Read KIMERU BIBLE PROTESTANT EDITION Ezek 2 Bible Online

Ezek 2 - KIMERU BIBLE PROTESTANT EDITION bible

Ezek 2

¹Nî ndaigîrue kajû kau gakiuga atîrî, “Mûtaana wa muntû rûngama nkwarîrie.”

²Kajû kau gakîmbaragîria o ûu, Roho wa Mûrungu nî aatonyere kîrî ni na aratûma ndûngama. Ndîreeta na mbere kwigua gakîmbîîra atîrî,

³“Mûtaana wa muntû, nî ngûgûtûma kîrî antû ba Israeli, nabo nî mûgongo jwa ndemi irîa iregeete kûmbathîkîra mwanka naarua tûrî o ta ûrîa biûjûjû biaao biaakari.

⁴Nabo nî antû ntûrîka itiigagua ûntû. Nî ngûgûtûma kîrî bo ûbeere ûrîa ûûni MWATHANI Mûrungu nkuuga.

⁵Ningî antû bau ndemi bakwigua kana barega gûkwigua bakaamenya kûrî na kîroria gatîgatî kaao.

⁶Naagwe mûtaana wa muntû menya ûbakîra kana nteto ciaao igwîkîra ûguaa. Kinya ûkëethîrwa ûrî gatîgatî ka antû bakari ta miigua, na nkoonko, na tûng'aurî menya ûkîra. Menya wigua ûguaa nîûntû bwa nteto irîa bakaaria na ûrîa bagagûkûnjîra moothiû nîûntû bo nî ndemi.

⁷No mwanka ûbeere ûrîa mbugîîte beenda baigue kana barege kwigua nîûntû bo nî antû ndemi.

⁸“Îndî gwe mûtaana wa muntû thikîîra ûrîa ngûkwîra. Menya waa ndemi ta ûrîa antû bangî ba Israeli baeete ndemi. Agamia kanyua ûrîe kîrîa ngûkûnenkera.”

⁹ Naani rîrîa ndaaciûkîrie meetho ndîroona njara îtaambûrûkîtue kîrî ni îgwete yuku rîaandîki.

¹⁰Nawe ûrîa wagwete yuku rîu ararîtambûrûkia mbere yaakwa. Narîo nî rîaandîki nteere cio-ijîîrî nteto cia kîrîro, na cia kwithikîîra, na cia kîeba.