Read KIMERU BIBLE PROTESTANT EDITION Ezek 28 Bible Online

Ezek 28 - KIMERU BIBLE PROTESTANT EDITION bible

Ezek 28

¹MWATHANI nî aambarîîrie ni Ezekieli arambîîra atîrî,

²“Mûtaana wa muntû, îîra mûnene wa ntûûra ya Tiro, MWATHANI Mûrungu ariuga ûjû: Gwe nî ûciimbaimbîîtie wikumîtie ûgîciîtaga mûrungu. Uugaga atî nî ûkarîrîte rûriga rûrîa mûrungu jûkaragîra, na atî nî rûthiûrûkîri nî îria. Gwe ûthûgaanagia ûrî ûûme ta Mûrungu, îndî menya atî gwe ûrî muntû.

³Nî mma ûrî ûmûûme nkûrûki ya Danieli, na gûtî ûntû ûtiijî.

⁴Nî ûûme na ûmenyo bwaaku bûtûmîte woona ûtonga na wîthîrwa ûrî na thaabu na fetha mîthithûûne yaaku.

⁵Tontû bwa ûûme bwaaku bûbwingî nî wingîîtie ûtonga bwaaku, naagwe nî wikumîtie nîûntû bwa ûtonga bûu.

⁶“Nandî MWATHANI Mûrungu arîkwîra atîrî, Nîkwîthîrwa nî ûkûthûgaania atî ûrî ûmûûme ta mûrungu,

⁷ngatûma anthû barîa bathûûku buru bakwithûkîre. Nabo bakaathiria into biaaku birîa bithongi bionthe birîa ûcwîte na ûûme bwaaku na nthûûkie riîtwa rîaaku buru.

⁸Bacoke bakûûrage bakûgere îrieene gatîgatî.

⁹Rîrîa anthû bakeeja gûkûûraga noo ûkauga ûrî mûrungu? Kîrî bo ûkeethîrwa ûrî o muntû.

¹⁰Naagwe ûgaakua ta muntû ûtî na îgweta, ûûragwe nî antû ageni. Ûu nîu ûûni MWATHANI Mûrungu nkuuga.”

¹¹MWATHANI nî aambarîîrie o kaîrî arambîîra atîrî,

¹²“Mûtaana wa muntû rîra kîrîro gîkînene nîûntû bwa mûnene wa Tiro. Ningî ûmwîre MWATHANI Mûrungu ariuga ûjû: Gwe nî waarî kîonanîîria kîa mantû jameega na nî waarî ûmûûme na ûmûthongi buru.

¹³Waatwîre muundeene jwa Mûrungu jwa Edeni, na waithongomeetie na maiga ja mîthemba îmiingî: maiga ja goro jamatuune na topazi na jasipa na maiga ja goro ja wiirû bwa îgûrû, na emeradi, na berili, na nikithi, na thaabu. Naagwe wathithîîrue jo rîrîa woombîrwe.

¹⁴Ningî ndîrakûthuurîra kerubi wa gûgûkaragia, ûtûûraga kîrîmeene gîaakwa gîkîtheru, ûgeetagîîra maigeene jaakanaga ta mwanki.

¹⁵Mîîtîre yaaku yaarî îmîega kuuma rîrîa woombîrwe mwanka rîrîa waambîrîîrie kûthithia ûthûûku.

¹⁶Biashareene ciaaku nî woojûrîrwe nî ûtuunyani na meeyia. Tontû bûû, ndîrakûrita kîrîmeene gîaakwa gîkîtheru ndîragûta ta gîntû kîrî na mûgiro. Nawe kerubi ûrîa waagûkaragia arakwînga ûrauma maigeene jarîa jaakanaga ta mwanki.

¹⁷Gwe nî waaikumagia mono nîûntû bwa ûthongi bwaaku. Ningî nî waathûûkîrie kîrîra gîaaku nîûntû bwa kwenda îgweta. Naani ndîrakûgwîthia nthîgûrû nîkenda woonwa nî anene bangî bakîra.

¹⁸Gwe nî weekîîre irombero biaaku mûgiro na meeyia jaaku jamaingî na waayia bûrîa waatumagîra ûkîringa biashara. Tontû bûû, ndîrakûmuuntia mwanki gwe ntûûra ndîrakwîîthia buru. Barîa bonthe bakwonaga boonaga ûîte ûkaa mûju.

¹⁹Mîgongo yonthe îrîa yeejaga kîrî gwe nîka îrigari, yoona ûrîa ûkinyîîte mûthia jûmûthûûku mono, na nîu ûgatûûra mwanka kenya na kenya.”

²⁰ MWATHANI nî aambarîîrie arambîîra atîrî,

²¹“Mûtaana wa muntû, roria ûntû bwegiî kûthirua gwa ntûûra ya Sidoni.

²²Mîîre ûûni MWATHANI Mûrungu ndîmîîra ûjû: Ndî na ûthû naagwe gwe ntûûra ya Sidoni. Nkoonania mwago jwaakwa nîûntû bwa ûrîa ngaakûthithîria. Nabo barîa bakoona ûrîa ngaagûkanûkia kwonania waagîru bwaakwa, bakaamenya ni nî ni MWATHANI.

²³Ngaatûma mîrimo ya mîthemba îmiingî, yûrage antû ntûûreene. Ningî bûkaaîthûkîrwa kuuma nteere cionthe na antû booragîrwe ntûûreene. Rîu nîrîo bakaamenya ni nî ni MWATHANI.”

²⁴MWATHANI ariuga atîrî, “Antû ba Israeli batîthîînua kaîrî nî antû barîa baankeene nabo. Antû barîa bakari ta nkoonko kana miigua, nîûntû nîbo babamenaga. Nabo bakaamenya ni nî ni MWATHANI Mûrungu.”

²⁵Ûûni MWATHANI Mûrungu ndiuga atîrî, “Rîrîa nkoothûrania antû ba Israeli kuuma nthîgûrû irîa banyaganîte, nîrîo antû ba mîgongo yonthe bakaamenya ni ndî ûmûtheru. Nabo bagaatûûra nthîgûrû yaao yongwa îrîa ndaanenkeere nthûûmba yaakwa Jakubu.

²⁶Nabo bagaatûûra kindaaji. Bagaaka nyomba na barîme miuunda ya mîzabibû. Ngaakanûkia atûûri baao bonthe barîa babathithagîria mantû ja rûmena. Rîu nîrîo bakaamenya ni nî ni MWATHANI Mûrungu waao.”