Read KIMERU BIBLE PROTESTANT EDITION Ezek 19 Bible Online

Ezek 19 - KIMERU BIBLE PROTESTANT EDITION bible

Ezek 19

¹MWATHANI nî aambîrîre mbine rwîmbo rwa kwithikîîra nîûntû bwa atongeeria ba Israeli, naru nî:

²Wûi! Nyakwe aarî ngatûnyi nka gatîgatîîne ka ngatûnyi! Aarereere bianaana biaawe gatîgatîîne ka ngatûnyi ing'eentu.

³Ararera kîanaana kîmwe, kîraa mûnyambû jwa ngatûnyi. Kîramenya kûûraga nyamû, kîraa mbûragani ya antû.

⁴Mîgongo nî yaaigîrue bwaayo îramîgwata na mûtego jwa îrinya îramûkururia na mûgwati mwanka Misri.

⁵Ng'ina areeteera mwanka aroona atî na wîrîgîîro. Ararera kîanaana kîngî nakîo kîraa mûnyambû jwa ngatûnyi.

⁶Nakîo gîakûra kîraa mûnyambû jwa ngatûnyi. Kîramenya kûûraga nyamû kîraa mbûragani ya antû.

⁷Nayo îreenyangia biitiiro biaao îrathiria buru ntûûra ciaao. Nthîgûrû amwe na barîa bonthe barî ku nî baamakaga rîonthe rîrîa îruumîte.

⁸Nayo mîgongo îramîkûmîra mûtego mîtego îroojûûra nteere cionthe. Îramîkunîka na ngara cia ûthoogi îramîgwata na mûtego jwa îrinya.

⁹Îramîîkîra gîtegiine na mîkûmo îramiikia kîrî mûnene wa Babiloni. Îramiingîra ûrîa îtîkoroomba kûruuma kaîrî irîmeene bia Israeli.

¹⁰Nyakwe aakari ta mûzabibû jwaandi rûteere rwa rûûjî; naju jwaarî na mpang'i inyiingî na jwaaciaraga mono nîûntû nî jwoonaga rûûjî rwa kûng'ana.

¹¹Rwang'i rwaaju rûrîa rûkamu rwaeere rûturo rwa mûnene. Mûzabibû jûu jwaneneere jûrakinya matuune antû bonthe baroona ûraaja na mpang'i ciaaju.

¹²Îndî mûzabibû jûu nî jwaakûûrîrwe na mûthûûro jûragerwa nthîgûrû. Ruuo rwa bwa gaiti rûrajûûmia na nciara ciaaju iroorûûka. Mpang'i ciaaju irooma, iraakîîrua na mwanki.

¹³Nandî jwaandi rwanda gûntû gûkûûmo ng'a.

¹⁴Mwanki jwaambîre kwîîthia gîtina jûracoka jûraîîthia mpang'i na jûraîîthia nciara ciaaju. Tontû bûû, gûtî rwang'i rûrî na inya rûtigeere na gûtî ru rûkorwaa kaîrî rûturo rwa ûnene. Rûrû nî rwîmbo rwa kwithikîîra naru rwinagwa kaîrî na kaîrî.