Read KIMERU BIBLE PROTESTANT EDITION Ezek 3 Bible Online

Ezek 3 - KIMERU BIBLE PROTESTANT EDITION bible

Ezek 3

¹ Mûrungu nî aambîrîre atîrî, “Mûtaana wa muntû rîa kîrîa ngûkûnenkera. Rîa yuku rîrî naagwe wîte ûkaarîrie antû ba Israeli.”

²Tontû bûû, ndîraagamia kanyua, nawe aranenkera yuku ndîa.

³Arambîîra atîrî, “Mûtaana wa muntû rîa yuku rîrî ngûkûnenkera ûrîûjûrie kîu.” Naani ndîrarîmerîa. Narîo rîarî na mûrîo ta jwa nainchû kanyueene gaakwa.

⁴Ningî arambîîra atîrî, “Mûtaana wa muntû, îta kîrî antû ba Israeli ûbeere nteto ciaakwa.

⁵Nîkwîthîrwa gwe ûtîgûtûmwa kîrî antû ba rûthiomi ûtiijî na rûrûûmû, îndî nî kîrî antû ba Israeli.

⁶Ûtîgûtûmwa kîrî antû ba mîgongo îngî îrî na nthiomi injûûmû irîa ûtîkûmenya. Ningî kinya ndîngîgûtûma kîrî ta bau barîngî gûkûthikîîra.

⁷Îndî antû ba Israeli batîkûthikîîra; nîkwîthîrwa batîkwenda kûmbigua nîûntû antû bonthe ba Israeli nî ba mîtwe îmîûmo na ndemi.

⁸Atîrî, ngaakûûmia nkoro o ta ûrîa nkoro ciaao irî injûmo, ntûme ûgîa ûtûrîka o tabo.

⁹Ngaatûma ûûme ta iiga rîa nkanka. Menya ûbakîra kana ûrigarua nî ûrîa bagagûtega nîûntû bo nî antû ndemi.”

¹⁰Ningî Mûrungu nî aambîrîre atîrî, “Mûtaana wa muntû igua nteto iu cionthe ndaakwîra na ûciîkîre nkoroone.

¹¹Ûcoke wîte kîrî antû beenu barîa atae ûbeere nteto irîa ûûni MWATHANI Mûrungu nkuuga, beethîrwa bakîendaga gûciigua kana batîkwenda.”

¹²Rîu Roho wa Mûrungu arambûkîîria na ndîraigua mûtitimûko jûmûnene nyuma yaakwa jûkari ta jwa nthî îkwinaina. Kajû nî kaumaga mûtitimûkoone jûu gakiugaga atîrî, “Mwago jwa MWATHANI jûrokumagua kûu atûûraga.”

¹³Ndîracoka ndîraigua mathagu ja biûmbe birîa birî mwoyo jagîkirithana, na ndîraigua mûrurumo jwa magûrû jau jakari ta ja baisikiri, jarîa jaarî rûteere rwa biûmbe biu. Mûrurumo jûu jwakari ta jwa nthîgûrû îkiinaina.

¹⁴Nî ndaathûûrîre mono rîrîa Roho aambûkîrîrie arambikia gûntû kûngî. Naani nî ndaaigagua inya ya MWATHANI ndeene yaakwa.

¹⁵Tontû bûû, ndîraikua kîrî atae ba Israeli kûu ntûûreene ya Telabibu kûrîa baatwîre rûteere rwa mûuro jwa Kebari. Naani nî ndaakarîre au ntukû mûgwanja ndigari.

¹⁶Nyuma ya ntukû mûgwanja ikûthira, MWATHANI nî aambarîîrie arambîîra atîrî,

¹⁷“Mûtaana wa muntû ngûkweethia mûkaria wa antû ba Israeli. Rîrîa ngaakwîraga mantû jarîa ûbuîrîte kûbakaania, no mwanka ûbakaanagie.

¹⁸Rîrîa nkauga atî muntû ûmûûî no mwanka akue, naagwe ûrege kûmûkaania kana ûmwarîria atigana na mantû jaawe jamathûûku oonokia mwoyo jwaawe, muntû ûu agaakua nîûntû bwa meeyia jaawe. Naagwe nîgwe nkaarîyia tharike yaawe.

¹⁹Îndî gwe ûkëeja gûkaania muntû ûmûthûûku ûntû, nawe akarega gûtigana na ûthûûku bwaawe, kana atigana na mathithio jaawe jamathûûku agaakua arî na meeyia. Îndî gwe ûkeethîrwa ûgûcionokia.”

²⁰“Ningî muntû ûmwagîru akëeja gûtiga kwaa ûmwagîru akaambîrîîria kûthithia mantû jamathûûku, ûûni nkaamûcwîra ûntû bûrîa bûkaamûgiitaria nawe agaakua. Naagwe wëethîrwa ûtîmûkaanîtie mantû jau mathûûku, agaakua nîûntû bwa meeyia jaawe, na mathithio jaawe jarîa ja mbere jamaagîru jatîririkanwa. Îndî gwe naagwe ngaakûrîyia tharike yaawe.

²¹Îndî wakaania muntû ûmwagîru atîkeeyie, nawe arega kwîyia, agaatûûra mwoyo, nîûntû nî aigîîtue jarîa akaanîtue. Naagwe ûkeethîrwa ûkwonokia mwoyo jwaaku.”

²²Naani nî ndaaigîrue inya kuuma kîrî MWATHANI yaatonya ndeene yaakwa na MWATHANI arambîîra atîrî, “Ithuranîre wîte kîguuruune naani ngaakwarîria ûrî ku.”

²³Tontû bûû, ndîraithuranîra ndîreeta kîguuruune. Ndîroona ûkumio bwa MWATHANI bûrûngami o, ta bûrîa ndooneete rûteere rwa mûuro jwa Kebari. Naani ndîraturia maru na ndîratirithia ûthiû nthî.

²⁴Rîu Roho wa Mûrungu aratonya kîrî ni arambûkîîria ndîrarûngama. MWATHANI arambarîria arambîîra atîrî, “Îta ûciingîre nyomba yaaku.

²⁵Naagwe mûtaana wa muntû ûkaaogwa na mîkanda nîkenda ûtiumagara wîta kîrî antû.

²⁶Ningî ngatûma rûûme rwaaku rûremere karakara ûremwe nî kwaria, na ûremwe nî kûbagondokera; nîkwîthîrwa bo nî antû ndemi.

²⁷Îndî rîrîa ngaakwarîria, ngatûma ûûmba kwaria, naagwe ûkaabeera ûrîa MWATHANI Mûrungu akuuga. Muntû ûrîa ûkwenda kwigua nî aigue na ûrîa ûtîkwenda kwigua nî akare nîûntû bo nî antû ndemi.”