Read KIMERU BIBLE PROTESTANT EDITION Ezek 29 Bible Online

Ezek 29 - KIMERU BIBLE PROTESTANT EDITION bible

Ezek 29

¹ Kûrî ntukû ya îkûmi na ijîîrî cia mweri jwa îkûmi, mwakeene jwa îkûmi tûrî kîthamîrioone, MWATHANI nî aambarîîrie ûûni Ezekieli arambîîra atîrî,

²“Mûtaana wa muntû roreria Farao mûnene wa Misri amwe na antû ba Misri bonthe ûbeere ûûni nkaabakanûkia.

³Beere ûu nîu ûûni MWATHANI Mûrungu nkwîra Farao mûnene wa Misri. Ûûni ndî mûnthû waaku gwe nkûnga îrîa îkaraga mûuroone. Gwe uugaga atî rûûjî rwa Naili nî rwaaku na ûkauga nîgwe warûthithîrie.

⁴Ngaakûgwatia na ndwano na ntûme makûyû ja mîuro yaaku jarûmate ikondeene bia mwîrî jwaaku. Ningî ngaagûkuucia nkûrite ndûûjîîne irîa ûkaraga amwe na makûyû jonthe ja mîuro yaaku jarîa jarûmatîte ikonde bia mwîrî jwaaku.

⁵Naagwe ngaakûgera rwanda amwe na makûyû jonthe ja mîuro yaaku. Ûkagwa bûûrîîne na kiimba gîaaku gîtîthikwa. Nakîo gîkaarîîwa nî nyamû cia kîthaka na nyoni.

⁶ Rîu antû ba Misri bonthe bakaamenya nî ni MWATHANI. “Antû ba Israeli nî babwîrîgagîîra mono buî antû ba Misri, îndî bûtî inya bûkari ta rûthanje.

⁷Rîrîa baaciigîkanîrie naabuî, nîka bwaunîkangîre bûrabamunta ituro. Ningî rîrîa baciigîkanîrie naabuî, nî bwaunîkangîre bûrabamunta tuuna.

⁸Nandî rî, ûûni MWATHANI Mûrungu ndiuga atîrî, ngatûma bwithûkîrwe; antû na nyomoo bûkooragwa.

⁹Nayo nthîgûrû ya Misri îkaathûkangua buru îtuîke maganjo. Nabo antû ba yo bakaamenya nî ni MWATHANI. “Nîkwîthîrwa nî waugîre atî rûûjî rwa Naili nî rwaaku na atî nîgwe warûthithîrie,

¹⁰tontû bûu rî, ngaagûkanûkia na nkanûkie mîuro yaaku. Ngaatûma nthîgûrû ya Misri îtuîke îgaanjo kuuma Migidoli mwanka Sîene, na mwanka gûkinya mwankeene jwa Ethiopia.

¹¹Gûtî muntû kana nyomoo îgaakinya ku. Nayo nthîgûrû îtîtûûrwa îgiita rîa mîaka mîrongo îna.

¹²Ngaatûma Misri yaa nthîgûrû îrîa nthûûkangie mono nkûrûki ya nthîgûrû ingî. Ntûûra ciaayo igaakara irî maganjo îgiita rîa mîaka mîrongo îna, ciîthîrwe ithûûkangîtue nkûrûki ya ntûûra cia nthîgûrû ingî. Ngaatûma antû ba Misri bathaamue baikue gûntû gûtî kwaao, bagatûûre mîgongoone îngî.”

¹³“Ningî MWATHANI Mûrungu ariuga ûjû: Nyuma ya mîaka mîrongo îna nkoothûrania antû ba Misri kuuma mîgongoone îngî kûrîa mbanyaganîtie.

¹⁴Ngaacoka ncokerie antû ba Misri ûthinyaari bwaao, batûûre bwa ûmotho bwa Misri kûrîa baatûûraga tene. Ûnene bwaao kûu bûtîthîrwa bûrî na inya.

¹⁵Nabu ûnene bwaao bûgaatûûra bûtî na inya kîrî moonene jangî. Tontû bûû, batîcoka gwikumîria mîgongo îngî kaîrî kana bamîatha.

¹⁶Nabo antû ba Israeli batîîrîgîîra gûteethua nî Misri kaîrî. Nîkwîthîrwa ûrîa Misri îkaathithîrua bûgaatûma Israeli îririkana ûrîa yaciaîîtie kwîrîgîîra ûteethio kuuma kîrî Misri. Rîu nîrîo Aisraeli bakaamenya nî ni MWATHANI Mûrungu.”

¹⁷Kûrî ntukû ya mbere ya mweri jwa mbere mwakeene jwa mîrongo îîrî na mûgwanja tûrî kîthamîrioone, MWATHANI nî aambarîîrie. Arambîîra atîrî,

¹⁸“Mûtaana wa muntû, mûnene Nebukadineza wa Babiloni nî aithûkîîre ntûûra ya Tiro. We nî akamatithagia njûûrî yaawe mîrigo îmîrito mwanka mûtuundu jwaao jûkang'unyûka na ituro biaao bikathumûka. Mûnene ûu amwe na njûûrî yaawe gûtîkîo boonere gîa kûbarîaa nîûntû bwa ngûgî îîu baarîtîte.

¹⁹Tontû bûû, MWATHANI Mûrungu ariuga ûjû: Nkaanenkanîra nthîgûrû ya Misri kîrî mûnene Nebukadineza mûnene wa Babiloni. Akamîtaa ajûkie ûtonga bwaayo eete nabu. Nabu ûtonga bûu bûkaa îrîi kîrî njûûrî yaawe.

²⁰Nî nenkerete Nebukadineza nthîgûrû ya Misri ta îrîi rîa ngûgî cia mînoga irîa aritîte, nîûntû nî ni baaritagîra cio. Ûu nîu ûûni MWATHANI Mûrungu nkuuga.

²¹“Rîrîa ûntû bûu bûgaakarîka, ngatûma Aisraeli bagîa inya kaîrî, naagwe Ezekieli ngatûma ûbarorerie kaîrî, nîkenda bamenya ni nî ni MWATHANI.”