Read KIMERU BIBLE PROTESTANT EDITION Ezek 20 Bible Online

Ezek 20 - KIMERU BIBLE PROTESTANT EDITION bible

Ezek 20

¹Kûrî ntukû ya îkûmi ya mweri jwa îtaano mwakeene jwa mûgwanja tûrî kîthamîrioone, atongeeria bamwe ba Israeli nî beejîre kûmbûûria ni Ezekieli wendi bwa MWATHANI. Nabo nî baakarîre nthî mbere yaakwa.

²MWATHANI nî aambarîîrie arambîîra atîrî,

³“Mûtaana wa muntû, arîria atongeeria ba Israeli ûbeere MWATHANI Mûrungu arîbooria këethîra nîka beetîte kûmûûria wendi bwaawe? MWATHANI Mûrungu agûciîtia auga atîrî, ‘Ûntû ngaatûûra mwoyo, ntîîtîkîîria bûûria wendi bwaakwa.’

⁴“Mûtaana wa muntû, ûkaabatuîra îgamba? Baririkanie ûthûûku bûrîa biûjûjû biaao biaathithîrie.

⁵ Ningî ûbeere ni MWATHANI Mûrungu ndiuga ûjû: ntukû îrîa ndaathuurîre Aisraeli nî ndaabaciîtîîrie na ndîraimenyithania kîrî nchiarwa cia Jakubu rîrîa ciaarî Misri ndîraciîra atîrî, ‘Ni nî ni MWATHANI Mûrungu weenu.’

⁶Ntukû îîu nî ndaabeerîre nkaabarita nthîgûrûûne ya Misri mbaikie nthîgûrûûne îrîa mbathuurîrîte. Nthîgûrû înthongi îrî na mûthetu jûmûnoru na ûtonga bûbwingî.

⁷Naani nî ndaabeerîre bate mîrungu ya mîng'uanano îrîa beendeete. Ndîrabeera bagáaciîkîra mûgiro na mîrungu ya Misri, nîûntû nî ni MWATHANI Mûrungu waao.

⁸Îndî bo nî baaregere kûmbathîkîra kana kûnthikîîra. Bataateere into biaao bibithûûku, kana batigana na mîrungu ya mîng'uanano ya Misri. “Naani ndîrauga nkaabatûrîkîria mûthûûro barî o kûu Misri.

⁹Îndî ntaathithîrie ûu, nîûntû nteendaga gwîkîrithia riîtwa rîaakwa nthao kîrî antû ba mîgongo îngî kûrîa Aisraeli baatwîre. Nîkwîthîrwa nî ndaabaciîtîrîtie mbere ya mîgongo îîu atî nkaabarita nthîgûrûûne ya Misri.

¹⁰“Tontû bûû, ndîrabarita Misri ndîrabaikia rwanda.

¹¹ Ndîrabanenkera Waatho bwaakwa na mataaro jaakwa jarîa jagatûma muntû wonthe ûrîa ûkaajathingataga atûûra mwoyo.

¹² Ningî ndîraeethia sabatû rwaano rwa kîrîkanîro gîaakwa nabo. Nayo nî yakûbaririkanagia atî ni MWATHANI nî ni mbaeethagia babatheru.

¹³Îndî antû ba Israeli nî baaregere kûmbathîkîra barî rwanda. Bataathingatîre Waatho bwaakwa îndî nîka baareganîre na mataaro jaakwa, jarîa muntû abuîrîte kûthingata agatûûra mwoyo. Ningî nî beekîîre ntukû cionthe cia sabatû mûgiro mono. “Naani ndîrathûgaania ka nkaabatûrîkîria marûrû barî kûu rwanda, mbathirie buru.

¹⁴Îndî ntaathithîrie ûu, nîûntû nteendaga gwîkîrithia riîtwa rîaakwa nthao kîrî antû ba mîgongo îngî kûrîa ndaabaritîre.

¹⁵ Ningî nî ndaabaciîtîrîtie barî rwanda ndîrabeera atî ntîbaikia nthîgûrû îrîa ndaabeerîîrîte, îrîa nthongi na îrî mûthetu jûmûnoru na ûtonga bûbwingî.

¹⁶Ndaaberîre ûu nîûntû nî baaregeete kwaathîkîra Waatho bwaakwa na baarega kûthingata Mataaro jaakwa, nîka beekagîra sabatû ciaakwa mûgiro. Bo bagwîragua nî kûthingata mîrungu yaao ya mîng'uanano.

¹⁷“Amwe na bûu, nî ndaabaigîrîîrue kîaao, ntaabathirîrie rwanda buru.

¹⁸Îndî nî ndeerîre aana barîa barî rwanda atî bakáthingata waatho bwa aciari baao, kana bathingata mataaro jaao, kana baciîkîra mûgiro na mîrungu yaao ya mîng'uanano.

¹⁹Ni nî ni MWATHANI Mûrungu weenu. Thingatageeni maathana jaakwa na bûmenyeere bwathîkagîre mawaatho jaakwa.

²⁰Athûrageeni sabatû ciaakwa nîkenda ciaa rwaano rwa Kîrîkanîro gîaakwa naabuî. Iji ikaabûririkanagia atî ni nî ni MWATHANI Mûrungu weenu.

²¹“Îndî kinya aana baao nî baaregere kûmbathîkîra. Bataathîkîîre Waatho bwaakwa kana baathîkîra mataaro jaakwa, jarîa muntû abuîrîte kûthingata nîkenda atûûra mwoyo. Nabo nî beekîîre sabatû ciaakwa mûgiro. “Naani ndîrauga ka nkaabatûrîkîria mûthûûro barî kûu rwanda.

²²Îndî ndîraigwata, ntîkeeje gûtûma riîtwa rîaakwa rîmeneerua nî mîgongo îrîa yooneete nkîrita Aisraeli kuuma Misri.

²³ Ningî nî ndaabaciîtîîrie rwanda atî nkaabanyagania nthîgûrûûne kunthe.

²⁴Naani ndaathithîrie ûu nîûntû nî baaregere kwathîkîra Waatho bwaakwa, na baarega kûthingata kîrîra gîakwa na beekîra sabatû ciaakwa mîgiro, bathaathayia mîrungu ya mîng'uanano îrîa biûjûjû biaao biaathaathagia.

²⁵“Rîu ndîrabanenkera Mataaro jataarî jameega na Waatho bûrîa bûtîeejana mwoyo.

²⁶Nî ndaabarekererie baraciîkîra mûgiro na birîa baaritaga, ndîrabarekeeria bararita aana baao ba kîranga bonthe nîkenda baritwa barî kîgongwana kîa gwakîîria. Ndaathithîrie ûu nîkenda mbamakia na bamenya atî ni nî ni MWATHANI.

²⁷“Tontû bûû, mûtaana wa muntû, arîria antû ba Israeli ûbeere MWATHANI Mûrungu ariuga: Biujûûjû biaao nî biaandumîre rîrîa biaaregere kwîthîrwa birî eetîkua.

²⁸Rîrîa ndaabaikîrie nthîgûrû îrîa ndaabeerîîrîte, nîka baambîrîrie kûritîra irîma na mîtî îrîa yaariibîte igongwana. Baranthûûria na igongwana biaao bia gwakîîria na bia ndibei birîa biaeeraga bwega.

²⁹Ndîrabooria atîrî, Nî irîma bikari biu bwîtaga kûritîra igongwana? Kuuma rîu mwanka naarua tûrî, biîtagwa Bama.

³⁰“Tontû bûû, îîra antû ba Israeli MWATHANI Mûrungu arîbooria ûjû: Nîkî bûgûciîkîra mûgiro ta biûjûjû bieenu bûthingatîte mîrungu ya mîng'uanano?

³¹Rîrîa bûritaga biewa bieenu na aana beenu barî igongwana kîrî mîrungu yeenu ya mîng'uanano nîka bûciîkagîra mûgiro mwanka naarua tûrî. Ningî bûkeenda kwîja kûûria wendi bwaakwa, ûntû ngatûûra mwoyo, ni MWATHANI Mûrungu ntîîtîkîîria bwîrwa wendi bwaakwa.

³²Buî nî bûtwîte atî bûrîenda gûkara ta mîgongo îngî, ta antû barîa batûûraga nthîgûrû ingî, barîa bathaathagia mîtî na maiga, îndî gûtîkorokarîka ûu.”

³³MWATHANI ariuga atîrî, “Ûntû ngaatûûra mwoyo, ni MWATHANI Mûrungu, ka mbwîre nkaabwatha na inya yaakwa na mbûtûrîkîrie mûthûûro. Rîu mpee mûnene weenu.

³⁴Nkaabûûthûrania mbûrite nthîgûrûûne irîa bûnyaganîtue, na inya yaakwa na mbûtûrîkîrie mûthûûro.

³⁵Nkaabwikîîria rwanda rwa mîgongo îngî mbûgiitîre îgamba ku tûtegeene ûthiû kwa ûthiû.

³⁶Nkaabûgiitîra îgamba o ta ûrîa ndaagiitîîre biûjûjû bieenu rwanda rwa Sinai. Ûu nîu ûûni MWATHANI Mûrungu nkuuga.

³⁷“Nkaabûrîîthia bwega na ntûme bwîîke kîrîkanîro.

³⁸Nkaarita ndemi na eeyia gatîgatîîne keenu. Nkaabarita nthîgûrûûne irîa barî îndî ntîbeetîkîîria gûkinya nthîgûrû ya Israeli. Rîu nîrîo bûkaamenya atî ni nî ni MWATHANI.”

³⁹MWATHANI Mûrungu ariuga buî antû ba Israeli bûkëethîrwa bûtînthikîîra, îteeni o muntû wonthe agatumîkîre mûrungu jwaawe kuuma nandî. Îndî bûtîîkîra riîtwa rîaakwa rîrîtheru mûgiro kaîrî na igongwana birîa bûritagîra mîrungu ya mîng'uanano.

⁴⁰“Nîkwîthîrwa kîrîmeene gîaakwa gîkîtheru, kîrîma gîkîraaja kîa Israeli, antû bonthe ba Israeli bagantumîkagîra ku. Nkaagwîrua nî buî, naabuî bûkaanditîra igongwana, na biewa bieenu birîa biega, birîa bitheri.

⁴¹Nkaabûûthûrania ta kîgongwana gîkweera bûbwega na mbûrite nthîgûrûûne irîa bûnyaganîtue, ngeetîkîîria igongwana birîa bûkaanditîra. Nayo mîgongo îngî îkaamenya ndî ûmûtheru.

⁴²Naabuî bûkaamenya nî ni MWATHANI rîrîa nkaabwikia nthîgûrû ya Israeli îrîa ndeerîîrîte biûjûjû bieenu atî nkabiaa.

⁴³Rîu nîrîo bûkaririkana moothûûku jeenu jonthe na mîîtîre yeenu bûmenye nî bwithûûkîtie. Naabuî bûkaithûûra nîûntû bwa mantû jamathûûku jonthe jarîa bûthithîtie.

⁴⁴Ningî bûkaamenya nî ni MWATHANI rîrîa nkaabûthithîria ûntû nîûntû bwa kûmenyeera gîtîîo kîa riîtwa rîaakwa, îndî ntîbûthithîria ûntû bûu kûringana na mîîtîre yeenu îmîthûûku buî antû ba Israeli. Ûu nîu ûûni MWATHANI Mûrungu nkuuga.”

⁴⁵MWATHANI nî aambarîîrie arambîîra atîrî,

⁴⁶“Mûtaana wa muntû, tega bwa ûmotho, ûrorerie rûteere rûu rwa ûmotho, na ûrorerie mwitû jwa nthîgûrû îrîa îrî bwa ûmotho ûthûûku.

⁴⁷Îîra mwitû jûu jûthikîîre rûteto rwa MWATHANI. MWATHANI Mûrungu arîkwîra atîrî, ngaakania mwanki ndeene yaaku jûîîthie mîtî yonthe, îmîîthî na îmîûmo. Naju mwanki jûu jûtîûmba kworua. Naju jûkaîîthia kuuma bwa ûmotho mwanka bwa ûrîo, antû bonthe baîîthue nîju.

⁴⁸Antû bonthe bakaamenya nî ni MWATHANI njwakanîtie na gûtî we ûkaajworia.”

⁴⁹Rîu ni Ezekieli ndîrauga, “Itû MWATHANI Mûrungu. Antû bariuga nîka mbaragia na njuno.”