Read KIMERU BIBLE PROTESTANT EDITION Ezek 22 Bible Online

Ezek 22 - KIMERU BIBLE PROTESTANT EDITION bible

Ezek 22

¹Ningî MWATHANI nî ambarîîrie ni Ezekieli arambûûria atîrî,

²“Mûtaana wa muntû, nî ûkwenda kûgiitîra îgamba ntûûra îîjî yûûjûri ooragani? Mîîre mantû jarîa jonthe îthithagia jamathûûku.

³Îîra ntûûra atî ûûni MWATHANI Mûrungu ndiuga ûjû: gwe ûrî ntûûra yûûragaga antû baayo na iithûûkîtie na kûthaathayia mîrungu ya mîng'uanano. Îgiita rîaayo nî rîkinyîte.

⁴Nî ûthûûkîtie nîûntû bwa kûûragana na gûciîkîra mûgiro na mîrungu ya mîng'uanano îrîa ûthithîtie. Tontû bûû, nî ûreetete ntukû yaaku ya gûkanûkua akuî. Gwe nî nkweethetie ta gîntû gîa kûmeneerua nî mîgongo na gîa gûcikûûrwa nî nthîgûrû cionthe.

⁵Barîa barî akuî na barîa barî kûraaja nîka bagûgûcikûûra, gwe ntûûra îthûûkîtie îgweta rîaayo na ndemi.

⁶“Atongeeria ba Israeli bonthe nî beetîkîtie inya yaao na bakamîtumîra kûûragana.

⁷ Ndeene ya ntûûra aciari batîîkagîîrwa, na ageni bakaraga bagîtuunyagwa into biaao. Ntigwa na aana barîa batî na aciari bathithagîrua mantû jamathûûku.

⁸ Bûmenagîîria into biaakwa bibitheru na bûgeekîra sabatû ciaakwa mûgiro.

⁹Antû bamwe barîa barî ndeene yaaku baaragia ûrongo nîkenda booragithia bangî. Antû bangî bakarîa igongwana birîa biritîri mîrungu ya mîng'uanano, na bangî bakathithia mantû ja ûmaramari.

¹⁰ Antû bamwe baagagîra beethe nthoni bakathengeera eekûrû ba beethe na bangî bakathengeera aka barî na mweri kwa inya.

¹¹Bamwe bathithagia ûmaramari na aka ba atûûri baao, na bangî bakamaramara na aka ba aana baao, na bangî aarî ba ng'ina.

¹² Antû bamwe bajûkagia nkuukumo nîkenda booragana. Bangî bakarîyia Aisraeli bangî mpongeeri ya mbeecha irîa babakoobithîtie, nîkenda baitongia. Antû nî boorîrîîtue nî ni. Ûu nîu ûûni MWATHANI Mûrungu nkuuga.

¹³“Nkaabakanûkia nîûntû bwa ûtuunyani na ûûragani bwaao.

¹⁴Nî bûkwona ta bûkoomîîria kana bwîthîrwa bûrî na kainya gatigeere ndaabûkanûkia? Ûûni MWATHANI nî ni nkuuga ûu na nî ni nkaathithia mantû jau.

¹⁵Nkaabûnyagania kîrî mîgongo na kîrî nthîgûrû ingî mbûthirie ûthûûku bweenu.

¹⁶Bûgaatûma riîtwa rîaakwa rîthûûke kîrî mîgongo îngî, naabuî bûkaamenya ni nî ni MWATHANI.”

¹⁷MWATHANI nî aambarîîrie arambîîra atîrî,

¹⁸“Mûtaana wa muntû, antû ba Israeli batî na gîtûmi kîrî ni kaîrî. Bakari ta matigi jatî na gîtûmi ja fetha, kana ja îturutia kana ja chuuma îrîa îthithagia mîkebe kana chuuma ciongwa kana chuuma îrîa ithithagia mbûrûbûrû. Matigi jau jaatigaraga rîrîa chuuma yakerûrwa na îrîa njega yaaritwa.

¹⁹Tontû bûû, ûûni MWATHANI Mûrungu ndiuga ûjû: Tontû bwinthe nî bweete îthaga rîtî na gîtûmi, atîrî, nkaabûûthûrania kûu ntûûreene ya Jerusalemu.

²⁰O ta ûrîa antû boothûranagia fetha, na îturutia, na chuuma, na chuuma îrîa îthithagia mbûrûbûrû, na îthithagia mîkebe bakabiîkîra mwankiine, na bakaugîîra mwanki nîkenda îkerûka, nîo u naani nkaabûûthûrania na mûthûûro. Nkaabwîkîra riiko na marûrû jaakwa mbûkerûre.

²¹Nkabûûthûrania mbuugîîre na marûrû mbwîîthie na mûthûûro jwaakwa, mbûkerûre buru.

²²O ta ûrîa fetha îkerûragwa na mwanki, nîo u nkaabûkerûra bûrî Jerusalemu nîkenda bûmenya atî ni MWATHANI nî ni mbwîtûûrîrîtie mûthûûro jwaakwa.”

²³MWATHANI nî aambarîîrie arambîîra atîrî,

²⁴“Mûtaana wa muntû arîria Aisraeli ûbeere nthîgûrû yaao îtîthereetue na tontû bûu nkaamîkanûkia na mûthûûro.

²⁵Atongeeria baao bakari ta ngatûnyi îgûtambuura nyamû irîa ciûragîte. Booragaga antû na bakabaiyîra into biaao bia goro. Tontû bûû, bagatiga aka babaingî barî ntigwa.

²⁶ Athînjîri-Mûrungu baayo baunaga Waatho bwaakwa na gwîkîra birîa bitheri mûgiro. Batîonanagia mwanya jwa into birîa biathûri na birîa bitîathûri. Ningî nî baatigîre kûritana mwanya jwa into bibitheru na birîa bitî bibitheru. Nî baregeete gûtîîa sabatû ciaakwa. Tontû bûû, nî batûmîte nkameneerua Israeli yonthe.

²⁷Atongeeria baayo bakari ta mbîrwa igûtambûra nyamû îrîa ciûragîte. Booraganaga nîkenda batuunyana into biaitha na baitongia na njîra ya waayia.

²⁸Nabio iroria biaayo bithikaga meeyia jau jatîkoneke, ta ûrîa muntû atheeraga rûthingo îra. Biaîîragia antû atî nî bikwona bioneki na bikaroria ûroria bwa ûrongo bikiugaga ûroria bwaao nî bwa kuuma kîrî MWATHANI Mûrungu, o rîrîa ni MWATHANI gûtî u mbûgîîte.

²⁹Antû ba nthîgûrû ya Israeli nîka bagûtuunya antû into biaao na njîra ya waayia. Ningî bakainyîîria nkîa na barîa barî na ûbatu. Ningî nî batuunyîte antû ageni barîa batwîre nthîgûrûûne yaao nîûntû batî na wa kûbateteera.

³⁰“Ndîracwaa gatîgatîîne kaao muntû wa gwaka rûthingo, muntû wa kûrûngama kûrîa rûthingo rûkobokangi akaria nthîgûrû, nîkenda ntîkaabathirie ndîramwaga.

³¹Tontû bûû, nkaabatûrîkîria mûthûûro jwaakwa. Nkaabathiria na marûrû jaakwa jarîa jakari ta mwanki. Nkaabarîyia mantû jarîa bathithîtie. Ûu nîu ûûni MWATHANI Mûrungu nkuuga.”