Read KIMERU BIBLE PROTESTANT EDITION Ezek 23 Bible Online

Ezek 23 - KIMERU BIBLE PROTESTANT EDITION bible

Ezek 23

¹MWATHANI nî aambarîîrie arambîîra ni Ezekieli atîrî,

²“Mûtaana wa muntû, nî kwaarî na aarî baîrî ba ng'ina ûmwe.

³Nabo nî baaringîre ûmaraaya nthîgûrûûne ya Misri. Baaringîre ûmaraaya kuuma barî babeethî, mwanka nyoonto ciaao iragwa.

⁴Mwarî ûrîa mûkûrû eetagwa Ohola, na mwarî wa ng'ina ageetwa Oholiba. Naani nî ndaabagûrîre baraa baakwa. Nabo nî baanciarîre aana. Mariîtwa jau ja aarî bau jarî gîtûmi. Ohola nî ntûûra ya Samaria na Oholiba nî ntûûra ya Jerusalemu.

⁵Kinya këethîra Ohola no aarî waakwa, nî eetîre na mbere kûringa ûmaraya na anyaanya baawe tabo Asîria.

⁶Anyanya bau baarî asikarî beekagîra nguû cia rangi ya mûkû, na atongeeria, na antû babeethî babathongi bonthe, na antû ba gwîtithia mbarathi.

⁷Ohola nî aaringîre ûmaraya na antû bonthe barîa beega buru ba Asîria. Nî aaciîkîîre mûgiro na kûthaathayia mîrungu yaao yonthe ya mîng'uanano.

⁸Atatiganîre na ûmaraya bwaawe bûrîa aathithagia kuuma rîrîa aarî Misri. Kuuma arî ûmwîthî arûme baatwîre kûmûthengeera. Nabo baamûtheengagîîra o rîrîa bareenda.

⁹Tontû bûû, ndîramûnenkanîra kîrî anyaanya baawe ba Asîria barîa eendeete mono.

¹⁰Nabo baramûrita nguû aratigwa kîthûnû. Barataa aana baawe, baracoka baramûûraga na rûchiû. Nabo aka nî baaragia ciaawe kunthe boona ûrîa aagiitîîrwe îgamba.

¹¹“Mwarî wa ng'ina Oholiba nî oonere mantû jau, îndî areeta na mbere kûthûûka nkûrûki. Nî aaere mûmaraya ûmûnene nkûrûki ya mwarî wa ng'ina Ohola.

¹²Oholiba nî aamaramarîre na atongeeria ba Sîria, amwe na atongeeria ba njûûrî cia Sîria na asikarî ba ndwaa, na barîa beetithagia mbarathi na kinya nthaka inthongi cionthe.

¹³Naani ndîroona atî kinya we nî aarî mûmaramari. Bo-baîrî baarî na mîîtîre o îmwe.

¹⁴Îndî Oholiba nî eetîre mbere nkûrûki na ûmaraya bwaawe. Nî eendere arûme barîa baarî mbicheene intuune cia Ababiloni, irîa ciaarî nthingoone.

¹⁵Antû bau beekîrîte iremba bibiraaja na mîcibi tuuna twaao, bonthe baakari ta atongeeria ba njûûrî. Nabo boonekaga ta Ababiloni barîa nthîgûrû yaao yaarî Babiloni.

¹⁶Aboona nî aabairîragîîria mono mwanka agatûmana kîrî bo Babiloni.

¹⁷Nabo Ababiloni bareeta kîrî we baramama nawe. Baramûthengeera mono, baramwîkîra mûgiro mwanka arambîrîria kûbamena.

¹⁸Rîrîa aacionanîrie werûûne atî nî mûmaraya, nîrîo ndaamûmenere o ta ûrîa ndaamenere mwarî wa ng'ina.

¹⁹Îndî amwe na bûu arongeera ûmaramari bwaawe, akîthithagia ûmaraya o ta ûrîa aathithagia arî ûmwîthî kûu Misri.

²⁰Nawe eendere anyaanya baawe barîa baarî na ûrûme rûng'ana ta rwa ntigiri, na baikongaga rûûjî rwa ûrûme rûng'ana ta rwa mbarathi.

²¹Tontû bûû, nî weendere ûmaramari mono wîthîîne bwaaku rîrîa waarî Misri na baragûcûnca kîbara na kûgwatagwata nyoonto ciaaku mwanka îragwa.”

²²MWATHANI Mûrungu arîkwîra ûjû gwe Oholiba, “Anyaanya baaku barîa waamenere nkaabagarûra bakwithûkîre kuuma nteere cionthe.

²³Nabo barîa bagaakwithûkîra nî Ababiloni, na Akalidea bonthe; antû ba kuuma Pekodi, na Shoa, na Koa, na Asîria bonthe, antû babaanake babathongi, na athani, na atongeeria ba njûûrî bonthe, na barîa beetithagia mbarathi, na asikarî.

²⁴Nabo bagaakwithûkîra kuuma bwa ûrîo barî na ngaarî cia ndwaa, na ngaarî cia gûkamata mîrigo; na njûûrî inene ya asikarî. Nabo bagaakwithûkîra kuuma nteere cionthe baciigîrîte na rong'o na nkobia cia chuuma. Naani ngaakûnenkanîra kîrî bo nabo bagûtuîre îgamba na Waatho bwaao.

²⁵Tontû bwa mûthûûro jwaakwa, ngaakûnenkanîra kîrî bo bagûkanûkie bathûûri. Bagaakûgiita nyiûrû na matû na boorage bangî barîa bagatigara. Batae aarî na nthaka beete nabo, na baîîthie antû beenu barîa bakeethîrwa batigeere.

²⁶Njûûrî iu igaakûrita nguû na igûtuunye into biaaku bia goro birîa wigemagia nabio.

²⁷Naani nkaathiria ûmaramari bwaaku na ûmaraya bwaaku bûrîa waaumîre nabu Misri. Naagwe ûtiirîrîîria mîrungu ya mîng'uanano ya Misri kaîrî kana ûmîthûgaanîria.”

²⁸MWATHANI Mûrungu ariuga atîrî, “Ngaakûnenkanîra njareene cia barîa bakûthwîre, barîa wamenere.

²⁹Nabo bakaajûkia bionthe birîa ûthithinîrîte nîûntû nî bakûthwîre. Bagaakûrita nguû, ûtigwe ûrî kîthûnû, ûthaamwe nîûntû bwa ûmaraya bwaaku. Nî wirîrîîria na ûmaraya bwaaku,

³⁰bûtûmîte wîjîîrwa nî mantû jau. Nîkwîthîrwa wendere antû ba mîgongo îngî na ûraringa ûmaraya nabo na waciîkîra mûgiro rîrîa waathaathaîrie mîrungu yaao ya mîng'uanano.

³¹Ûthingatîte mîîtîre ya mwarî wa nyakwe. Tontû bûû, ûkaanyuîra gîkombeene o kîrîa aanyuîrîîre rîrîa ndaamûkanûkîrie.”

³²Ningî MWATHANI Mûrungu ariuga atîrî, “Ûkaanyuîra gîkombeene kîa mwarî wa nyakwe nakîo nî gîkombe kîa îkanûkia, gîkombe gîkînene na gîkîorokeru. Ûkaathekerwa na ûmeneerue nîûntû kîrî na mantû jamaingî mono.

³³Ûkoojûrwa nî mbogita na kîrîro. Kîu nî gîkombe kîa ûguaa na kûthirua gîkombe kîa mwarî wa nyakwe Samaria.

³⁴Ûgaakînyua ûkîthirie buru. Ûgaakûûra nchiûri ciaaku na ûtambûrange nyoonto ciaaku.”

³⁵Ningî MWATHANI Mûrungu ariuga atîrî, “Nîkwîthîrwa nî ûûrîrîtue nî ni, wantiganîria rî, ûgaakanûkua nîûntû bwa ûmaramari bwaaku na ûmaraya bwaaku.”

³⁶MWATHANI arambûûria atîrî, “Mûtaana wa muntû, ûkaagiitîra Ohola na Oholiba îgamba? Nandî beere moothûûku jarîa bathithagia.

³⁷Nîkwîthîrwa nî bathithîtie ûthûngîîri na booragana. Bathithîtie ûthûngîîri na mîrungu yaao ya mîng'uanano. Nî baritîte kinya barîa baanciarîîre barî kîgongwana.

³⁸Ningî kinya amwe na bûu, nî beekîrîte kîûrû gîaakwa mûgiro na beekîra kinya sabatû ciaakwa mûgiro.

³⁹Nîkwîthîrwa rîrîa baaritîre aana baao barî kîgongwana kîrî mîrungu ya mîng'uanano, o ntukû îîu nî beejîre kîûrûûne gîaakwa gûgîîkîra mûgiro. Atîrî, bûu nîbu baathithîrie kîûrûûne gîaakwa.

⁴⁰Ningî nî baatûmanîîre arûme kuuma kûraaja nabo bareeja. Naabuî Ohola na Oholiba nî bweetîre bûreeria bûraciaka meetho rangi na bûreekîra into bia kwigemia.

⁴¹Naabuî bwaakaragîra itî bibithongi na mbere yeenu bûrî na meetha yûûjûri into bibiega o amwe na ubaani na maguta ja nzeituni jarîa ndaabanenkerete.

⁴²Nakîo gîtuma nî kîaigiigagua gîa kîrîndî gîtaakîraga noo mbi na gîkundi kîa antû boogiti kuuma rwanda. Nabo bareekîra aka bau bangiri njareene ciaao na thirû inthongi mîtwe.

⁴³Naani ndîrooria anga arûme bau tî athûngîîri barîa baringaga na aka bau ûmaraya?

⁴⁴Nîkwîthîrwa bo beetaga kîrî amaraya bau magiita jonthe. Baamaramaraga na Ohola na Oholiba aka bau amaraya.

⁴⁵Antû babaagîru bakaagiitîra aka bau îgamba atî nî maraya na ooragani nîûntû nî athûngîîri na ooragani.”

⁴⁶MWATHANI Mûrungu ariuga ûjû, “Reeteeni njûûrî înene îîje îbamakie na îbatae.

⁴⁷Nayo njûûrî îîu îboorage na maiga na nchiû. Yûûrage aana baao na îîthie nyomba ciaao.

⁴⁸Ûu nîu nkaathiria ûmaramari nthîgûrûûne, nîkenda aka bonthe batîkaathithie ûmaramari ta bûrîa bathithîtie.

⁴⁹Naabuî Ohola na Oholiba nkaabûkanûkia nîûntû bwa ûmaramari bweenu na kûthaathayia mîrungu ya mîng'uanano. Rîu nîrîo bûkaamenya ni nî ni MWATHANI Mûrungu.”