Read KIMERU BIBLE PROTESTANT EDITION Ezek 24 Bible Online

Ezek 24 - KIMERU BIBLE PROTESTANT EDITION bible

Ezek 24

¹Kûrî ntukû ya îkûmi ya mweri jwa îkûmi mwakeene jwa kenda tûrî kîthamîrioone, MWATHANI nî aambarîîrie ni Ezekieli arambîîra atîrî,

² “Mûtaana wa muntû, aandîka tarîki cia ntukû îîjî. Nîkwîthîrwa ntukû îîjî yongwa nîyo mûnene wa Babiloni agûcîgîîria ntûûra ya Jerusalemu.

³Îîra antû baakwa barîa ndemi ngerekano îîjî ûûni MWATHANI nkûbeera: Îkîra nyongû riiko na ûmîûjûrie rûûjî.

⁴Îkîra nyama irîa njega buru ku nyama ya îturo na kûgûrû ûmîûjûrie mîîndîîndî îmîega buru.

⁵Jûkia nyama cia ng'ondu irîa nthongi wîkîre nkû riiko ûtherûkie nyama iu, ûtherûkanîrie nyama na maîndîîndî.”

⁶MWATHANI Mûrungu ariuga atîrî, “Wûi kîrî ntûûra ya ooragani! Wûi kîrî nyongû îrîa îrootete, na îtîthambîîtue. Rita o kînuku o kînuku kîa nyama ku, ûtîgûtaara.

⁷Ntûûra îîu nî yûûraganîte, yeetûûra tharike maigeene, na îtaamîtûûra nthî mûthetu jûmîkunîka.

⁸Tharike îria ntûmîte îtigwa maigeene îtîthiki, îgookaûkia mûthûûro jwaakwa mpeende kûmîrîîria.”

⁹MWATHANI Mûrungu ariuga atîrî, “Wûi kîrî ntûûra îîjî mbûragani! Nî ni ningwa nkaamiunîra nkû, nthûmbe kîthûmba.

¹⁰Ongeereni nkû riiko, bwakanie mwanki, bûruge nyama na mûthûri, nayo mîîndîîndî bûmîîthie.

¹¹Rîu îkîra nyongû îîu ya îturutia riiko îrî întheri îye mwanka îtunîe, nîkenda rûko rwaayo na kutu bithira biaîthua nî mwanki.

¹²Kûthithia ûu nî ûmwe na kwinogia ûtheri nîkwîthîrwa kutu yaayo nî înyiingî ûntû îtîthirua nî mwanki.

¹³Kutu îîu nî ûmaramari bwaaku gwe Jerusalemu. Tontû ni ngeretie gûkûtheria naagwe ûkarema kûthira rûko, ûtîtherua kaîrî mwanka rîrîa nkathûûrûka.

¹⁴Ûûni MWATHANI nkoojûria mantû jau mbugîîte. Ntîtiga kûthithia ûu mbugîîte kana nkwigîîrua kîaao. Ngaakûgiitîra îgamba kûringana na mathithio jaaku. Ûu nîu ni MWATHANI Mûrungu nkuuga.”

¹⁵Ningî MWATHANI nî aambarîîrie kaîrî arambîîra atîrî,

¹⁶“Mûtaana wa muntû, ndî akuî kûûraga muntû ûrîa wendeete mono. Naagwe ûkámûrîrîra, kana withikîîra nîûntû bwaawe.

¹⁷Ûkárîra na inya wîja kwigîîgua. Îkîra kîreemba na wîkîre iraatû na ûgaakunîka kanyua kana ûrîa biakûrîa birîa birîîjagwa nî barîa baithikîîrîte.”

¹⁸Ntukû îîu rûkîîrî nî ndaaragîria antû. Ûgoroone bwaayo mwekûrû waakwa arakua. Rûûneene ndîrathithia o ûrîa ndeeri nthithie.

¹⁹Antû nî baambûûragia ûjû, “Twîre gîtûmi kîa mantû jaja. Nîatîa ûû ûkûthithia?”

²⁰Tontû bûû, ndîrabacokeria atî MWATHANI nî arambarîîrîtie ambîîra atîrî,

²¹“Îîra antû ba Israeli atî MWATHANI Mûrungu ariuga ûjû: Atîrî ngeekîrithia kîûrû kîrîa bwikumagîria mûgiro, kîûrû kîu bwoonaga bûkagwîrua na bûkang'anîrwa. Ningî antû beenu babeethî barîa bakeethîrwa batigeere Jerusalemu bakooragîrwa ndweene.

²²Rîu bûthithie o ûrîa ûûni nthithîtie. Bûgáikunika moothiû bûkiithikîîra, kana bûrîa biakûrîa birîa birîîjagwa nî barîa baithîkîîrîte.

²³Bwoge iremba mîtwe yeenu, na bwîkîre iraatû, na bûkáithikîîra kana bûrîra. Îndî buî bûkarîra nîûntû bwa meeyia jeenu na bwirîragîre bwingwa.

²⁴Rîu ûûni kwaa rwano kîrî buî. Naabuî bûkaathithia o ûrîa nthithîtie. Ûntû bûu bwaakarîka, rîu bûkaamenya atî Mûrungu Mweneinya nîwe MWATHANI.”

²⁵MWATHANI arambîîra atîrî, “Mûtaana wa muntû, nkaamomoraga kîûrû kîrîa baikumagîria, kîrîa boonaga bakagwîrua na bakang'anîrwa, na nthirie aana baao.

²⁶Ntukû îîu yakinya ûmwe wa barîa bakeethîrwa batorokeete akeeja gûkûmenyithia ûrîa mantû jakari.

²⁷Ntukû îîu ûkoomba kwaria kaîrî na ûkomba kwaria nawe. Ûu nîu ûkaa rwano kîrî antû. Nabo bakaamenya ni nî ni MWATHANI.”