Read KIMERU BIBLE PROTESTANT EDITION Ezek 18 Bible Online

Ezek 18 - KIMERU BIBLE PROTESTANT EDITION bible

Ezek 18

¹MWATHANI nî aambarîîrie kaîrî ni Ezekieli, arambûûria atîrî,

² “Nî njuno ya mûthemba jûrîkû îîjî antû ba Israeli batindaga kuuga atî ‘Aciari nîbo baarîîre nzabibû irî na nchechû, îndî nî aana baao baigîrue nchechu iu.’”

³MWATHANI Mûrungu ariuga atîrî, “Ûntû ngaatûûra mwoyo, bûtîkorotumîra njuno îîu Israeli kaîrî.

⁴Atîrî, mwoyo jwa o muntû wonthe nî jwaakwa. Mwoyo jwa mûciari o na kinya jwa mwana nî jwaakwa. Muntû ûrîa ûkeeyia nîwe ûgaakua.

⁵“Gûkëethîrwa kûrî na muntû ûmwagîru na ûthithagia ûrîa kwagîrîte,

⁶na akëethîrwa atîthaathagia mîrungu ya mîng'uanano îrîa antû ba Israeli bathaathagia kana arîa igongwana birîa îritagîrwa, kana athûngîîra na mûka wa muntû ûngî, kana athengeera mûka arî na mweri,

⁷kana aiinyagîîria antû bangî, îndî akëethîrwa nî arîaga marandû jaawe, na atiiyaga, na nî amathagîra barîa barî na mpara na akaa barîa barî kîthûnû nguû.

⁸Ningî akëethîrwa atîkobithanagia mbeecha eerîgîîrîte gûcokerua irî na maciara, kana ajûkia mpongeeri îrîa îtî yaawe. Ningî akëethîrwa nî aimenyagîra atîkathithie ûthûûku, na akagiita magamba na îota.

⁹ Nawe akëethîrwa nî athingataga maathana jaakwa na atiunaga Waatho bwaakwa. Muntû ta ûu nî ûmwagîru. Nî mma muntû ta ûu, agaatûûra mwoyo. Ûu nîu ûûni MWATHANI Mûrungu ndauga.

¹⁰“Muntû akëethîrwa arî na mûtaana wiiyaga na akooragana,

¹¹na akathithia ta mantû jarîa kinya îthe ataathithia, na akarîa igongwana birîa biritîri mîrungu ya mîng'uanano, ningî akathengeera mwekûrû wa muntû ûngî,

¹²kana akainyagîîria nkîa kana athîîni, kana arî mûtuunyani, kana atîrîaga marandû, kana ageeta kûthaathayia mîrungu ya mîng'uanano,

¹³kana akoobithania mbeecha eerîgîîrîte kwona mpongeeri na akamîjûkia. Muntû ta ûu agaatûûra mwoyo? Arî! Akëethîrwa athithîtie mantû jau jonthe jamathûûku, nî mma agaakua, nîûntû bwa mantû jarîa aathithîtie.

¹⁴“Îndî muntû ta ûu akëeja gûciara mwana, nawe mwana ûu akoona meeyia jonthe jarîa îthe athithia. We akaigua ûguaa akarega kûthithia meeyia ta jau ja îthe.

¹⁵Akarega kûrîa igongwana birîa biritîri mîrungu ya mîng'uanano, kana athaathayia mîrungu ya mîng'uanano îrîa antû ba Israeli bathaathagia kana athengeera mwekûrû wa muntû ûngî,

¹⁶kana akëethîrwa atî ûthûûku na muntû ûngî, kana akoobithania eerîgîîrîte mpongeeri, kana atuunyana. Îndî nî areraga barîa barî na mpara na akaa barîa barî kîthûnû nguû.

¹⁷Ningî nî aigwataga atîkathithie ûthûûku na atîkobithanagia eerîgîîrîte kwona mpongeeri. Akëethîrwa nî amenyagîîra Waatho na mataaro jaakwa, nî mma, muntû ta ûu agatûûra mwoyo na atîkua nîûntû bwa meeyia ja îthe.

¹⁸Îndî îthe wa muntû ta ûu agaakua nîûntû bwa meeyia jaawe; nîûntû bwa gûtuunya antû bangî na kûbaaîria na kûbathithîria mantû jamathûûku.

¹⁹“Îndî buî bûûragia atîrî, ‘Nîkî ûntû mûtaana atîkanûkagua nîûntû bwa meeyia ja îthe?’ Atîkanûkagua nîûntû mûtaana nî athithîtie mantû jarîa jaagîrîte na ja mma, na aathîkîra mawaatho jaakwa jonthe. Nî mma we agaatûûra mwoyo.

²⁰ Muntû ûrîa ûthithagia meeyia nîwe ûgaakua. Mûtaana atîkanûkua nîûntû bwa meeyia ja îthe, kana îthe akanûkua nîûntû bwa meeyia ja mûtaana waawe. Muntû ûmwagîru akarîwa na waagîru bwaawe, nawe muntû ûmûthûûku akarîwa na ûthûûku bwaawe.

²¹“Îndî muntû ûmûthûûku akëeja gûtigana na meeyia jonthe jarîa athithîtie, nawe akaambîrîria kûthingata mawaatho jaakwa na kûthithia mantû ja mma na jaagîrîte, muntû ûu nî mma agaatûûra mwoyo.

²²Gûtî îîyia noo rîmwe rîa jarîa aathithia rîkaririkanwa. We agaatûûra mwoyo nîûntû bwa mantû jamaagîru jarîa athithîtie.

²³Ka bûkûthûgaania nî ngwîragua muntû ûmûthûûku agîkua? Tî kaaba akairira na agatigana na mîîtîre îmîthûûku agatûûra mwoyo? Ûu nîu ûûni MWATHANI Mûrungu nkûûria.

²⁴Îndî muntû ûmwagîru akëeja kûgarûka agatigana na waagîru bwaawe, na akaambîrîîria kûthithia meeyia, akaambîrîria kûthithia mantû jamathûûku o jarîa jathithagua nî antû babaaî, ka muntû ta ûu oomba gûtûûra mwoyo? Gûtî ûntû noo bûmwe bwa mantû jamaagîru jarîa athithia bûkaririkanwa. Agaakua nîûntû bwa meeyia na ûthûûku bûrîa athithîtie.

²⁵“Îndî buî buugaga atî, ‘MWATHANI atîthithagia mantû ja îota.’ Nandî buî antû ba Israeli thikîîreeni. Buî bûrîthûgaania atî ntîthithagia mantû ja îota. Ka mantû jaakwa jatî ja îota? Anga mantû jeenu tijo jatî ja îota?

²⁶Muntû ûmwagîru akëeja gûtiga kûthithia mantû jamaagîru, akaambîrîria kûthithia meeyia, muntû ûu agaakua, nîûntû bwa meeyia jau.

²⁷Ningî muntû ûmûthûûku akëeja gûtigana na ûthûûku bûrîa aathithia akaambîrîria kûthithia jarîa jaagîrîte, muntû ûu agatûûra mwoyo.

²⁸Nîkwîthîrwa muntû ta ûu nî aaithûgaanîrie bwega aratigana na ûthûûku bunthe bûrîa aathithia, no mwanka atûûre mwoyo.

²⁹Îndî antû ba Israeli bo baugaga, ‘MWATHANI nî athithîtie mantû jatî ja îota.’ Ka mantû jaakwa jatî ja îota? Anga tî mantû jeenu jatî ja îota?

³⁰“Tontû bûû, buî antû ba Israeli, bwinthe nkaabûgambithia, o muntû kûringana na mantû jarîa athithîtie. Ûu nîu ûûni MWATHANI Mûrungu nkuuga. Irireeni, o muntû atigane na meeyia jaawe jonthe, bûtîkeeje kûthirua nîjo.

³¹Tiganeni na meeyia jonthe jarîa bwanthithîria, bûgîe na nkoro injerû na Roho ûmwerû. Nîkî gîgatûma bûkua buî Aisraeli?

³²Ûûni ntîgwîragîrua gîkuû kîa muntû kinya ûrîkû. Tontû bûû, irireeni, naabuî bûtûûre mwoyo. Ûu nîu ûûni MWATHANI Mûrungu nkuuga.”