Read KIMERU BIBLE PROTESTANT EDITION Ezek 26 Bible Online

Ezek 26 - KIMERU BIBLE PROTESTANT EDITION bible

Ezek 26

¹ Kûrî ntukû ya mbere ya mweri jwa mbere mwakeene jwa îkûmi na jûmwe nyuma ya gwikua kîthamîrioone, MWATHANI nî aambarîîrie ni Ezekieli arambîîra atîrî,

²“Mûtaana wa muntû, antû ba ntûûra ya Tiro nî bagûcikûûra Jerusalemu bakiugaga atî nî îthirîtue, na mpingîro ciaayo nî ithûûkangîtue na biashara yaayo nî îthûûkangîte. Bariuga antû ba Jerusalemu batîboomba kîbiashara kaîrî!”

³Tontû bûû, MWATHANI Mûrungu ariuga ûjû, “Ûûni ndî mûnthû waaku gwe Tiro! Ningî ngatûma mîgongo îmiingî îkwithûkîre îthingateene o ta ûrîa mîgombe ya îria îthithagia.

⁴Nabo bakamomoranga nthingo ciaaku na bathetherange mînaara yaaku. Ningî ngatûma mûthetu jwaaku jwîta, gûtigwe kûrî maiga matheri.

⁵Agwatia makûyû bakaanîkaga ngara ciaao maigeene jau. Ûu nîu ûûni MWATHANI Mûrungu nkuuga. Ningî nthîgûrû îîu îgaatunywa into biaayo nî mîgongo.

⁶Natu tûtûûra tûrîa tûthiûrûkîrîte nthîgûrûûne îîu înjûmo tûkaithûkîrwa na antû baatu booragwe. Rîu bakaamenya ni nî ni MWATHANI.”

⁷MWATHANI Mûrungu ariuga ûjû, “Nkaareeta mûnene ûrîa mûnene kîrî bangî; tawe Nebukadineza wa Babiloni aithûkîre Tiro. We akauma bwa ûrîo arî na njûûrî înene mono, na eetithia ba mbarathi, na ngaarî cia ndwaa.

⁸Akooraga barîa batwîre tûtûûreene tûrîa tûmîthiûrûkîrîte naarîa nthîgûrû înjûmo, na acîgîîrie ntûûra ya Tiro, oombe mîtaro, na aake rûthingo rwa kwiigîra naru.

⁹Nabo bagaakobora nthingo cieenu bagîtumagîra igaarî na bakobore mînaara yeenu bagîtumagîra ntûûru.

¹⁰Mbarathi cia Nebukadineza ikeethîrwa irî inyiingî mono, nayo tîîri îrîa igookia îkaabûkunîka. Nthingo cieenu ikainainua nî mûruumo jwa eetithia mbarathi, na jwa ngaarî cia ndwaa, na jwa ngaarî cia gûkamata mîrigo igîtonya mpingîroone cia ntûûra.

¹¹Mbarathi ciaawe igakinyanga njîra cieenu na oorage antû na nchiû. Ningî akagitanga itugî birîa bwaakîte biaarika.

¹²Bagaataa ûtonga bweenu na into bingî bieenu na bakoborange nthingo, na nyomba cieenu irîa nthongi. Najo maiga na mbaaû na mûthetu birîa bwakîte nabio bageere îrieene.

¹³ Ngaatûma bûtige gûkûngûagîra bûkîringaga inanda bia ndigi inyiingî.

¹⁴Naani ngatûma nthîgûrû yeenu îtigwe îrî întheri ya kwanîkagwa ngara nî agwatia makûyû. Nayo ntûûra îtîkoroakwa kaîrî. Ûu nîu ûûni MWATHANI Mûrungu nkuuga.”

¹⁵MWATHANI Mûrungu arîîra ntûûra ya Tiro ûjû, “Rîrîa bûkaathirua, antû barîa batwîre nteere cia îria bakaamaka mono baigua ûrîa barîa bakûûragwa bagwikaîra.

¹⁶Rîu anene bonthe ba nthîgûrû irîa irî nteere cia îria bakauma ndûrigeene ciaao cia ûnene, barite ndwambambio ciaao na nguû irîa itumi bwega. Nabo bagaakara nthî bakiinainaga. Bakeethîrwa bamakîîtue nî mantû jarîa jakeethîrwa jakarîkîte kîrî gwe na batîûmba gûtiga gûteetema.

¹⁷Nabo bakaarîra kîrîro gîkînene nîûntû bweenu bakiugaga: “Ntûûra îrîa îrî îgweta îkûthirua! Itarû biaayo biathûûkangîrua îrieene, kinya këethîra antû ba ntûûra îîjî nîbo nchamba îrieene. Ningî yo nî yeekagîra barîa batûûraga nteere cia îria ûguaa mono.

¹⁸ Nandî ntukû îrîa ntûûra yaathirua antû barîa batwîre nteere cia îria nîka bagûteetema nî ûguaa nîûntû bwa ûrîa bûthirîtue.”

¹⁹MWATHANI Mûrungu ariuga ûjû, “Ngaatûma ûthirue, wee ta ûrîa ntûûra ithiragua ikaa maganjo jatîtûûri nî antû. Ningî ngatûma ûkunîkwe nî rûûjî rwa îria.

²⁰Naani nkaabûgera gwa akuû bûkarage ku na antû barîa baatûraga karaaja. Nkaabwîka kûu gwa akuû bûtûûranagîrie na barîa baatûûraga tene; bûkaranagie na akuû. Tontû bûû, gwe ntûûra ûtîkorotûûrwa kaîrî kana wîthîrwa ûrî nthîgûrû ya barîa barî mwoyo.

²¹ Mûthia jwaaku jûkeethîrwa jûrî jûmûthûûku. Antû bagaagûcwaga îndî batîkwona kaîrî.” Ûu nîu ûûni MWATHANI Mûrungu nkuuga.