Read KIMERU BIBLE PROTESTANT EDITION Ezek 25 Bible Online

Ezek 25 - KIMERU BIBLE PROTESTANT EDITION bible

Ezek 25

¹ MWATHANI nî aambarîîrie arambîîra atîrî,

²“Mûtaana wa muntû roreria antû ba Amoni ûbeere ûrîa bagaakanûkua.

³Beere ûûni MWATHANI Mûrungu ndiuga ûjû: Atîrî, nî bwagwîrîrue mono rîrîa bwoonere kîûrû gîaakwa gîekîrwa mûgiro na rîrîa nthîgûrû ya Israeli yeenyangîrue buru na antû ba Juda baraikua kîthamîrioone.

⁴“Tontû bûû, nkaabûnenkanîra kîrî antû ba rwanda rwa gaiti babwithûkîre na babûtae. Nabo bakaamba maema jaao gatîgatîîne keenu. Bakaanyunyaga îria na barîîjage matuunda jarîa babuîri nî kûrîa.

⁵Nkaagarûra ntûûra ya Raba yee gûntû kwa kûrîîthia nkamîîra na ntûûra cia Aamoni ciee nkanata cia ndîîthia. Rîu nîrîo bûkaamenya ni nî ni MWATHANI.”

⁶MWATHANI Mûrungu ariuga ûjû, “Buî nî bwaringîre mpîî nî kûgwîrua na bûrameneeria îgûrû rîa nthîgûrû ya Israeli.

⁷Tontû bûû, nkaabûnenkanîra njareene cia mîgongo îrîa îkabwithûkîra na îbûtae. Ningî nkaabûthiria buru bûtige kwaa mûgongo. Rîu nîrîo bûkaamenya ni nî ni MWATHANI.”

⁸ MWATHANI Mûrungu ariuga ûjû, “Moabu nî yuugîîte atî Juda îkari o ta nthîgûrû ingî cionthe.

⁹Tontû bûû, nkaarekeeria ntûûra irîa ikaraga mîankeene ya Moabu ciithûkîrwe; kuuma ntûûra irîa irî ûkumio mono tacio: Bethijeshimothi, na Baali-meoni, na Kiriathaimu.

¹⁰Nkaanenkanîra Moabu na Amoni itawe nî antû ba rwanda rwa gaiti. Nayo Moabu îtîkorwethîrwa îrî nthîgûrû na bwaayo kaîrî.

¹¹Rîrîa ngaakanûkia Moabu nîrîo îkaamenya atî ni nî ni MWATHANI.”

¹² MWATHANI Mûrungu ariuga ûjû, “Edomu nî yairîîrie na ûthûûku kîrî Juda, na ûntû nî bwaarî bûbûthûûku.

¹³Tontû bûû, ûûni MWATHANI Mûrungu ndiuga ûjû, ngaakanûkia Edomu na nthirie antû na nthirie nyomoo buru. Nayo nkaamîethia îgaanjo. Antû bakooragîrwa ndweene kuuma ntûûra ya Temani mwanka ntûûra ya Dedani.

¹⁴Ngaatumîra antû baakwa ba Israeli gûkanûkia Edomu. Edomu îkaamenya ûrîa mûthûûro jwaakwa na marûrû jaakwa jang'ana. Ûu nîu MWATHANI Mûrungu akuuga.”

¹⁵ MWATHANI Mûrungu ariuga ûjû, “Afilisti nî bairîîrie na ûthûûku kîrî anthû baao ba kaumo barabathiria buru.

¹⁶Tontû bûû, ûûni MWATHANI Mûrungu ndiuga ûjû: ngaatambûrûkia njara mbithûkîre Afilisti mbathirie buru. Nkaathiria Akerethi na antû bangî barîa batûûraga mpwîroone cia îria.

¹⁷Nkaabakanûkia bûbûthûûku mono, ndiirîîrie. Ndaabakanûkia na mûthûûro nîrîo bakaamenya atî ni nî ni MWATHANI.”