Read KIMERU BIBLE PROTESTANT EDITION Ezek 27 Bible Online

Ezek 27 - KIMERU BIBLE PROTESTANT EDITION bible

Ezek 27

¹MWATHANI nî aambarîîrie arambîîra atîrî,

²“Mûtaana wa muntû, inîra ntûûra ya Tiro rwîmbo rwa kîrîro.

³Ntûûra îrîa îrî rûteere rwa îria na îringaga biashara na antû barîa batûûraga mpwîroone cia îria. Mîîre ûûni MWATHANI Mûrungu ndîmîîra ûjû: Gwe Tiro nî wikumagia ûgaciona ûrî ûmûthongi.

⁴Mîanka yaaku îkinyîte îrieene gatîgatî. Barîa baagwakîre baragwaaka ûrî ûmûthongi buru.

⁵Baragwaka na mîtî ya mîthithinda kuuma kîrîmeene kîa Hamoni na mbaaû cia mîtarakwa kuuma Seniri, na cia kuuma kîrîmeene kîa Lebanoni.

⁶Ningî barathithia mîîko bagîtûmagîra miuuru ya Bashani, na barathithia gîtarû na mîthithinda ya kuuma Saiprasi, barakîgemia na mîgwongo bwa ndeene.

⁷Nanga ya gîtarû yaarî ya gatani, nguû ya gatani yaathithîtue bwega kuuma Misri, nayo nîyo yaarî bendera yeenu. Nanga îrîa ya kûrigîîria ngai yaathithîtue na nguû îrîa njega buru ya rangi ya wiirû bwa îgûrû na rangi ya mûkû kuuma Saiprasi.

⁸Eetithia beenu ba itarû baarî ba kuuma ntûûra ya Sidoni na ya Arivadi. Antû beenu barîa baarî ûtea bûbûnene nîbo beetithagia itarû biu.

⁹Abundi ba kuuma Gebali nî beethagîrwa barî meriine nîkenda bacithithagia ciatûrîka. Meri cionthe na barîa beetaga nacio nî beejaga kîrî gwe Tiro kûringa biashara.

¹⁰Antû ba Parasia, na ba Ludi, na ba Lîbia nî beethagîrwa barî amwe na njûûrî yeenu ndweene. Nî baacuuragia rong'o ciaao na nkobia ciaao cia chuuma kambîîne cia njûûrî yeenu. Nî baatûmîre bûroona ûkumio.

¹¹Nthingo cia ntûûra ya Tiro ikaragua nteere cionthe nî antû ba kuuma Arivadi na Heleki. Nayo mînaara îgakarua nî antû ba Gamadi. Nabo baacuuragia rong'o ciaao nthingoone cieenu kûthiûrûkîra. Nîbo baatûmaga bwonekana bûrî babathongi.

¹²“Bwaaringaga biashara na antû ba Tarishishi. Bwabanenkagîra ûtonga bweenu bwa mîthemba îmingî, nabo bakabûnenkera fetha, na chuuma, na îthaga rîrîa rîthithagia mîkebe na îthaga rîrîa rîthithagia mbûrûbûrû.

¹³Ningî kinya Griiki, na Tubali, na Mesheki nî waaringaga biashara nabo. Waabeendagîria into biaaku nabo bagakûnenkera nkombo na into birîa biaathithîtue na îturutia.

¹⁴Bûracoka bûreendia into bieenu kîrî antû ba Bethitogarima. Nabo barabûkûranîria bio na mbarathi, na nyûmbû.

¹⁵Antû ba Rodesi nabo nî baaringîre biashara naabuî. Nthîgûrû inyiingî cia nteere ya îria ciaabûkûranagîria into bieenu na mîgwongo na mîtî îkari ta mîthaitî.

¹⁶Antû ba Sîria nî baaringaga biashara naabuî. Nabo bakaabûkûranîria into bieenu bibingî na maiga ja goro jakûmentamenta, na nguû cia gûtuma na mîtumi, na nguû cia gatani, na maiga jaumaga îrieene jaumanagia na tûkonyo twa îria twakua.

¹⁷Antû ba Juda na ba Israeli nî baaringaga biashara naabuî. Baabûkûranagîria into bieenu na nkano, na maguta ja nzeituni, na nainchû, na into birîa biîkagîra irîo yeera.

¹⁸Antû ba ntûûra ya Damaski baaringaga biashara naabuî, bakabûkûûranîria into bieenu bibingî na ûtonga bwa mîthemba yonthe na ndibei ya Heliboni, na guee kuuma Sahari,

¹⁹na ndibei kuuma Uzali. Ningî bakabûkûranîria into bingî na îkama rîa chuuma, na maguta jarîa jaeeraga bwega jeetagwa kasia na kalamusi.

²⁰Antû ba ntûûra ya Dedani nî baaringaga biashara naabuî bakabwenderia matandîko ja mbarathi.

²¹Antû ba Arabia na atongeeria bonthe ba Kedari beendaga mono kûringa biashara naabuî bakabûkûranîria into bieenu na tûtûrûme, na ntûrûme, na mbûri.

²²Aringi biashara ba Sheba na ba Raama baringaga biashara naabuî bakabûkûranîria into bieenu na maiga ja goro, na thaabu, na into bia gwîkîra biakûrîa yeera rîrîega mono.

²³Antû ba ntûûra cia Harani, na Kane, na Edeni, na Sheba, na Asîria, na Kilimadi nî baaringîre biashara naabuî.

²⁴Nabo baabûkûranîria into bieenu na nguû cia rangi ya wiirû bwa îgûrû, na cia gûtuma na mîtumi, na mîgeka ya rangi inyiingî, na mîkanda îîndi bwega.

²⁵ Meri cia Tarishishi nîcio ciabûkamatagîra into bieenu. Gwe ntûûra ya Tiro ûkari ta meri îkamatîte mîrigo îmîrito îrieene gatîgatî.

²⁶Nabo eetithia îtarû baaku baagwikîîrie îrieene gatîgatî, na ruuo rwa bwa gaiti rûrakûriinga rûrakuunanga tûchunchî.

²⁷Into biaaku bionthe bia biashara na ûtonga bwaaku, na eetithia itarû na aringi biashara, na asikarî baaku bonthe barîa waarî nabo, bonthe baraûrîra îrieene ndeene, ntukû îrîa gîtarû kîaunangîrwe nî rûûjî.

²⁸Tûjû twa barîa baaûrîrîte îrieene tûraigîîgua mpwîroone.

²⁹Bonthe barîa beetithagia meri na abundi ba meri barathambîra baraumîîra mpwîroone.

³⁰Barakaya mono nîûntû bwaaku baraigerera mîtwe yaao mûju na baraigaragaria tîîriine.

³¹Baracienja na gwîkîra ithango bararîra barî na kîeba mono.

³²Baraina rwîmbo rwa kîrîro nîûntû bwaaku bakiugaga. ‘Nî ntûûra îngî îrîkû yaathirua ta Tiro? Tiro îrîa yaaki rûteere rwa îria?

³³Rîrîa into biaaku bietaga nthîgûrûûne ingî nî biateetherie antû babaingî barîa baarî na ûbatu. Into biu biaaku bibingî bia biashara nî biatongerie anene ba nthîgûrû îîu.

³⁴Nandî gwe Tiro, nî ûûrîrîte îrieene ndeene amwe na into biaaku na antû barîa baakûritagîra ngûgî.’

³⁵Antû bonthe barîa batwîre nteere cia îria nî barigarîtue nîgwe. Anene baao barigari mwanka moothiû jaao jaikithara.

³⁶Abiashara ba mîgongo îngî nî bagûkûmeneeria, nîûntû mûthia jwaaku jûgûkinya. Naagwe ûtîkoroethîrwa ûrî o kaîrî kenya na kenya.”