthîrwe jûrî na mpîndî. Nyomoo cia mîthemba yonthe îkaamamaga rungu rwaaju na nyoni igaaka itara mpang'iine ciaaju.

²⁴Nayo mîtî yonthe nthîgûrûûne îkaamenya atî nî ni MWATHANI. Ni nî ni ngiitaga mîtî îrîa mîraaja na ngatûma mîtî îrîa mînini îkûra. Nî ni ntûmaga mîtî îmîîthî inyaara, na îrîa înyaari ngatûma îriiba. Ûu nîu ûûni MWATHANI mbugîîte na nîu nkaathithia.”