Read KIMERU BIBLE PROTESTANT EDITION Ezek 21 Bible Online

Ezek 21 - KIMERU BIBLE PROTESTANT EDITION bible

Ezek 21

¹MWATHANI nî aambarîîrie ni Ezekieli arambîîra atîrî,

²“Mûtaana wa muntû raithîîria Jerusalemu ûbakaanie gwîta gûntû kûrîa barombagîra. Roria mantû jamathûûku jegiî nthîgûrû ya Israeli.

³Îîra nthîgûrû ya Israeli ûûni MWATHANI ndiuga ûjû: Ûûni ndî na ûthû na baabuî. Nkaarita rûchiû mbûûrage bwinthe barîa baagîru, amwe na eeyia.

⁴Nkooraga antû barîa baagîru na eeyia bonthe kuuma bwa ûmotho mwanka bwa ûrîo ngîtumagîra rûchiû rwaakwa.

⁵Nabo antû bonthe bakaamenya atî ûûni MWATHANI nî nkûûrîte rûchiû, na rûtîcokua kîûeene kaîrî.

⁶“Tontû bûû, mûtaana wa muntû, ikaîre, ikaîre na kîrîro gîkînene gîa kûmakania, bagûtegeete.

⁷Nabo bakûûria nîkî ûntû ûgwikaîra, ûbeere ûriikaîra nîûntû bwa nteto irîa ciîjîte. Nacio cieeja, bagaakua nkoro buru, na njara ciaao cionthe ikaaga inya, bathirîrwe nî wîru na batuîke maru ta jarî na rûûjî. Îgiita nî rîîjîte narîo nî rîkinyîte, nîu ûûni MWATHANI Mûrungu nkuuga.”

⁸MWATHANI nî aambarîîrie arambîîra atîrî,

⁹“Mûtaana wa muntû, roria uuge MWATHANI ariuga ûjû: Rûchiû, rûchiû nî rûnoori. Ningî nî rûûgîi mono.

¹⁰Rûnoori nîûntû bwa kûthînja, rûûgîîtue nîkenda rwenia ta rweni. Gûtî kûgwîrua kûrî o kinya bagakaanua kana bagakanûkua antû nî baregeete kwigua.

¹¹Rûchiû ka rûkwangûrwa nîkenda rûtumîrwa, ka rûkûnoorwa na kwangûrwa nîkenda rûnenkanîrwa kîrî mûûragani.

¹²Rîra na wikaîre gwe mûtaana wa muntû nîûntû rûchiû rûrû nî rwa kûthînja antû baakwa. Nî rwa kûthiria atongeeria ba antû bonthe, bo bakooraganîrua amwe na antû baakwa. Igwate rûthea nîûntû nî ûthirîri nî wîrîgîîro.

¹³Ka nkûgeria antû baakwa këethîra batiirira mantû jau jagaakarîka kîrî bo.

¹⁴“Tontû bûû, mûtaana wa muntû roria. Ringa mpîî na ûriingithie rûchiû nthî jaîrî kana jathatû. Rûchiû rûu nî rwa kûûraga barîa bakooragwa. Rûchiû rûkooraga antû babaingî, rûkooraga antû bonthe.

¹⁵Nabo antû bakaathirîrwa nî inya bagiitare. Gankûmakia ntûûra yaao na rûchiû rûkwenia ta rweni na rûrî akuî gûtumîrwa kûûraga.

¹⁶Tema rûteereene rwa ûmotho na bwa ûrîo, gwe rûchiû rûnoori. Tema kunthe kûrîa ûkeerekera.

¹⁷Ûûni MWATHANI ndiuga atîrî, kinya ûûni nkaaringa mpîî, nthirîrwe nî mûthûûro.”

¹⁸MWATHANI nî aambarîîrie kaîrî arambîîra atîrî,

¹⁹“Mûtaana wa muntû tema njîra ijîîrî irîa mûnene wa Babiloni oomba gwîtîîra eetîte ndweene. Njîra iu nî ciîthîrwe ciumîte nthîgûrûûne îmwe. Îîka ibaaû macemanîrioone ja njîra nîkenda bionania njîra irîa ciîtaga ntûûreene.

²⁰Tema njîra ya gwîta ndweene îkinye ntûûreene ya Aamoni ya Raba. Ningî ûteme njîra ingî irîa ikoomba gûkinyia ndwaa ntûûreene îrîa îrikîîtue mono ya nthîgûrû ya Juda tayo Jerusalemu.

²¹Nîkwîthîrwa mûnene wa Babiloni nî arûngami macemanîrio ja njîra iu cio-ijîîrî akîringia amenya nî îrîku agwîta. We ariinainia mîgwî, akîaragia na mîrungu yaawe ya mîng'uanano na agîtegaga îtema rîa nyomoo.

²²Aracinûra kuuma njareene yaawe ya ûrîo mûgwî jwaandîki Jerusalemu. Naju jwoonanagia atî nî auge mbu nîûntû ndwaa îrî akuî na igaarî bia gûkobora nthingo birî akuî na mpingîro. Ningî baake mînaara na beenje mîtaro na boombanie mûthetu.

²³Îndî antû ba Jerusalemu bakaathûgaania nî kûringia kûu nî kwa ûrongo nîûntû nî beekanîrîte irîîkanîro. Îndî ûroria bûu nî bwa kûbaririkania meeyia jaao na kûbamenyithia atî bagatawa.

²⁴“Tontû bûû, ûûni MWATHANI Mûrungu ndiuga ûjû: Tontû nî bûtûmîte meeyia jeenu jaririkanwa, nî joonekeete werûûne. Bûjoonanîtie na mathithio jeenu jonthe, jakoonwa nî antû. Naabuî nî bûtuîri îgamba na bûkaanenkanîrwa kîrî anthû beenu.

²⁵Naagwe gwe mûnene wa Israeli ûtî waagîru, ntukû yaaku ya gûkanûkua rîa mûthia îrî akuî gûkinya.

²⁶Ûûni MWATHANI Mûrungu ndiuga ûjû: riteeni iremba na thirû. Mantû jakagarûka. Kumieeni barîa batî îgweta na bûchambie barîa barî îgweta.

²⁷Îgaanjo! Îgaanjo! Nkaeethia ntûûra îgaanjo. Îndî bûu bûtîkarîka mwanka rîrîa ûrîa nthuurîte wa kûmîkanûkia akeeja. Rîu nîrîo nkaamînenkanîra kîrî we.”

²⁸ “Gwe mûtaana wa muntû roria uuge MWATHANI Mûrungu ariuga ûjû mantû jeegiî Aamoni barîa barumaga Aisraeli: Rûchiû nî rûnoori na rwangûrwa bwega, ka rûkweenia ta rweni.

²⁹Bioneki birîa bwoneri nî bia ûrongo, na jarîa jaringîtue tî ja mma. Buî bûrî babathûûku na bûtîagîrîte. Ntukû yeenu ya îgamba îgûkinya. Ntukû yeenu ya gûkanûkua rîa mûthia îrî akuî.

³⁰“Cokieeni rûchiû kîûeene. Nkaabûgiitîra îgamba bûrî nthîgûrûûne îrîa bwombîîrwe na bûraciarîrwa.

³¹Naani nkabûtûrîkîria mûthûûro, na marûrû jakari ta mwanki. Ningî nkaabûnenkanîra kîrî antû babaaî barîa baijî kwînyangia.

³²Naabuî bûkaa nkû cia gwakîîria mwanki, tharike yeenu îîtîke nthîgûrûûne yeenu. Naabuî bûtîkororiikanwa kaîrî. Ûu nîu ûûni MWATHANI nkuuga.”